ފީފާ ވޯލްޑް ކަޕްގެ ޓްރޮފީ މުބާރާތް ބާއްވާ ޤައުމު ޤަތަރަށް ގެންގޮސްފިއެވެ.
ޓްރޮފީ ޤަތަރަށް ގެންގޮސްފައިވަނީ އާދިއްތަ ދުވަހުގެ ވަގުތެއްގައެވެ. ޤަތަރަށް މުބާރާތުގެ ތަށި ގެންގޮސްފައިވަނީ މުބާރާތުގެ ކުރިން 51 ޤައުމަކަށް ތަށި ގެންދިޔުމަށް ފަހުއެވެ. ވޯލްޑް ކަޕްގެ ޓްރޮފީއާއެކު ޤަތަރަށް ދިޔައީ ފްރާންސްއާއެކު 1998 ވަނަ އަހަރުގެ ވޯލްޑް ކަޕް ކާމިޔާބުކުރި ސެންޓަ ބެކް މާސެލް ޑިސެއިލީއެވެ. ޤަތަރަށް ޓްރޮފީ ގެންދިޔުމަށްފަހު ވަނީ އާންމުންނަށް ޓްރޮފީ ދައްކާލުމުގެ އިވެންޓެއް ވެސް ބާއްވާފައެވެ.
އެކަމާ ގުޅޭ ގޮތުން ވާހަކަ ދައްކަމުން ޑިސެއިލީ ބުނީ ފާއިތުވި 12 އަހަރުގެ ތެރޭގައި ޤަތަރުން މުބާރަތަށް ވަރަށް ބޮޑަށް ތައްޔާރުވެއްޖެ ކަމަށެވެ. އެގޮތުން އޭނާ ވަނީ ޤަތަރުން ކުޅިވަރުގެ އިންފްރާސްޓްރަކްޗަރ އަށް ގެނައި ބަދަލު ފާހަގަކޮށްފައެވެ. އޭނާ ބުނީ ކުޅިވަރުގެ އެންމެ ބޮޑު މުބާރާތް ޤަތަރުގައި އޮތުމަކީ ވެސް ޚާއްސަ ކަމެއް ކަމަށެވެ.
މީގެ އިތުރުން އޭނާ ވަނީ ޤައުމުތަކުން ވަމުން އަންނަ ތައްޔާރީތަކުގެ ވާހަކަ ވެސް ދައްކާފައެވެ. އެގޮތުން މުބާރާތް ފެށެން މިހާރު ހަފްތާއެއްހާ ދުވަހަށް ވެފައިވާއިރު، ޓީމުތަކަށް ކުރިމަތިވާ ގޮންޖެހުމަށް ވެސް އަލިއަޅުވާލިއެވެ. އޭނާ ފާހަގަކުރީ އަނިޔާގެ މައްސަލަތެކެވެ. ޑިސެއިލީ ބުނީ ފްރާންސް ޓީމަށް ވެސް އަނިޔާގެ މައްސަލަތަކާ ކުރިމަތިވެފައިވާއިރު، ކޯޗަށް ބޮޑު ޕްރެޝަރެއް އޮންނާނެ ކަމަށެވެ. އެގޮތުން މެދުތެރެއިން އެންމެ ރަނގަޅަށް ކުޅޭ ކާންޓޭ އަށް މިފަހަރު ނުކުޅެވުނު ނަމަވެސް، ކޯޗު އެކަަމަށް ހައްލު ގެންނާނެ ކުޅުންތެރިން ހޯދާނެ ކަމަށް އޭނާ ބުންޏެވެ.
ޤަތަރުގައި މި މަހުގެ 20 ވަނަ ދުވަހު ފަށާ ފީފާ ވޯލްޑް ކަޕަކީ އަރަބި އިސްލާމީ ޤައުމެއްގައި މުބާރާތް ބާއްވާ ފުރަތަމަ ފަހަރެވެ. މި މަހުގެ 20 އިން އަންނަ ޑިސެމްބަރު މަހުގެ 19 ވަނަ ދުވަހާ ހަމައަށް ކުރިއަށްދާ މުބާރާތަށް ޤަތަރުން އަންނަނީ ވަރަށް ފުރިހަމަ އަށް ތައްޔާރުވަމުންނެވެ.
