ވުނަދާނަ ފެސްޓިވަލް 2022 ފަށައިފި
16 ނޮވެމްބަރު 2022 | ބުދަ 14:54މި ހަރަކާތުގައި ދައުލަތުގެ އެކި މުއައްސަސާތަކާއި ކުންފުނިތަކުންވެސް ބައިވެރިވޭ
"ވުނަދާނަ ފެސްޓިވަލް 2022" ބައްލަވާލެއްވުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ޒިޔާރަތްކުރެއްވުން
އެންމެ ކުދި، ކުދި، އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ވެފައިވާ ވައުދާ އެއްގޮތަށް މިފަދަ ވިޔަފާރިތައް ޕްރޮމޯޓްކުރުމަށް ޚާއްސަކޮށްގެން ބާއްވާ "ވުނަދާނަ ފެސްޓިވަލް 2022" ހެދިގޮނޑުދޮށުގައި ފަށައިފިއެވެ.
މި ފެސްޓިވަލް ބައްލަވައިލެއްވުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ބުދަ ދުވަހުގެ ހަވީރު ވަނީ މި ފެސްޓިވަލްއަށް ޒިޔާރަތްކުރައްވާފައެވެ. މި ޒިޔާރަތުގައި އެކަމަނާ ވަނީ މި ފެސްޓިވަލްގައި ބަހައްޓާފައިހުރި އެކި ސްޓޯލްތަކަށް ޒިޔާރަތްކުރައްވައި އެތަންތަނާބެހޭގޮތުން މައުލޫމާތު އޮޅުންފިލުއްވާފައެވެ.
ބިޒްނަސް ސެންޓަރ ކޯޕަރޭޝަން (ބީސީސީ)ން ކުރިއަށްގެންދާ މި ފެސްޓިވަލްގައި އެންމެ ކުދި، ކުދި، އަދި މެދު ފަންތީގެ ޖުމްލަ 60 ވިޔަފާރިއެއް ބައިވެރިވާއިރު، މިއީ އެފަދަ ވިޔަފާރިތައް ކުރިއަރުވައި އެތަންތަނުގެ އުފެއްދުންތައް މާކެޓްކުރުމަށްވެސް ފަހިވެގެންދާ މުހިންމު ފުރުސަތެކެވެ.
އެއްދުވަހުގެ މުއްދަތައް ކުރިއަށްގެންދާ މި ހަރަކާތުގައި ދައުލަތުގެ އެކި މުއައްސަސާތަކާއި ކުންފުނިތަކުންވެސް ބައިވެރިވެ، އެތަންތަނުން ފޯރުކޮށްދޭ ވިޔަފާރިއާ ގުޅުންހުރި ޚިދުމަތްތަކާއި ފުރުސަތުތަކުގެ މަައުލޫމާތުދިނުންފަދަ ހަރަކާތްތައްވެސް ކުރިއަށްގެންދިޔައެވެ.
