ޓެކްސް ބޮޑުކުރުމަށް މަޖިލީހަށް ހުށަހަޅާފައިވާ ބިލު، ރައްޔިތުންގެ މަޖިލީހުގެ ބޮޑު އަގުލަބިއްޔަތަކުން ފާސްކޮށްފިއެވެ.

ދެ ދުވަހެއްގެ މަތިން ބިލަށް ވޯޓަށް އަހަން އެޖެންޑާކުރުމަށްފަހު، މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ހުށަހަޅާފައިވާ އިސްލާހުގެ ބިލު ބުދަ ދުވަހުގެ ޖަލްސާގައި ވޯޓަށް އެހުމުން، މަޖިލީހަށް ހާޒިރުވެ ތިއްބެވި މެންބަރުންގެ ތެރެއިން 55 މެންބަރުން ނުވަތަ 67.07 އިންސައްތަ މެންބަރުން ވަނީ ބިލު ފާސްކުރުމަށް ވޯޓު ދެއްވާފައެވެ.

ޓެކްސް ބޮޑުކުރަސް މަޖިލީހަށް ހުށަހަޅާފައިވާ ބިލުގެ ކޮމިޓީ މަރުހަލާ ނިމި، ކޮމިޓީ ރިޕޯޓް މަޖިލީހުގެ ތަޅުމަށް ފޮނުވާފައިވަނީ ހޯމަ ދުވަހުއެވެ. އަދި ހޯމަ ދުވަހު ކޮމިޓީ ރިޕޯޓަށް ބަހުސް ކުރުމަށް ހުޅުވާލާ، ބަހުސް ކުރާނެ މެންބަރުން ނެތުމުން ވޯޓަށް އަހަން އޮތްނަމަވެސް އެ ދުވަހު ވެސް ރިޔާސަތުން ވަނީ ވޯޓަށް އެހުމާއި ނުލާ ގަވާއިދާ ހިލާފަށް މަޖިލިސް ނިންމާލައްވާފައެވެ. އަދި އަންގާރަ ދުވަހު ބިލަށް ވޯޓަށް އެހުމަށް އެޖެންޑާ ކުރާނެކަމަށް އިދާރީ މޭޒުން ބުނެފައިވީ ނަމަވެސް އަންގާރަ ދުވަހު ވެސް ބިލަށް ވޯޓަށް އަހާފައި ނުވެއެވެ.

ބުދަ ދުވަހުގެ ޖަލްސާފައި ބިލަށް ވޯޓަށް އެހުމަށް އެޖެންޑާކޮށް، ވޯޓުގެ ރަނގަބީލު ޖެހުމަށް ރިޔާސަތުން އަމީންއާންމަށް އެންގުމުން، އިދިކޮޅު މެންބަރުންނާއި، ރައީސް ނަޝީދަށް ތާއިދު ކުރައްވާ އެމްޑީޕީގެ މެންބަރުން ވަނީ ބިލާއި ދެކޮޅަށް އަޑު އުފުލާފައެވެ. އިދިކޮޅު ޕީޕީއެމް/ޕީއެންސީގައި ހިމެނިވަޑައިގަންނަވާ ނައިފަރު ދާއިރާގެ މެންބަރު އަހުމަދު ޝިޔާމާއި، މަހިބަދޫ ދާއިރާގެ މެންބަރު ތޯރިގު ވަނީ ތާޅަފިލި ފުމެ އަޑުގަދަކޮށްފައެވެ.

ނަމަވެސް ވޯޓަށް އެހުމުން މަޖިލީހުގެ ޖަލްސާއަށް ހާޒިރުވެ ވޯޓުގައި ބައިވެރިވެ ވަޑައިގެންނެވި 81 މެންބަރުންގެ ތެރެއިން 55 މެންބަރުން ވަނީ ބިލު ފާސްކުރުމަށް ވޯޓު ދެއްވާފައެވެ. ވޯޓު ދެއްވި މެންބަރުންގެ ތެރޭގައި ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް ވެސް ވަނީ ބިލު ފާސްކުރުމަށް ވޯޓު ދެއްވާފައެވެ.

