މިއަދު ރާއްޖޭގެ ފޮރިން ސާރވިސްއަކީ ޕްރޮފެޝަނަލް ޚިދުމަތެއް: ޚާރިޖިއްޔާ
21 ނޮވެމްބަރު 2022 | ހޯމަ 11:30ދިވެހިރާއްޖޭގެ ފޮރިން ސާރވިސް އާ ބެހޭ ގާނޫނެއް ފުރަތަމަ ފަހަރަށް ވަނީ ވުޖޫދަށް ގެނެސްފައި
ފޮރިން މިނިސްޓަރ އަބްދުﷲ ޝާހިދު
މިއަދު "ދިވެހިރާއްޖޭގެ ފޮރިން ސާރވިސް" އަކީ ވަކި ޕްރޮފެޝަނަލް ޚިދުމަތެއްކަމަށް ފޮރިން މިނިސްޓްރީން ބުނެފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރަށް 4 އަހަރު ފުރުމާއި ގުޅިގެން ފޮރިން މިނިސްޓްރީން ވަނީ އެ ދާއިރާއިން ރާއްޖެއިން ހޯދާފައިވާ ކާމިޔާބީތައް ހިއްސާކޮށްފައެވެ.
ފޮރިން މިނިސްޓްރީން ބުނީ ރާއްޖޭގެ ފޮރިން ސަރވިސްއަކީ ޕްރޮފެޝަނަލް ޚިދުމަތަކަށް ހެދުމަށް މި ސަރުކާރުން ގިނަ މަސައްކަތްތަކެއް ކޮށްފައިވާކަމަށެވެ. މިގޮތުން ދިވެހި ޚާރިޖިއްޔާގައި މަސައްކަތްކުރާ މުވައްޒަފުން ބާރުވެރިކުރުވައި، ވަޒީފާގެ ޔަގީންކަން ކަށަވަރުކުރުމުގެ ގޮތުންނާއި، ޚާރިޖިއްޔާގެ މަސައްކަތްތައް ހަރުދަނާކުރުމުގެ ގޮތުން ދިވެހިރާއްޖޭގެ ފޮރިން ސާރވިސް އާ ބެހޭ ފުރަތަމަ ޤާނޫނެއް ވުޖޫދަށް ގެނެސް، އަމަލުކުރަން ފެށުނުކަން މިނިސްޓްރީން ވަނީ ފާހަަގަކޮށްފައެވެ.
ފޮރިން މިނިސްޓްރީން ފޮރިން ސަރވިސް ގާނޫނަށް އަމަލުކުރަން ފެށުމާއެކު "ދިވެހިރާއްޖޭގެ ފޮރިން ސާރވިސް" އަކީ ވަކި ޕްރޮފެޝަނަލް ޚިދުމަތެއްގެ ގޮތުގައި ކަނޑައެޅިގެންދިޔަ ކަމަށާއި، މިއީ ވަރަށް ގިނަ އަހަރުތަކަކަށްފަހު ހާސިލުކުރެވުނު މުހިންމު ލަނޑުދަނޑިއެއް ކަމަށް ފޮރިން މިނިސްޓްރީން ބުނެފައިވެއެވެ.
މީގެ އިތުރުން ޕްރޮފެޝަނަލް ފޮރިން ސަރވިސްއެއްގެ ޚިދުމަތް ރަނގަޅު ފެންވަރެއްގައި ދިނުމަށް މިނިސްޓްރީ ހިނގަމުންދާ އިމާރާތް މަރާމާތުކޮށް، އޮނަރަބަލް އަލްއުސްތާޛް ފަތުޙުﷲ ޖަމީލްގެ ނަންފުޅަށް މި އިމާރާތް ރައީސުލްޖުމްހޫރިއްޔާ ތަޚްސީސް ކޮށްދެއްވި ކަމަށް ފޮރިން މިނިސްޓްރީން ބުނެފައިވެއެވެ.
މީގެ އިތުރުން ފޮރިން މިނިސްޓްރީން ބުނީ ކޮންމެ ކަމަކީވެސް ހާސިލުކުރެވޭނެ ކަމެއްކަމަށާއި ކުރިމަތިވާ ކޮންމެ ގޮންޖެހުމަކުން އަރައިގަނެވޭނެ ކަމަށް އިދާރާއިން ދެކޭ ކަމަށެވެ. ރައީސް އިބްރާހީމް މުޙައްމަދު ޞާލިހުގެ ރައީސްކަމުގައި މިވީ 4 އަހަރު ދުވަހުގެ ތެރޭގައި. ޚާރިޖިއްޔާއަކީ އެމަނިކުފާނުގެ ހިކުމަތްތެރި އިރުޝާދުގެ ދަށުން މަސައްކަތްކޮށް، ކަން ކުރެވޭ އަދި ނަތީޖާ ނެރެވޭ މުއަށްސަސާއެއް ކަން ސާބިތުކޮށްދީފައިވާކަމަށް ފޮރިން މިނިސްޓްރީން ބުނެފައިވެއެވެ. އަދި ދިވެހިރާއްޖެއަކީ ކިތަންމެ ކުޑަ ޤައުމެއްކަމުގައި ވީނަމަވެސް، އެއީ ބައިނަލް އަޤްވާމީ މައިދާނުގައި ދިވެހިރާއްޖޭގެ ހައިބަތާއި ޝަހުސިއްޔަތު ކުޑަވާން ޖެހޭ ކަމެއް ކަމަކަށް ޚާރިޖިއްޔާއިން ގަބޫލެއް ނުކުރާ ކަން ވަނީ ފާހަގަކޮށްފައެވެ.
