އަލިފާނުގެ ހާދިސާގައި އެނދި ގެ ތަޅާލައި، ސާފުކުރުމުގެ މަސައްކަތް ފަށައިފި

ބުދަ ދުވަހުގެ ރޭ ހިނގި އަލިފާނުގެ ހާދިސާގައި އެނދި، މ. ނިރުފެހިގެ ތަޅާލައި ސާފުކުރުމުގެ މަސައްކަތް ފަށައިފިއެވެ.

މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ބުނީ، މި މަސައްކަތް މިނިސްޓްރީގެ ޕަބްލިކް ވަރކްސް ސަރވިސަސް ޑިޕާޓްމަންޓުން ކުރަމުންދާ ކަމަށެވެ. މިނިސްޓްރީގެ ޕަބްލިކް ވޯކްސް ޑިޕާޓްމަންޓުން އެ ސަރަހައްދަށް ގޮސް، ދަގަނޑުތައް ނަގައި، ގަރާޖު ތެރޭގައި އަނދައި ހުލިވެފައި ހުރި ވެހިކަލްތައްވެސް އެ ސަރަހައްދުން ނެރުމުގެ މަސައްކަތް ވަނީ ކުރިއަށް ގެންގޮސްފައެވެ.

Advertisement

މި މަސައްކަތް މިނިސްޓްރީން ކުރަމުންދާތީ، ރާއްޖެއެމްވީން ސުވާލުކުރުމުން ފުލުހުން ބުނީ، މި ހާދިސާގެ ތަހުގީގު އަދިވެސް ކުރިއަށްދާ ކަމަށެވެ. އަދި އެތަނުގައި ކުރިއަށްދާ މަސައްކަތްތަކަކީ ފުލުހުންގެ ބެލުމުގެ ދަށުން ކުރަމުންދާ މަސައްކަތްތައް ކަމަށާއި، ތަން ސާފުކުރުމުގައި ސިޓީ ކައުންސިލާއި ޕްލޭނިންގ މިނިސްޓްރީން އެހީތެރިކަން ފޯރުކޮށްދެމުންދާ ކަމަށެވެ.

މި ހާދިސާގައި 10 މީހުން މަރުވެފައިވެއެވެ. މި މީހުންގެ ތެރެއިން 9 މީހުންގެ ހަށިގަނޑު ވަނީ ދެނެގަނެވިފައެވެ. އެއީ އިންޑިއާގެ 3 އަންހެނުންނާއި 4 ފިރިހެނުންނާއި، ބަންގްލަދޭޝްގެ އަންހެނަކާއި 1 ފިރިހެނެކެވެ. އަދި ކާކުކަން އަދި ދެނެގަނެވިފައިނުވާ ފިރިހެނަކު ހިމެނޭކަމަށް ފުލުހުން ބުނެފައިވެއެވެ.

އަލިފާނުގެ ހާދިސާގައި ހާލުގައި ޖެހުނު ފަރާތްތަކަށް އެހީވުމަށް މިހާތަނަށް 90،000އަށްވުރެ ގިނަ ރުފިޔާ ޚަރަދުވެފައިވާ ކަމަށް ނޭޝަނަލް ޑިޒާސްޓަރ މެނޭޖެމަންޓް އޮތޯރިޓީ (އެންޑީއެމްއޭ)އިން ވަނީ ބުނެފައެވެ.

އެ އިދާރާއިން ބުރާސްފަތި ދުވަހު ނެރުނު އަދާހަމަ ރިޕޯޓުގައި ބުނެފައިވަނީ، ހާދިސާގެ މައުލޫމާތު ބުދަ ދުވަހުގެ ރޭ ދަންވަރު 12:44ގައި ލިބުމާއެކު އެ އޮތޯރިޓީގެ އިމަރޖެންސީ ރެސްޕޮންސް ޓީމުން ހާދިސާ ހިނގި ސަރަހައްދަށް ގޮސް ހަރަކާތްތެރިވެފައިވާ ކަމަށެވެ. އަދި މި ހާދިސާގައި ހާލުގައި ޖެހުނު ފަރާތްތަކަށް އެހީވުމަށް މާފަންނު ސްޓޭޑިއަމްގައި އިވެކުއޭޝަން ސެންޓަރެއް ގާއިމުކޮށް، ބެކަޕެއްގެ ގޮތުގައި ކަލާފާނު ސްކޫލްވެސް ތައްޔާރު ކުރެވުނު ކަމަށާއި، އެ ހާދިސާއާ ގުޅިގެން ހަތަރު އިމާރާތަކުން 35 ދިވެހިންނާއި (ހާދިސާ ހިނގި އިމާރާތުން ސަލާމަތް ކުރެވުނު 28 ބިދޭސީން ހިމެނޭހެން) 33 ބިދޭސީން ރަޖިސްޓްރީކުރި ކަމަށެވެ.

