އަލިފާނުގެ ހާދިސާގައި ނިޔާވި 9 މީހެއްގެ ހަށިގަނޑު ދެނެގަނެފި
10 ބިދޭސީން ވަނީ ނިޔާވެފައި
ނިރުފެހިގޭގައި ހިނގި އަލިފާނުގެ ޙާދިސާގައި މަރުވި މީހަކު އިމާރާތުން ނެރެނީ
ބުދަ ދުވަހުގެރޭ މ. ނިރުފެހިގޭގައި ހިނގި އަލިފާނުގެ ހާދިސާގައި ނިޔާވި މީހުންގެ ތެރެއިން 9 މީހެއްގެ ހަށިގަނޑު ދެނެގަނެވިފައިވާކަމަށް ފުލުހުން ބުނެފިއެވެ.
މި އަލިފާނުގެ ހާދިސާ ހިނގާފައިވަނީ ބިދޭސީންތަކެއް ދިރިއުޅެމުންދިޔަ ތަނެއްގައެވެ. މި ހާދިސާގައި 10 ބިދޭސީން ވަނީ ނިޔާވެފައެވެ.
ފުލުހުން ބުނީ މި 10 މީހުންގެ ތެރެއިން 9 މީހުންނަކީ ކޮން ބައެއްކަން ދެނެގަނެވިފައިވާކަމަށެވެ. މި ނުވަ މީހުންގެ ތެރޭގައި ހިމެނެނީ އިންޑިއާގެ 3 އަންހެނުންނާއި، އިންޑިއާގެ 4 ފިރިހެނުންނާއި، ބަންގްލަދޭޝްގެ 1 އަންހެނަކާއި، ބަންގްލަދޭޝްގެ 1 ފިރިހެނެކެވެ. ކާކުކަން ދެނެގަނެވިފައިނުވާ 1 ފިރިހެނަކު ހިމެނޭކަމަށް ފުލުހުން ބުނެފައިވެއެވެ.
މި މައްސަލައިގެ ތަހުގީގު ފުލުހުން ގެންދަނީ ކުރަމުންނެވެ.
މި ހާދިސާއާ ގުޅިގެން ގިނަ ބަޔަކު ހާލުގައި ޖެހިފައިވެއެވެ. މިގޮތުން މި ހާދިސާ ހިނގި އިމާރާތުން ސަލާމަތްކުރި 28 ބިދޭސީންނާއި، ހާދިސާ ހިނގި ސަރަހައްދުގެ 4 އިމާރާތެއްގައި ދިރިއުޅެމުންދިޔަ 35 ދިވެހިންނާއި، އަދިވެސް އިތުރު ބިދޭސީންތަކެއް ހިމެނެއެވެ. މިމީހުންނަށް ދޭންޖެހޭ ސަޕޯޓު ނޭޝަނަލް ޑިޒާސްޓަރ މެނޭޖެމަންޓް އޮތޯރިޓީ (އެންޑީއެމްއޭ) އިން ދަނީ ދެމުންނެވެ.
