މާލޭގައި ކުރިއަށް ގެންދިޔަ އޮޕަރޭޝަނެއްގައި 13 ކިލޯއަށްވުރެ ގިނަ މަސްތުވާތަކެއްޗާއެކު 6 ލައްކައަށްވުރެ ގިނަ ރުފިޔާ އަތުލައިގެންފައިވާއިރު، އެ މައްސަލައާ ގުޅިގެން ހައްޔަރުކުރި 6 މީހުންގެ ބަންދަށް 15 ދުވަސް ޖަހައިފިއެވެ.
ބުރާސްފަތި ދުވަހުގެރޭ މާލޭގައި ކުރިއަށް ގެންދިޔަ އޮޕަރޭޝަނާ ގުޅޭގޮތުން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވެފައިވަނީ، ފުލުހުންނާއި، ކައުންޓަރ ނާކޮޓިކްސް އިންޓެލިޖެންސް އަދި ޑްރަގް އެންފޯސްމަންޓް ޓީމުން ކުރިއަށް ގެންދިޔަ މަސްތުވާތަކީގެ އޮޕަރޭޝަންގައި 13.56 ކިލޯގެ ޑްރަގްސްއާއި 644،020 ރުފިޔާ ހޯދައި ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ.
މި ތަކެތި އަތުލައިގެންފައިވަނީ މާލޭގެ ދެ ގެއަކުންނާއި ހުޅުމާލޭގެ ގެސްޓްހައުސްއަކުން ކަމަށް ސީޕީ ވިދާޅުވިއެވެ. މަސްތުވާތަކެތި އަތުލައިގަތުމަށް ކުރަމުންދާ މަސައްކަތް ކުރިއަށްދާނެކަމަށް ސީޕީ ވިދާޅުވިއެވެ.
ކްރިމިނަލް ކޯޓުން ވަނީ އެ 6 މީހުންގެ ބަންދަށްވެސް 15 ދުވަސް ޖަހާފައެވެ. އެގޮތުން މި މައްސަލައިގައި ހުށަހަޅާފައިވާ އިންޓެލިޖެންސް ރިޕޯޓާއި ޙާދިސާ ހިނގި ތަނަށް ދިޔަ ފުލުހުންގެ ބަޔާނަށް ބަލާއިރު، ތުހުމަތުކުރެވޭ މިންވަރަށް ހެތްކާއި ގަރީނާ އެބަހުރިކަމަށް ކޯޓު އަމުރުގައިވެއެވެ.
އެމީހުންގެ މައްޗަށް ކޮށްފައިވަނީ މަސްތުވާތަކެތި ބޭނުންކޮށް، ގެންގުޅެ، އެތަކެތީގެ ވިޔަފާރި ކުރާކަމުގެ ތުހުމަތެވެ.
ވުމާއެކު، އެ 6 މީހުންވެސް 3 ޑިސެމްބަރު 2022ގެ ހަވީރު 17:09ށް ކަސްޓޯޑިއަލް ޖަލެއްގައި ބަންދު ކުރުމަށް ވަނީ އަމުރު ކުރައްވާފައެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ އަލީ އާދަމްއެވެ.
ފުލުހުން ދަނީ ރާއްޖޭގެ އެހެން ހިސާބުތަކުގައި ވެސް މަސްތުވާތަކެއްޗާ ދެކޮޅަށް އޮޕަރޭޝަންތަކެއް ހިންގަމުންނެވެ. މަސްތުވާތަކެއްޗާ ދެކޮޅަށް ފުލުހުން ކުރަމުންގެންދާ މަސައްކަތްތަކުގެ ތެރެއިން، ދެ ރަށެއްގައި ހިންގި މަސްތުވާތަކެތީގެ އޮޕަރޭޝަންތަކެއްގައި ތިން މީހުން ހައްޔަރުކޮށްފައި ވަނީވެސް ނިމިދިޔަ އޮކްޓޯބަރު މަހުގެ ތެރޭގައެވެ.
މި މައްސަލައިގައި ހައްޔަރުކުރި މީހުން:
އަހްމަދު ޝާޒް، ހުޅުމާލެ
އަލީ ނާޝިދު ހ. ގަސްފެހި
އިބްރާހީމް އަމްޖަދު ހ. އަމަން
މުހައްމަދު އައިމަން މއ. ތަބައްގެ
މުހައްމަދު ޖިހާދު ހމ. ކޮރަލް
މުހައްމަދު އަދީމް، މ. ފީރޯޒުގެ