ހާލުގައި ޖެހުނު ފަރާތްތަކުގެ ތެރޭގައި 7 ކުޑަކުދިންވެސް ހިމެނޭ ކަމަށް އެންޑީއެމްއޭއިން ބުނެއެވެ.

އެ އިދާރާއިން ބުނީ، ހާދިސާ ހިނގީ ދަންވަރުގެ ވަގުތެއްގައިކަމުން ގިނަ އާއިލާތަކުން އާއިލީ އަދި ރައްޓެހިންގެ ގޭގެއަށް ބަދަލުވިކަމަށެވެ. ނަމަވެސް އެ އާއިލާތަކުގެ ކަންކަން ގާތުން ބަލަމުން އައިކަމަށާއި، އެ ފަރާތްތަކަށް ބޭނުންވާ ޒަރޫރީ އެހީތެރިކަމާއި ކެއިންބުއިމާއި ބޭހާއި ބޯހިޔާވަހިކަމާއި އަދި އަންނައުނު ފޯރުކޮށްދީފައިވާ ކަމަށް ވެސް އެ އިދާރާއިން ބުނެއެވެ.

މި ހާދިސާއާ ގުޅިގެން ލިބުނު ގެއްލުންތަކުގެ ސަބަބުން ދިރިއުޅުން ރައްކާތެރި ނޫންކަމަށް ފާހަގަކުރި 6 ގޭބިސީއެއްގެ 29 މީހަކަށް 5 ގެސްޓްހައުސްއެއްގައި ވަގުތީ ބޯހިޔާވަހިކަން ފޯރުކޮށްދެމުން އަންނައިރު، 15 ދިވެހިންނާއި 14 ބިދޭސީއަކަށް އެންޑީއެމްއޭއިން އަންނަނީ ވަގުތީ ބޯހިޔާވަހިކަން ފޯރުކޮށްދެމުންނެވެ. މީގެ ތެރޭގައި ދިވެހި 6 ކުޑަކުދިން ވެސް ހިމެނެއެވެ.

މި ހާދިސާއާ ގުޅިގެން ބޯހިޔާވަހިކަން ގެއްލުނު 19 ބިދޭސީއަކަށް އެ ފަރާތްތަކުގެ ބަލަދުވެރިން ބޯހިޔާވަހިކަން ފޯރުކޮށްދީފައިވާ ކަމަށްވެސް އެންޑީއެމްއޭއިން ބުނެއެވެ.

ހާލުގައި ޖެހުނު ފަރާތްތަކަށް އިންސާނީ އެހީގެ ގޮތުގައި ފުރަތަމަ ފިޔަވަހީގެ ދަށުން ފަސް ދުވަހުގެ އެހީތެރިކަން މިހާރު ވަނީ ފޯރުކޮށްދީފައެވެ. އެގޮތުން، ބޯހިޔާވަހިކަމަށް 33،500 ރުފިޔާ ހޭދަ ކޮށްފައިވާއިރު، އަންނައުނަށް 19،000 ރުފިޔާ، ކެއިން ބުއިމަށް 29،000 ރުފިޔާ، އަދި ހައިޖީން ކިޓު ހޯދުމާއި، އޮޕަރޭޝަނަލް ޚަރަދުގެ ގޮތުގައި 2،633 ރުފިޔާ ހިމެނޭހެން ޖުމްލަ 90،133 ރުފިޔާ ވަނީ ޚަރަދުކޮށްފައެވެ.

މީގެ އިތުރުން ނަފްސާނީ ފުރަތަމަ އެހީ ބޭނުންވާ ފަރާތްތައް ދެނެގަނެ އެ ފަރާތްތަކަށް ދިވެހި ރެޑް ކްރެސެންޓާއި ޖެންޑަރ މިނިސްޓްރީގެ އެހީތެރިކަމާއެކު ނަފްސާނީ އެހީތެރިކަން ފޯރުކޮށްދެމުން އަންނަ ކަމަށްވެސް އެންޑީއެމްއޭއިން ބުނެއެވެ.

އެންޑީއެމްއޭއިން އަންނަނީ އަލިފާނުގެ ހާދިސާގެ އަސަރުކޮށްފައިވާ ގޭގޭގެ ޑެމޭޖް އެސެސްމަންޓް ހެދުމުގެ މަސައްކަތް ވެސް ކުރަމުންނެވެ.