ދުވާލަކު 4،500 އާއި 5،000 އާ ދެމެދުގެ މީހުން މިނީ ބަހުގައި ދަތުރުކުރޭ: އާޒިމް

މާލޭގައި ކޮންމެ ދުވަހަކުވެސް 4،500 އާއި 5،000 އާ ދެމެދުގެ މީހުން މިނީ ބަހުގައި ދަތުރުކުރާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް މިފަދައިން ވިދާޅުވީ ބުރާސްފަތި ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ. މާލެ ސަރަހައްދަށް ދިމާވެފައިވާ އެއްގަމު ދަތުރުފަތުރުގެ މައްސަލަ ހައްލުކުރުމުގެ ގޮތުން އެމްޓީސީސީގެ ދަށުން ސަރުކާރުން ވަނީ ރާއްޖެ ޓްރާންސްޕޯޓް ލިންކް (އާރްޓީއެލް)ގެ ޚިދުމަތް ފަށާފައެވެ.

އާޒިމް ވިދާޅުވީ މިހާރު މާލެ ތެރޭގައި ދުވާލެއްގެ މައްޗަށް 4،500 އާއި 5،000 އާ ދެމެދުގެ މީހުން ދަތުރުކުރާ ކަމަށެވެ. އެއީ ތިން ރޫޓެއްގައި ކަމަށާއި، އިތުރު ރޫޓުތަކަކަށް ބަސް ދަތުރުކުރަން ފަށައިފިނަމަ މި އަދަދު އަދިވެސް އިތުރުވެގެންދާނެ ކަމަށް ބެލެވޭ ކަމަށް އާޒިމް ވިދާޅުވިއެވެ. މިހާރު މަޖީދީމަގުން އައިޖީއެމްއެޗަށް ދާން ބޭނުންވާ މީހަކަށް ދިގު ދަތުރެއް ކުރަންޖެހޭ ކަަމަށާއި، އިތުރު ރޫޓުތަކާއެކު މި މައްސަލައަށްވެސް ހައްލު އަންނާނެ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ މާލޭގައި ދެމުންދާ މިނީ ބަހުގެ ޚިދުމަތަށް އެކި ވެހިކަލްތައް ދުއްވާ މީހުންގެ ފަރާތުން އެއްބާރުލުން ވަރަށް ބޮޑަށް ބޭނުންވާކަމަށެވެ. ބަހަށް ދަތިވާ ގޮތަށް ޕާކުކުރުމާއި އަދިވެސް ބަހަށް ދަތިވާ ގޮތަށް ކުރާ ކަންކަމުގެ ސަބަބުން ބަސް ދަތުރުތަކަށް ލަސްކަމެއް އަންނަ ކަމަށާއި، މިއީ ބަހަށް އަރާ މީހުންގެވެސް ކަންބޮޑުވުމެއް ކަމަށް އާޒިމް ވިދާޅުވިއެވެ.