އެންކުންކޫގެ ބަދަލުގައި ފްރާންސް ސްކޮޑަށް ކޯލޯ މުއާނީ

ފީފާ ވޯލްޑް ކަޕަށް ފްރާންސުން ނެގި ސްކޮޑުގައި ކްރިސްޓޮފާ އެންކުންކޫގެ ބަދަލުގައި ރަންޑާލް ކޯލޯ މުއާނީ ހިމަނައިފިއެވެ.

މީގެ ކުރިން ފްރާންސުން އާންމުކުރި ސްކޮޑުގައި އެންކުންކޫ ވަނީ ސްކޮޑުގައި ހިމަނާފައެވެ. އަދި ކޯލޯ ހިމަނާފައެއް ނުވެއެވެ. ނަމަވެސް ފީފާއިން އާންމުކުރި ފްރާންސްގެ ފައިނަލް ސްކޮޑުގައި އެންކުންކޫގެ ބަދަލުގައި ވަނީ ކޯލޯ ހިމަނާފައެވެ.

އެންކުންކޫއަށް މުބާރާތް ގެއްލުނީ ފްރާންސް ޓީމުގެ ފަރިތަކުރުންތަކުގައި އޭނާއަށް އަނިޔާވުމުންނެވެ. އަންގާރަ ދުވަހުގެ ފަރިތަކުރުމުގައި އެންކުންކޫއާއި އެޑުއާޑޯ ކަމަވިންގާ ޖެހިގެން އެންކުންކޫގެ ކަކުލަށް ވަނީ އަނިޔާވެފައެވެ.

ސްކޮޑަށް އަލަށް ނެގި ކޯލޯ ވަނީ މި ސީޒަންގައި އެންޓްރެކް ފްރޭކްފާޓަށް ހުރިހާ މުބާރާތްތަކެއް ޖުމްލަކޮށް 23 މެޗު ކުޅެދީފައެވެ. 23 އަހަރުގެ ސްޓްރައިކަރު ވަނީ މި ސީޒަންގައި އަށް ލަނޑު އެޓީމަށް ޖަހައިދީ 11 ލަނޑު ޖެހުމަށް އެހީތެރިވެދީފައެވެ. ފްރާންސް ޓީމަށް ކޯލޯ އެންމެ ފުރަތަމަ ކުޅުނީ ނޭޝަންސް ލީގުގައި ޑެންމާކާއި ފްރާންސް ބައްދަލުކުރި މެޗުގައެވެ.

ކޯލޯ މިހާރު ހުރީ ޖަޕާނުގައެވެ. ފްރާންސް ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނީ ކޯލޯ ޓީމާއި ގުޅުމަށް ވަރަށް އަވަހަށް ދޯހާއަށް ދަތުރުކުރާނެ ކަމަށެވެ.

މުބާރާތުގައި ފްރާންސް ހިމެނެނީ އޮސްޓްރޭލިއާ، ޑެންމާކް އަދި ޓިއުނީޝިޔާއާއެކު ގްރޫޕް ޑީ ގައެވެ. ފްރާންސްގެ ފުރަތަމަ މެޗުގައި މި މަހުގެ 22 ވަނަ ދުވަހު ނުކުންނަން ޖެހޭނީ އޮްސްޓްރޭލިއާ އާ ދެކޮޅަށެވެ. މިފަހަރުގެ މުބާރާތަށް ނުކުންނައިރު، އެންމެ ފަހުގެ ޗެމްޕިއަން ފްރާންސް ޓީމުގައި އަނިޔާގެ މައްސަލަތައް ވަރަށް ބޮޑެވެ.