އާޖެންޓީނާގެ ކެޕްޓަން ލިއޮނެލް މެސީއާ އެއް ޓީމަކަށް ކުޅުމަކީ ވަރަށް ބޮޑު ހުވަފެނެއް ކަމަށް ބާސެލޯނާ އަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ ބުނެފިއެވެ.
ލެވަންޑޯސްކީ މިހެން ބުނީ މެސީ އަލުން އަނބުރާ ބާސެލޯނާ އަށް ގެނައުމަށް އެ ކުލަބުން މަސައްކަތް ކުރަމުން އަންނަ ކަމަށް އެކި އެކި މީޑިއާތަކުގައި ރިޕޯޓުކުރަމުން އަންނަ ވަގުތެއްގައެވެ. ޕެރިސް ސެއިންޓް ޖާމަން (ޕީއެސްޖީ) އާއެކު މެސީ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. ނަމަވެސް ޕީއެސްޖީން މެސީ ދޫކޮށްލާކަށް ބޭނުމެއް ނުވެއެވެ. އެކަމަކު މެސީ އޭނާގެ މުސްތުޤުބަލާމެދު ގޮތެއް ނިންމާނީ މި މަހު ޤަތަރުގައި ފަށާ ފީފާ ވޯލްޑް ކަޕަށްފަހު ކަމަށް ރިޕޯޓުތައް ބުނެއެވެ.
މެސީއާ ގުޅޭ ގޮތުން ވާހަކަ ދައްކަމުން ލެވަންޑޯސްކީ ބުނީ، މެސީ އަކީ ވަރަށް ވިސްނުންތެރިކަމާއެކު މޮޅަށް ކުޅޭ ކުޅުންތެރިޔެއް ކަމަށެވެ. އޭނާ ބުނީ އަބަދުވެސް މެސީ ސްޓްރައިކަރުންނަށް ބޯޅަ ޕާސް ކުރަނީ ތަފާތު މޮޅު ގޮތަކަށް ކަމަށެވެ. ލެވަންޑޯސްކީ ބުނީ މެސީއާއި ސްޓްރައިކަރުންނާ ދެމެދު އޮންނަ ގުޅުން ފެންނަނީ ވަރަށް ވަރުގަދަޔަށް ކަމަށެވެ. އޭނާ ބުނީ ގޯލުގެ އޭރިޔާ ތެރެއަށް ނުހަނު މޮޅަށް ބޯޅަ ޕާސްކުރަން މެސީ އަށް އެނގޭ ކަމަށާއި، އެކަމުގައި މެސީ އަކީ ދުނިޔޭގައި ހުރި އެއް ވަނަ ކަމަށެވެ.
މެސީއާ އެއް ޓީމަކަށް ކުޅުމާ ގުޅޭ ގޮތުން ވާހަކަ ދައްކަމުން ލެވަންޑޯސްކީ ބުނީ ކަންތައް މިހާރުވާނެ ގޮތެއް އޭނާ އަށް ބުނަން ނޭންގޭ ކަމަށާއި، ނަމަވެސް ސްޓަރައިކަރެއްގެ ހައިސިއްޔަތުން މެސީއާ އެެއް ޓީމަކަށް ކުޅުމަކީ އޭނާ އަބަދުވެސް ދެކެމުން އަންނަ ހުވަފެނެއް ކަމަށެވެ.
ލެވަންޑޯސްކީ މިހާރު އަންނަނީ ޕޮލެންޑާއެކު ވޯލްޑް ކަޕަށް ތައްޔާރުވަމުންނެވެ. ޕޮލެންޑު އޮތީ ވެސް މުބާރާތުގައި އާޖެންޓީނާއާ އެއް ގްރޫޕެއްގައެވެ. އެކަމާ ގުޅޭ ގޮތުން ލެވަންޑޯސްކީ ބުނެފައިވަނީ މެސީ އަދި އާޖެންޓީނާ އަކީ މުބާރާތް ކާމިޔާބުކުރުމުގެ އެއް ފޭވަރިޓުން ކަމަށެވެ. އޭނާ ބުނެފައިވާ ގޮތުގައި މެސީ ކަހަލަ ހުނަރުވެރި މޮޅު ކުޅުންތެރިޔަކާ ދެކޮޅަށް ކުޅެން ޕޮލެންޑަށް އުނދަގޫ ވާނެ ކަމަށާއި، މެސީއާ ދެކޮޅަށް ކުޅެން ލިބުމަކީ ވެސް ރަނގަޅު ކަމެއް ކަމަށެވެ.
