މި ހިނގާ ނޮވެމްބަރު މަހުގެ ފުރަތަމަ 9 ދުވަހުގެ ތެރޭގައި 43،687 ފަތުރުވެރިން ރާއްޖެއަތުވެއްޖެއެވެ.

ޓޫރިޒަމް މިނިސްޓްރީން އާންމުކޮށްފައިވާ ރާއްޖޭގެ ފަތުރުވެރިކަމުގެ ތަފާސްހިސާބުތައް ދައްކާގޮތުން، މި މަހުގެ މިހާތަނަށް އައި ފަތުރުވެރިންގެ އަދަދަކީ ފާއިތުވި ތިން އަހަރާ އަޅައިބަލާއިރުވެސް އިތުރު އަދަދެކެވެ. މިގޮތުން 2021 ވަނަ އަހަރުގެ މި މުއްދަތުގައި އައިސްފައިވަނީ 42،996 ފަތުރުވެރިންނެވެ. 2019 ވަނަ އަހަރު އައިސްފައިވަނީ 39،589 ފަތުރުވެރިންނެވެ. މި އަދަދާ އަޅައިބަލާއިރު މިއަހަރުގެ މި މުއްދަތުގައި އައި ފަތުރުވެރިންގެ އަދަދު 10.4 އިންސައްތަ އިތުރެވެ.

އަހަރުގެ މިހާތަނަށް 1،388،044 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުން ހާމަކުރެއެވެ. މިއީ ފާއިތުވި އަހަރުގެ މި މުއްދަތުގައި އައި ފަތުރުވެރިންނަށްވުރެ 31.5 އިންސައްތަ އިތުރު އަދަދެކެވެ. އެހެންނަމަވެސް 2019 ވަނަ އަހަރު އައި ފަތުރުވެރިންނާ އަޅައިބަލާއިރު 3.2 އިންސައްތަ ދަށް އަދަދެކެވެ.

އަހަރުގެ މިހާތަނަށް ދުވާލަކު އެވްރެޖުގޮތެއްގައި 4،435 ފަތުރުވެރިން އަންނަކަމަށް ވަނީ ރެކޯޑުކޮށްފައެވެ. އަހަރުގެ މިހާތަނަށް އެންމެ ގިނަ ފަތުރުވެރިން އައިސްފައިވަނީ އިންޑިއާ މާކެޓުންނެވެ. އެ މާކެޓުން މިހާތަނަށް 195،015 ފަތުރުވެރިން އައިސްފައިވެއެވެ. ދެވަނައިގައި އޮތް ރަޝިއާ މާކެޓުން މިހާތަނަށް 170،821 ފަތުރުވެރިން އައިސްފައިވާއިރު، އިނގިރޭސިވިލާތް އޮތީ ތިންވަނައިގައެވެ. އެ މާކެޓުން 151،358 ފަތުރުވެރިން ވަނީ އައިސްފައެވެ. މީގެ އިތުރުން އެންމެ ގިނަ ފަތުރުވެރިން އަންނަ 10 ގައުމުގެ ތެރޭގައި ހިމެނެނީ ޖަރުމަނު، އިޓަލީ، އެމެރިކާ، ފްރާންސް، ސްޕެއިން، ސައޫދީ އަރަބިއްޔާ އަދި ސްވިޒަރލޭންޑެވެ.

އަހަރުގެ މިހާތަނަށް ރާއްޖެ އައި ފަތުރުވެރިން 1.4 މިލިއަނާ ގާތްކޮށްފައިވާއިރު، އަހަރު ނިމުމުގެ ކުރިން 1.6 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. މި އަމާޒަށް ވާސިލްވެވޭނެކަމުގެ ޔަގީންކަން ސަރުކާރުން ވަނީ ދީފައެވެ.

ކޮވިޑް-19އަށްފަހު ރާއްޖެއިން ފަތުރުވެރިކަމުގެ ރިކަވަރީއާ ދިމާލަށް މިސްރާބު ޖަހާފައިވާއިރު، ރާއްޖެއިން ވަނީ މިއަހަރުވެސް ވޯލްޑް ލީޑިން ޑެސްޓިނޭޝަންގެ އެވޯޑު ކާމިޔާބުކޮށްފައެވެ. ރާއްޖެއިން މިވަނީ މި އެވޯޑު ޖެހިޖެހިގެން ތިންވަނަ ފަހަރަށް ކާމިޔާބުކޮށްފައެވެ.