ލާޒިއޯ ފަހަތަށް ޖައްސާލުމަށްފަހު ޔުވެންޓަސް ތިން ވަނަ އަށް

އިޓާލިއަން ލީގުގައި ލާޒިއޯ ބަލިކޮށް ޔުވެންޓަސް ތާވަލްގެ ތިން ވަނަ މަގާމަށް ޖެހިލައިފިއެވެ.

ޔުވެންޓަސްގެ ދަނޑުގައި ލާޒިއޯއާ ދެކޮޅަށް ނުކުތްއިރު އެ ޓީމު އޮތީ 28 ޕޮއިންޓާއެކު ހަތަރު ވަނައިގައެވެ. ލާޒިއޯ އޮތީ 30 ޕޮއިންޓާއެކު ތިން ވަނައިގައެވެ. އެހެންކަމުން ލާޒިއޯ ބަލިކޮށްގެން ޔުވެންޓަސް އަށް އޮތީ ކުރިއަށް ޖެހިލެވެންށެވެ. ޔުވެންޓަސް އިން ލާޒިއޯ ބަލިކުރީ 0-3 އިންނެވެ.

މެޗު ފަށައިގެން ވެސް ޔުވެންޓަސް އިން ވަނީ ރަނގަޅަށް ކުޅެފައެވެ. ފުރަތަމަ ހާފު ނިމެން ދެ މިނެޓަށްވެފައި ވަނިކޮށް ޔުވެންޓަސް އަށް ލީޑު ނަގައިދިނީ އެޑްރިއެން ރާބިއޮޓް ތަނަވަސްކޮށްދިން ފުރުސަތަކުން މޮއިސް ކީންއެވެ. ދެ ވަނަ ހާފަށް ނުކުމެ ޔުވެންޓަސްގެ ލީޑު އިތުރަށް ފުޅާކޮށްދިނީ ވެސް ކީންއެވެ. އެއީ 54 ވަނަ މިނެޓުގައެވެ. ޔުވެންޓަސްގެ ފަހު ލަނޑު މެޗުގެ 90 ވަނަ މިނެޓުގައި ޖެހީ މިލިކްއެވެ.

މެޗުން މޮޅުވެ ޔުވެންޓަސް ތިން ވަނަ އަށް ޖެހިލީ ކުޅުނު 15 މެޗުން 31 ޕޮއިންޓާއެކުއެވެ. ހަމަ އެ އަދަދަށް މެޗު ކުޅެގެން ލާޒިއޯ ހަތަރު ވަނައިގައި އޮތީ 30 ޕޮއިންޓާއެކުއެވެ. ޔުވެންޓަސްގެ މޮޅާއެކު އެ ޓީމުގެ ކޯޗަށް އޮތް ޕްރެޝަރު ކުޑަވާނެއެވެ.