ރަޖީވް ގާންދީ އަވަހާރަކޮށްލުމުގައި ބައިވެރިވި 6 މީހުން ސުޕްރީމް ކޯޓުން ދޫކޮށްލައިފި

އިންޑިޔާގެ ކުރީގެ ބޮޑުވަޒީރު ރަޖީވް ގާންދީ އަވަހާރަކޮށްލުމުގައި ބައިވެރިވިކަމުގެ ކުށް ސާބިތުވެ، އުމުރު ދުވަހުގެ ޖަލު ހުކުމް ތަންފީޒު ކުރަމުން އައި 6 މީހުން އެގައުމުގެ ސުޕްރީމް ކޯޓުން ހުކުރު ދުވަހު ދޫކޮށްލައިފިއެވެ.

ސުޕްރީމް ކޯޓުން ބުނެފައިވާ ގޮތުގައި މި 6 މީހުންނާ އެއްހުކުމެއް ތަންފީޒު ކުރަމުން އައިސްފައިވާ މީހަކު މިއަހަރުގެ މޭމަހު ދޫކޮށްލާފައިވާތީއާއި އަދި އެމީހުން 30 އަހަރު ޖަލުގައި ހޭދަކޮށްފައިވުމާއެކު، އެހެން މައްސަލައެއްގައި ހައްޔަރުގައި ބައިތިއްބަން ނުޖެހޭހާ ހިނދަކު އެމީހުން މިނިވަން ކުރާކަމަށެވެ.  

ރަޖީވް ގާންދީ އަވަހާރަ ކޮށްލުމުގެ ކުށް ސާބިތުވެ، އުމުރު ދުވަހުގެ ޖަލު ހުކުމެއް ތަންފީޒު ކުރަމުން އައި މީހެއްކަމަށްވާ ޕެރާރިވަލަން މިއަހަރުގެ މޭމަހުގެ 18 ވަނަ ދުވަހު ވަނީ ސުޕްރީމް ކޯޓުން ދޫކޮށްލާފައެވެ. އޭނާ ޖަލުގައި ހޭދަކުރި ތިރީހަކަށް އަހަރުގެ ތެރޭގައި ވަނީ އުޅުމާ އަޚްލާގަށް ބޮޑެތި ބަދަލު ތަކެއް ގެނެސް، ކިޔަވައި އެތައް ސެޓްފިކެޓްތަކެއްވެސް ހާސިލްކޮށްފައެވެ.

ރަޖީވް ގާންދީ އަވަހާރަކޮށްލީ އިލެކްޝަން ރެލީ އެއްގައި ޓެމިލްނާޑޫއަށް ވަޑައިގެން އުޅުއްވަނިކޮށް، 21 މޭ 1991 ގައެވެ. އެއީ މީހަކު އަމިއްލައަށް މަރުވެގެން ދިން ބޮމުގެ ހަމަލާއެއްގައެވެ. ގައިގައި ބޮން ހަރުކޮށްގެން މަރުވެފައިވަނީ ދާނޫ ނަމަކަށްކިޔާ ތަމަޅަ އަންހެނެކެވެ.    

މިހަމަލާގައި ކުށް ސާބިތުވި 4 މީހަކަށް މަރުގެ ހުކުމް އިއްވުނެވެ. ނަމަވެސް އަހަރުތަކެއް ފަހުން ވަނީ އުމުރު ދުވަހުގެ ޖަލު ހުކުމަކަށް ބަދަލު ކޮށްފައެވެ.