ދަނޑުވެރިން ހޭލުންތެރިކުރުވުމުގެ ވޯރކްޝޮޕެއް އއ. ތޮއްޑޫގައި ފަށައިފި
12 ނޮވެމްބަރު 2022 | ހޮނިހިރު 07:55މި ވޯރކްޝޮޕްގައި 20 ދަނޑުވެރިން ބައިވެރިވި
ދަނޑުވެރިން ހޭލުންތެރިކުރުވުމުގެ ވޯރކްޝޮޕް
ދަނޑުވެރިން ހޭލުންތެރިކުރުވުމުގެ ވޯރކްޝޮޕެއް، އއ. ތޮއްޑޫގައި ބުރާސްފަތި ދުވަހު ފަށައިފިއެވެ.
ފިޝަރީޒް މިނިސްޓްރީން ބުނީ މި ވޯރކްޝޮޕް ކުރިއަށްދާނީ ހޮނިހިރު ދުވަހުގެ ނިޔަލަށްކަމަށެވެ. މި ވޯރކްޝޮޕްގައި 20 ދަނޑުވެރިން ބައިވެރިވާކަމަށްވެސް ވަނީ ބުނެފައެވެ.
ރާއްޖެއެމްވީއަށް މައުލޫމާތުދެމުން ފިޝަރީޒް މިނިސްޓްރީން ބުނީ، މިއީ ސިލްސިލާކޮށް އެކި ރަށްރަށުގައި މިނިސްޓްރީގެ ފަރާތުން ކުރިއަށް ގެންދާ ވޯރކްޝޮޕްތަކެއް ކަމަށެވެ. އަދި ތޮއްޑޫފަދަ، ދަނޑުވެރިކަމަށް ބަރޯސާވެފައިވާ ރަށަކަށްވުމުން މި ރަށުގައި ބޮޑުކޮށް މި ވޯރކްޝޮޕް ކުރިއަށްދާނެކަމަށް މިނިސްޓްރީން ބުނެއެވެ.
ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުރުމަށް ކ. ކާށިދޫގައި ބޭއްވި ޖަލްސާގައި، ރާއްޖޭގެ ދަނޑުވެރިކަމުގެ ދާއިރާއަށް ޚިދުމަތްކޮށްފައިވާ ފަރާތްތަކުގެ އަގު ވަޒަންކުރުމުގެގޮތުން ސަރުކާރުން ވަނީ ހަނދާނީ ފިލާ ދީފައެވެ. މި ރަސްމިއްޔާތުގައި 9 ފަރާތަކަށް ވަނީ ޚިދުމަތުގެ އަގުވަޒަން ކުރުމުގެ އިނާމު ދީފައެވެ. މީގެ ތެރޭގައި އެމްއައި ކޮލެޖާއި 4 ކުންފުންޏާއި އަމިއްލަ 4 ފަރުދުން ހިމެނެއެވެ.
