އެމެރިކާގައި ހުންނަ ރާއްޖޭގެ އެމްބަސީގެ މަސައްކަތުގެ ދާއިރާ މަޖިލީހުން ފާސްކޮށްފި
ވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުން ވަނީ ކޮމިޓީ ރިޕޯޓް ފާސްކޮށްފައި
ރައްޔިތުންގެ މަޖިލީހުގެ ޖަލްސާގެ ތެރެއިން
"ވޮޝިންގޓަނުގައި ހުންނަ ދިވެހިރާއްޖޭގެ އެމްބަސީ" ގެ ނަން "އެމެރިކާ ގައި ހުންނަ ދިވެހިރާއްޖޭގެ އެމްބަސީ" ގެ ނަމަށް ބަދަލުކުރެއްވުމާ ގުޅިގެން މިނިސްޓްރީ އޮފް ފޮރިން އެފެއާޒްގެ މަސައްކަތްތަކުގެ ދާއިރާއަށް ގެންނެވި ބަދަލުތައް ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން މިކަންތައް ދިރާސާކުރި ގޮތުގެ ރިޕޯޓަށް އަންގާރަ ދުވަހުގެ ޖަލްސާގައި ވަނީ ވޯޓަށް އަހާފައެވެ. މިވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުން ވަނީ ކޮމިޓީ ރިޕޯޓް ފާސްވެފައެވެ.
"ވޮޝިންގޓަނުގައި ހުންނަ ދިވެހިރާއްޖޭގެ އެމްބަސީ" ގެ ނަން "އެމެރިކާ ގައި ހުންނަ ދިވެހިރާއްޖޭގެ އެމްބަސީ" ގެ ނަމަށް ބަދަލުކޮށްފައިވަނީ މިއަހަރުގެ ސެޕްޓެމްބަރ މަހުގެ 25 ވަނަ ދުވަހުއެވެ. އެމައްސަލަ ކޮމިޓީން ދިރާސާކުރަން ފަށާފައިވަނީ އޮކްޓޯބަރ 10 ވަނަ ދުވަހުއެވެ.
އެމެރިކާގައި ހުންނަ ދިވެހިރާއްޖޭގެ އެމްބަސީގެ މަސައްކަތްތަކުގެ ގޮތުގައި 16 ކަމެއް ކަނޑައަޅާފައިވެއެވެ. ރިޕޯޓް ކޮމިޓީން ފާސްކޮށްފައިވަނީ ރައީސް އޮފީހުން މިމައްސަލަ ފޮނުއްވާފައިވާގޮތަށެވެ.