ބިލާ ދެކޮޅަށް ވޯޓު ދެއްވި އެމްޑީޕީގެ މެންބަރުންގެ ތެރޭގައި ހިމެނެނީ ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒުއާއި، ހެންވޭރު ހުޅަނގު ދާއިރާގެ މެންބަރު ހަސަން ލަތީފާއި، މެދުހެންވޭރު ދާއިރާގެ މެންބަރު އަލީ އާޒިމް އާއި، ގަލޮޅު އުތުރު ދާއިރާގެ މެންބަރު އީވާ ޢަބްދުﷲގެ އިތުރުން، މައްޗަންގޮޅި އުތުރު ދާއިރާގެ މެންބަރު މުޙައްމަދު ރަޝީދާއި، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީއާއި، މާފަންނު މެދު ދާއިރާގެ މެންބަރު އިބްރާހީމް ރަޝީދެވެ.

މީގެ އިތުރުން އުނގޫފާރު ދާއިރާގެ މެންބަރު މުހައްމަދު ވަހީދާއި، ތޮއްޑޫ ދާއިރާގެ މެންބަރު ހަސަން ޝިޔާން އަދި ވިލުފުށި ދާއިރާގެ މެންބަރު ހަސަން އަފީފު އަދި މަޑަވެލި ދާއިރާގެ މެންބަރު ޙުސައިން ފިރުޝާން އާއި ގައްދޫ ދާއިރާގެ މެންބަރު އަޙްމަދު ޒާހިރު ވެސް ހިމެނިވަޑައިގަންނަވައެވެ. މީގެ އިތުރުން ހުޅުދޫ ދާއިރާގެ މެންބަރު އިލްޔާސް ލަބީބާއި، ހިތަދޫ މެދު ދާއިރާގެ މެންބަރު އަހުމަދު ރަޝީދު ބިލާ ދެކޮޅަށް ވޯޓުދެއްވިއެވެ.

ބިލާއި ގުޅޭގޮތުން ބޭއްވި މުޅި މަޖިލީހުގެ ކޮމިޓީ ބައްދަލުވުމުގައި ސަރުކާރުން ހުށަހެޅި ގޮތަށް ބިލް ފާސްކޮށްފައިވަނީ ބިލަށް އިދިކޮޅުންނާއި އެމްޑީޕީ ތެރެއިން ހުށަހެޅި އެއްވެސް އިސްލާހެއް ފާސްނުވެއެވެ. ބިލް ހުށަހެޅި ގޮތަށް ފާސްކޮށްފައިވަނީ ވޯޓުގައި ބައިވެރިވެވަޑައިންނެވި 72 މެމްބަރުންގެ ތެރެއިން 50 މެމްބަރުންގެ ވޯޓުންނެވެ. ބިލާ ދެކޮޅަށް 19 މެމްބަރުން ވޯޓު ދެއްވިއިރު އޭގެތެރޭގައި އެމްޑީޕީ މެމްބަރުންވެސް ހިމެނިވަޑައިގަންނަވައެވެ. ވަކިގޮތަކަށް ވޯޓު ނުދެއްވާ އެއް މެމްބަރަކު އިންނެވިއެވެ.

ސަރުކާރުގެ ފަރާތުން އިހަވަންދޫގެ ދާއިރާގެ މެމްބަރު މުހައްމަދު ޝިފާއު ހުށަހަޅުއްވާފައިވާ މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހުގެ ގެނައުމުގެ ބިލުގައި ވަނީ މުދަލާއި އާމްދަނީން ނަގާ ޓެކްސް (ޖީއެސްޓީ) 6 އިންސައްތައިން 8 އިންސައްތައަށް ބޮޑުކުރުމަށާއި، ފަތުރުވެރިކަމުގެ ދާއިރާގެ މުދަލާއި ޚިދުމަތުން ނަގާ ޓެކްސް (ޓީޖީއެސްޓީ) 12 އިންސައްތައިން 16 އިންސައްތައަށް ބޮޑުކުރުމަށެވެ. އަދި މިގޮތަށް އަންނަ އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން ޓެކްސް ނަގަން ބިލްގައި ބުނެފައިވެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް މިހާރު މަޖިލީހަށް ހުށަހަޅާފައިވާއިރު ބަޖެޓްގައިވާ ގޮތުން ޓެކްސް ބޮޑުކޮށްގެން އަންނަ އަހަރު 3 ބިލިއަން ރުފިޔާ ލިބޭނެކަމަށް ވަނީ އަންދާޒާކޮށްފައެވެ.