ރޮނާލްޑޯ ދޫކޮށްލަން މެންޗެސްޓަރ ޔުނައިޓެޑުން ނިންމައިފި

މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ދޫކޮށްލަން އެ ކުލަބުން ނިންމައިފިއެވެ.

މިކަން ހާމަކޮށްފައިވަނީ ޔުނައިޓެޑުން އަންގާރަ ދުވަހުގެ ރޭ އާންމު ކުރި ބަޔާނެއްގައެވެ.

ޔުނައިޓެޑުގެ ބަޔާނުގައި ބުނީ ދެ ފަރާތުން އެއްބަސްވާ ގޮތުގެ މަތިން ރޮނާލްޑޯގެ އެއްބަސްވުން އުވާލުމަށް ނިންމާފައިވާ ކަމަށެވެ. މީގެ އިތުރުން ޔުނައިޓެޑުން ވަނީ ރޮނާލްޑޯ ކުލަބަށް ކޮށްދީފައިވާ ޚިދުމަތްތަކަށް ޝުކުރު އަދާކޮށްފައެވެ. ހަމައެއާއެކު މުސްތަޤުބަލުގައި ރޮނާލްޑޯ އަށް ކާމިޔާބަށް އެދޭ ކަމަށް ވެސް ބަޔާނުގައި ވަނީ ބުނެފައެވެ.

ބަޔާން ނިންމާލަމުން ޔުނައިޓެޑުން ބުނީ ކުލަބުގެ ހުރިހާ އެންމެންގެ ފޯކަސް ހުރީ ކޯޗު އެރިކް ޓެން ހާގްގެ އިރުޝާދުގެ ދަށުން ރަނގަޅު ކާމިޔާބީތަކެއް ހޯދައި، ގުޅިގެން ކާމިޔާބަށް ވާސިލްވުމަށް ކަމަށެވެ.

ޔުނައިޓެޑުން ރޮނާލްޑޯގެ އެއްބަސްވުން އުވާލަން ނިންމީ ދާދި ފަހުން ރޮނާލްޑޯ ދިން އިންޓަވިޔުއެއްގައި ޔުނައިޓެޑުގެ ވެރިންނާއި، ކޯޗު ޓެން ހާގަށް ބަހުގެ ހަމަލާތަކެއް ފޮނުވާލާފައި ވަނިކޮށެވެ. މީގެ ކުރިން ވެސް ރޮނާލްޑޯ ވަނީ އޭނާ ޔުނައިޓެޑު ދޫކޮށްލަން ބޭނުންވާކަން ކުލަބަށް އަންގާފައެވެ. ޔުނައިޓެޑުން ރޮނާލްޑޯގެ އެއްބަސްވުން އުވާލަން ނިންމައިރު، ރޮނާލްޑޯ ބަދަލުވާނެ ވަކި ކުލަބެއް މިހާތަނަށް ހާމަވެފައެއް ނެތެވެ.

ދެ ވަނަ ފަހަރަށް ރޮނާލްޑޯ ޔުނައިޓެޑަށް ބަދަލުވީ 2021 ވަނަ އަހަރުއެވެ. ނަމަވެސް އޭގެ ފަހުން ޔުނައިޓެޑާއެކު ރޮނާލްޑޯ އަށް އެކަށީގެންވާ ކުޅުމެއް ނުދެއްކެއެވެ. މި ސީޒަންގައި ޔުނައިޓެޑަށް ކުޅެދިން 16 މެޗުން ރޮނާލްޑޯ އަށް ޖެހުނީ އެންމެ ތިން ލަނޑެވެ. ރޮނާލްޑޯ ވަނީ ޔުނައިޓެޑަށް ޖުމުލަ 346 މެޗު ކުޅެދީ 145 ލަނޑު ޖަހާފައެވެ.