ހަތަރު ސްކޮލަރޝިޕާއެކު "ނޭޝަނަލް ސްކިލްސް އެންޑް ކެރިއަރ އެކްސްޕޯ" މިއަދު ހަވީރު

ހަޔަރ އެޑިއުކޭޝަން މިނިސްޓްރީ އާއި ޔޫތު މިނިސްޓްރީ ގުޅިގެން ޒުވާނުންނަށް ހާއްސަކޮށްގެން ބާއްވާ އެކްސްޕޯ މިއަދު ހަވީރު ފަށާނެއެވެ.

"ނޭޝަނަލް ސްކިލްސް އެންޑް ކެރިއަރ އެކްސްޕޯ 2022" ގެ ނަމުގައި ކުރިއަށްގެންދާ މި އެކްސްޕޯ އަކީ މިއަދާއި މާދަމާ ހުޅުމާލެ ސެންޓްރަލް ޕާކުގައި ކުރިއަށްދާ އެކްސްޕޯއެކެވެ. މި އެކްސްޕޯގައި ފަންނީ ހުނަރުވެރިކަމުގެ ދާއިރާއިން ތައުލީމާއި ތަމްރީނުގެ ފުރުސަތުތައް ހުރި ދާއިރާތަކުގެ މައުލޫމާތު ފޯރުކޮށްދޭނެއެވެ.

Advertisement

މިއީ ޒުވާނުން ފަންނީ ހުނަރުވެރިކަމުގެ ދާއިރާގައި ހަރަކާތްތެރިވުމުގެ ފުރުސަތުތައް ފަހިކޮށްދިނުމުގެ މަގުސަދުގައި ކުރިއަށްގެންދާ އެކްސްޕޯއެކެވެ. މި އެކްސްޕޯގެ ސަބަބުން ރާއްޖޭގެ މަސައްކަތްތެރިކަމުގެ ދާއިރާއަށް ބޭނުންވާ ދިވެހިން ލިބުމުގެ ދަތިކަމަށް ހައްލު ލިބިގެންދާނެ ކަމަށް ހަޔަރ އެޑިއުކޭޝަން މިނިސްޓްރީން ބުނެއެވެ.

މި އެކްސްޕޯއާ ގުޅޭގޮތުން ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ މި އެކްސްޕޯގެ މައިގަނޑު މަގުސަދަކީ މަސައްކަތްތެރިކަމުގެ ދާއިރާގައި ޒުވާނުންނަށް ހުރި ފުރުސަތުތައް ފަހިކޮށްދިނުން ކަމަށެވެ. އަދި މި ދާއިރާއިން ހުރި ވަޒީފާގެ ފުރުސަތުތަކަށް ކުރިމަތިލުމުގެ ފުރުސަތު ވެސް މި އެކްސްޕޯގެ ޒަރީއާއިން ލިބިގެންދާނެ ކަމަށް މިނިސްޓަރު ވިދާޅުވިއެވެ.

މީގެ އިތުރުން މި އެކްސްޕޯގައި މަސައްކަތްތެރިކަމުގެ ދާއިރާއިން ސަރުކާރުގެ ފަރާތުން ފުލް ސްކޮލަރޝިޕްތަކެއް ލިބިގެންދާނެ ކަމަށް ވެސް މިނިސްޓަރު ވިދާޅުވިއެވެ. އެހެންކަމުން، ވީހާވެސް ގިނަ ފަރާތްތަކުން އެކްސްޕޯއަށް ޒިޔާރަތްކޮށް، ހުރި ފުރުސަތުތައް ބަލާލުމަށް މިިނިސްޓަރު ދައުވަތު ދެއްވިއެވެ.

މި އެކްސްޕޯއަށް ޒިޔާރަތް ކުރާ ފަރާތްތަކުގެ ތެރެއިން ހަތަރު ނަސީބުވެރިއަކަށް ހަތަރު ސްކޮލަރޝިޕް ވަނީ ހުށަހަޅައިފައެވެ. އެއީ ބާސެލޯނާގައި ޕައިލެޓުކަން ކިޔެވުމަށާއި މެލޭޝިއާގައި ކަލިނަރީ އާޓްސް އާއި އިންޓީރިއަރ ޑިޒައިނިންގ ކިޔެވުމަށާއި ޖޯރޑަންގައި އެއަރކްރާފްޓް މެއިންޓަނަންސް ކިޔެވުމަށް ދޭ ސްކޮލަރޝިޕްތަކެކެވެ. މި ސްކޮލަރޝިޕްތަކަށް ހޮވޭ މީހަކު ކޯހަށް ޝަރުތު ހަމަނުވާނަމަ ޝަރުތު ހަމަވާ އެހެން މީހަކަށް ވެސް ހަދިޔާ ކުރެވޭނެކަމަށް ހަޔަރ އެޑިއުކޭޝަން މިނިސްޓަރު ވިދާޅުވިއެވެ.

މި އެކްސްޕޯ ކުރިއަށްދާ މުއްދަތުގައި މަސައްކަތްތެރިކަމުގެ ހުނަރުގެ ދާއިރާގެ ތަފާތު މައުޟޫތަކަށް ޕެނަލް ޑިސްކަޝަންތައް ބާއްވާނެއެވެ. މިއީ އެ ދާއިރާއާ ގުޅޭ މައުލޫމާތު ފުޅާ ދާއިރާއެެއްގައި ގިނަ ފަރާތްތަކަށް އަންގައިދިނުމަށް ބާއްވާ އެކްސްޕޯއެއް ކަމަށް ހަޔަރ އެޑިއުކޭޝަން މިނިސްޓްރީން ބުނެފައިވެއެވެ. އެގޮތުން، ރާއްޛޭގައި މަތީ ތައުލީމާއި ތަމްރީނު ފޯރުކޮށްދޭ މަރުކަޒުތަކާއި ޓިވެޓް ސެންޓަރުތަކާ ދައުލަތުގެ ކުންފުނިތަކާ ކަމާގުޅުންހުރި ބައެއް މިނިސްޓްރީތަކުން ވެސް ބައިވެރިވެ މައުލޫމާތު ދޭނެއެވެ.

މި އެކްސްޕޯގައި ދޭ މައުލޫމާތު އޮންލައިންކޮށް އެހެނިހެން ރަށްރަށުގައި ތިބި ޒުވާނުންނަށް ވެސް ފޯރުކޮށްދެވޭނެ ކަމަށް ހަޔަރ އެޑިއުކޭޝަން މިނިސްޓްރީން ބުނެއެވެ.

މިއަދު ފަށާ މި އެކްސްޕޯގައި 30 ސްޓޯލަކުން މައުލޫމާތު ފޯރުކޮށްދޭނެއެވެ. މި އެކްސްޕޯ ކުރިއަށްދާނީ މިއަދާއި މާދަމާ ހަވީރު 4:00 އިން 6:00 އަދި ރޭގަނޑު 8:00 އިން 12:00 އަށެވެ.

މިއީ ވޯލްޑް ބޭންކުގެ އެހީގައި ހިންގާ "މީރީ" ޕްރޮޖެކްޓުން ޚަރަދުކޮށްގެން ބާއްވާ އެކްސްޕޯއެކެވެ.