ފަތުރުވެރިކަމަށް ބިން ކުއްޔަށް ދޫކުރުމުގައި ފަންނީ އެހީތެރިކަން ފޯރުކޮށްދިނުމަށް ލ. އިސްދޫ ކައުންސިލާއެކު ޓޫރިޒަމް މިނިސްޓްރީން އެއްބަސްވުމެއްގައި ސޮއިކޮށްފި
އެއްބަސްވުމުގެދަށުން ބިން ކަނޑައެޅުމާއި ކުރެހުމާއި ޕްލޭންކުރުންފަދަ ކަންތައްތަކުގައި އެހީތެރިކަން ފޯރުކޮށްދޭނެ
ލ. އިސްދޫ ކައުންސިލާއެކު ޓޫރިޒަމް މިނިސްޓްރީން އެއްބަސްވުމުގައި ސޮއިކުރުން
ފަތުރުވެރިކަމަށް ބިން ކުއްޔަށް ދޫކުރުމުގައި ފަންނީ އެހީތެރިކަން ފޯރުކޮށްދިނުމާ ގުޅޭގޮތުން ލ. އިސްދޫ ކައުންސިލާއެކު ޓޫރިޒަމް މިނިސްޓްރީން އެއްބަސްވުމެއްގައި ސޮއިކޮށްފިއެވެ.
ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި ލ. އިސްދޫ ކައުންސިލްގެ ފަރާތުން އެ ކައުންސިލްގެ ރައީސް އިބްރާހީމް ޚަލީލު އެއްބަސްވުމުގައި ސޮއިކުރައްވާފައިވާއިރު، މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރ އަހްމަދު ސާލިހުއެވެ.
ސްޓޭޓް މިނިސްޓަރު ވިދާޅުވީ، އެއްބަސްވުމުގެ ދަށުން ކައުންސިލަށް ބޭނުންވާ އެހީތެރިކަމާއި އެއްބާރުލުން މިނިސްޓްރީން ފޯރުކޮށްދޭނެ ކަމަށެވެ. އެގޮތުން ބިން ކަނޑައެޅުމާއި ކުރެހުމާއި ޕްލޭންކުރުން ފަދަ ކަންތައްތަކުގައި އެހީތެރިކަން ފޯރުކޮށްދޭނެ ކަމަށެވެ.
އިސްދޫ ކައުންސިލްގެ ރައީސް އިބްރާހީމް ޚަލީލު ވިދާޅުވީ އެއްބަސްވުމާއެކު ލިބިގެން ދިޔައީ ފަހި ފުރުސަތެއް ކަމަށެވެ. އިސްދޫއަކީ ބިންބޮޑު ރަށަކަށްވާއިރު އެ ރަށުން ޓޫރިޒަމްގެ ޚިދުމަތް އެންމެ ފުރިހަމައަށް ފޯރުކޮށްދެވިގެންދާނެ ކަމަށްވެސް ގަބޫލުފުޅުކުރައްވާ ކަމަށް ވިދާޅުވިއެވެ.
މިނިސްޓްރީގެ އަމާޒަކީ ކައުންސިލްތަކަށް ބޭނުންވާ އެއްބާރުލުން ދީގެން، ފަތުރުވެރިކަން ކުރިއެރުވުން ކަމަށްވެސް މިނިސްޓްރީން ބުންޏެވެ.
ޓޫރިޒަމް މިނިސްޓްރީން ބުނީ އެހެން ކައުންސިލްތަކުން ވެސް މިނިސްޓްރީއާއެކު މިފަދަ އެއްބަސްވުމެއްގައި ސޮއިކުރުމަށް ބޭނުންވާ ކަމުގައިވާނަމަ އެ ފުރުސަތު ހުރިހާ ކައުންސިލްތަކަށް ހުޅުވާލާފައިވާ ކަމަށެވެ.
