އެމްޓީސީސީ ވަރުގަދަވެއްޖެ، މިއީ ދުނިޔޭގެ ފެންވަރުގައި ގުނާލެވޭ ކުންފުންޏެއް : އާޒިމް
ކުންފުނީގެ އެންމެ އަގުބޮޑު ރައުސުލްމާލަކީ މުވައްޒަފުންކަމަށް އާޒިމް ފާހަގަކުރެއްވި
އެމްޓީސީސީގެ ސީއީއޯ އާދަމް އާޒިމް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ވަރުގަދަވެފައިވާ ކަަމަށާއި މިހާރު އެ ކުންފުންޏަކީ ދުނިޔޭގެ ފެންވަރުގައި ގުނާލެވޭ ކުންފުންޏެއް ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ މި ސަރުކާރު ވެރިކަމާއި ހަވާލުވުމުގެ ކުރިން އެމްޓީސީސީ އިން ހިންގަމުން އައީ ޖުމުލަ 20 ވަރަކަށް ޕްރޮޖެކްޓް ކަމަށް ވީ ނަމަވެސް މިހާރު އެކަން ބަދަލުވެފައިވާ ކަަމަށެވެ. އެގޮތުން މިހާރު އެމްޓީސީސީއިން 100 އަށް ވުރެ ގިނަ ޕްރޮޖެކްޓް ހިންގަމުންދާ އިރު ޕްރޮޖެކްޓެއް ނުހިންގާ ރަށެއް މަދު ކަަމަށް އޭނާ ވިދާޅުވިއެވެ. އެހެންކަމުން އެ ކުންފުނީގެ ވަސީލަތްތަކާއި އިންސާނީ ވަސީލަތްތައް އިތުރުކޮށްފައިވާ ކަަމަށް އާޒިމް ވިދާޅުވިއެވެ. އެގޮތުން 450-500 އާއި ދެމެދުގެ އަދަދަކަށް ހެވީ އިކުއިޕްމެންޓްސް މިހާރު އެ ކުންފުނީގައި އެބަހުރިކަމަށް އޭނާ ވަނީ ފާހަގަކުރައްވާފައެވެ. އެއީ ކުރިއާއި އަޅާ ބަލާއިރު ގާތްގަނޑަކަށް 50% އިތުރު އަދަދެއް ކަމަށް ވެސް އާޒިމް ވަނީ ވިދާޅުވެފައެވެ. ހަމައެހެންމެ މިހާރު ބައިނަލްއަގުވާމީ ގޮތުން ބަލައިގަންނަ ފަދަ ކުންފުންޏަކަށް އެމްޓީސީސީ ވެފައިވާ ކަމަށް އާޒިމް ވިދާޅުވިއެވެ.
މީގެ އިތުރުން މުވައްޒަފުންނަކީ ގާބިލް ތަޖުރިބާހުރި ބަޔަކަށް ހެދުމަށް ވެސް އެމްޓީސީސީ އިން ޚާއްސަ ސަމާލުކަމެއް ދޭ ކަމަށް އާޒިމް ވަނީ ފާހަގަކުރައްވާފައެވެ. އެ ކުންފުނީގެ އެންމެ އަގުބޮޑު ރައުސުލްމާލަކީ މުވައްޒަފުންކަމަށް އާޒިމް ފާހަގަކުރެއްވިއެވެ.
