ހުޅުމާލެ ޕްރިޒަން ކޮމްޕްލެކްސްގެ މަސައްކަތާއެކު އިތުރު 450 ޖާގައި ލިބިގެންދާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރު މިފަދައިން ވިދާޅުވީ މި ސަރުކާރަށް 4 އަހަރު ފުރުމާ ގުޅިގެން ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައެވެ.
މިނިސްޓަރު އިމްރާން ވިދާޅުވީ ޖަލުތަކުގެ ޖާގަ އިތުރުކުރުމަަށް މިހާތަނަށް ކުރެވުނީ މަދު މަސައްކަތެއް ކަމަށެވެ. މިއީ ދައުލަތުގެ މަލިއްޔަތާވެސް ވަރަށް ބޮޑަށް ގުޅިފައިވާ ކަމަކަށްވާތީ މިހާތަނަށް އިތުރުކުރެވިފައިވަނީ 250 ޖާގަ ކަމަށް އިމްރާން ވިދާޅުވިއެވެ. އެއަށްވުރެ އިތުރަށް އަދިވެސް ޖާގަ ބޭނުންވާކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ހުޅުމާލޭގައި ގާއިމްކުރާ ޕްރިޒަން ކޮމްޕްލެކްސްއާއެކު މި މައްސަލައަށް އިތުރު ހައްލެއް ލިބިގެންދާނެ ކަމަށެވެ. އިތުރު 450 ޖާގަ އިތުރުކުރެވިގެންދާނެ ކަމަށާއި، މި ޖަލުގެ މަސައްކަތް ވަރަށް އަވަހަށް ފަށަން މަސައްކަތްކުރަމުންދާކަމަށް އިމްރާން ވިދާޅުވިއެވެ. މިނިސްޓަރު ވިދާޅުވީ މި ޕްރިޒަން ކޮމްޕްލެކްސްއަކީ ޒަމާނީ ޕްރިޒަން ކޮމްޕްލެކްސްއަކަށް ވެގެންދާނެ ކަމަށެވެ.
މި މަސައްކަތް ނިމުމުން ޖަލުތައް ރިފޯމްކުރުމުގެ ބޮޑު ބައެއް ނިމިގެންދާނެ ކަމަށް ގަބޫލުކުރަން.ހޯމް މިނިސްޓަރު އިމްރާން އަބްދުﷲ
މިނިސްޓަރު އިތުރަށް ވިދާޅުވީ ޖަލުގެ ޖާގައިގެ ދަތިކަމުގެ ސަބަބުން ތަފާތު ކުށްތަކުގެ މީހުން އެއް ތަނެއްގައ ބައިތިއްބަންޖެހޭ ކަމަށެވެ. މިއީ ޒަމާނުއްސުރެވެސް ބޮޑު ނޭދެވޭ ނަތީޖާއެއް ނުކުންނަ މައްސަލައެއް ކަމަށާއި، މީގެ ތެރޭގައި ވަޔަލެންޓް އެކްސްޓްރީމިޒަމްއާއި، ޓެރަރިޒަމާ ގުޅުންހުރި ކުށްތަކުގެ ތެރެއަށް ކުދި ކުށްތަކުގައި ދާ މީހުން ވަންނަ ކަމަށް އިމްރާން ވިދާޅުވިއެވެ. މިނިސްޓަރު ވިދާޅުވީ މި މައްސަލައަށް ހައްލެއް ހޯދުމަށް މިހާތަނަށް ކުރި މަސައްކަތުން އެކަށީގެންވާ ހައްލެއް ހޯދިއްޖެ ކަމަށެވެ. އެހެންނަމަވެސް އަދިވެސް ވަރަށް ގިނަ މަސައްކަތް ކުރަން އެބަހުރި ކަމަށް މިނިސްޓަރު އިމްރާން ވިދާޅުވިއެވެ.
