ރޯމާ އާއި ޓޮރީނޯގެ ކުރިމަތިލުން އެއްވަރު، އަނެއްކާ ވެސް މޮރީނިއޯ އަށް ރަތް ކާޑެއް

އިޓާލިއަން ލީގުގައި ޓޮރީނޯއާ ދެކޮޅަށް ރޯމާ އިން ކުޅުނު މެޗު އެއްވަރުވީއިރު، އެ ޓީމުގެ ކޯޗު ހޯސޭ މޮރީނިއޯ އަށް އަނެއްކާ ވެސް ރަތް ކާޑެއް ދައްކައިފިއެވެ.

އާދިއްތަ ދުވަހުގެ ރޭ ރޯމާގެ އަމިއްލަ ދަނޑުގައި ކުޅުނު މެޗު އެއްވަރުވީ 1-1 އިންނެވެ.

މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ. ނަމަވެސް ފުރަތަމަ ހާފުގައި ވެސް ރޯމާ އިން ވަނީ ރަނގަޅަށް ކުޅެ، ލަނޑު ޖެހުމަށް މަސައްކަތްކޮށްފައެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ޓޮރީނޯ އިންނެވެ. އެއީ މެޗުގެ 55 ވަނަ މިނެޓުގައި ކަރޯލް ލިނެޓީ ޖެހި ލަނޑުންނެވެ. އޭނާ މި ލަނޑު ޖެހީ ވިލްފްރިޑް ސިންގެ އެހީތެރިކަމާއެކުއެވެ. މެޗުގެ ނިމެން މިނެޓަކަށްވެފައި ވަނިކޮށް ރޯމާގެ ކޯޗު މޮރީނިއޯ އަށް ވަނީ ސީދާ ރަތް ކާޑު ދައްކާ ދަނޑަން ފޮނުވާލާފައެވެ. އެއީ ތަކުރާރުކޮށް ރެފްރީގެ ނިންމުމާމެދު ހިތްހަމަ ނުޖެހުން ފާޅުކުރަން ފެށުމުންނެވެ.

ރޯމާ އަށް ވަނީ ނަތީޖާ ހަމަހަމަ ކުރުމަށް ރަނުގެ ފުރުސަތެއް ލިބިފައެވެ. ޓޮރީނޯގެ އޭރިޔާ ތެރެއިން ޕައުލޯ ޑިބާލާ އަށް ކުރި ފައުލަކާ ގުޅިގެން ރޯމާ އަށް ޕެނަލްޓީއެއް ލިބުނެވެ. ނަމަވެސް އެންޑްރިއާ ބެލޮޓީ ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއާއެވެ. ރޯމާ އިން ނަތީޖާ ހަމަހަމަ ކުރީ އިތުރު ވަގުތުގެ ވެސް ފަހު މިނެޓުގައެވެ. އެއީ ނެމަންޖާ މަޓިކް ޖެހި ލަނޑުންނެވެ.

މެޗު އެއްވަރުވެ ރޯމާ އޮތީ ތާވަލްގެ ހަތް ވަނައިގައެވެ. އެއީ ކުޅުނު 15 މެޗުން 27 ޕޮއިންޓާއެކުވެ. ހަމަ އެ އަދަދަށް މެޗު ކުޅެގެން 21 ޕޮއިންޓާއެކު ޓޮރީނޯ އޮތީ ނުވަ ވަނައިގައެވެ.