އަލިފާނުގެ ހާދިސާގައި އިންޑިއާގެ 7 މީހުން މަރުވި: ހައި ކޮމިޝަން
11 ނޮވެމްބަރު 2022 | ހުކުރު 02:07ހައި ކޮމިޝަނަރު ވަނީ ވަގުތީ ހިޔާތަކުގައި ތިބި އިންޑިއާ ރައްޔިތުންނާ ބައްދަލުކުރައްވާފައި
މ ނިރުފެހިގޭގައި ހިނގި އަލިފާނުގެ ޙާދިސާ
ބުދަ ދުވަހުގެ ރޭ ހިނގި އަލިފާނުގެ ހާދިސާގައި އިންޑިއާގެ ހަތް މީހަކު މަރުވެފައިވާ ކަމަށް ރާއްޖޭގައި ހުންނަ އިންޑިއާ ހައިކޮމިޝަނުން ބުނެފިއެވެ.
އެ ކޮމިޝަނުން މިކަން ހާމަކޮށްފައިވަނީ ބުރާސްފަތި ދުވަހުގެ ރޭ ކުރި ޓްވީޓެއްގައެވެ. އެ ޓްވީޓުގައި ބުުނެފައިވާ ގޮތުގައި ރާއްޖޭގެ ކަމާ ގުޅުންހުރި އިދާރާތަކުން އެ ކޮމިޝަނަށް މައުލޫމާތު ދީފައިވާ ގޮތުގައި ހާދިސާގައި މިހާތަނަށް މަރުވި މީހުންގެ ތެރޭގައި ހަތް މީހުންނަކީ އިންޑިއާގެ ރައްޔިތުންނެވެ. އަދި މަރުވި މީހުންގެ ތެރެއިން އެކަކުގެ މައުލޫމާތު މިހާތަނަށް ލިބިފައި ނުވާ ކަމަށާއި މަރުވެފައިވާ އިންޑިއާގެ ހަތް މީހުންގެ އާއިލާގެ މީހުންނާ އެމްބަސީގެ ފަރާތުން ވާހަކަދައްކަމުން އަންނަ ކަމަށް ވެސް ވަނީ ބުނެފައެވެ.
އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު މުނޫ މަހާވަރު ވަނީ ވަގުތީ ހިޔާތަކުގައި ތިބި އިންޑިއާ ރައްޔިތުންނާ ބުރާސްފަތި ދުވަހުގެ ރޭ ބައްދަލުކުރައްވައިފައެވެ. އެ މީހުންނަށް ބޭނުންވާ ހުރިހާ އެހީތެރިކަމެއް ކޮމިޝަނުގެ ފަރާތުން ލިބިގެންދާނެކަމުގެ ޔަގީންކަން ވެސް އެމްބަސީން ދެއެވެ.
ބުދަ ދުވަހުގެ ރޭ ދަންވަރު 12:30 ހާއިރު އަލުފާނުގެ ހާދިސާއެއް ހިނގާފައިވަނީ މ. ނިރުފެހި ގޭގައެވެ. އެ ގޭގެ ތިރީގައި ގަރާޖެއް ހުރިއިރު މަތީ ދެ ފަންގިފިލާގައި ބިދޭސީންތަކެއް އައީ ދިރިއުޅެމުންނެވެ. މީގެ ތެރެއިން މިހާތަނަށް ދިހަ މީހަކު މަރުވެފައިވާ ކަމަށް ފުލުހުން ވަނީ ބުނެފައެވެ.
މަރުވެފައިވާ މީހުންގެ މައުލޫމާތު ހޯދުމަށް ފުލުހުން ދަނީ މަސައްކަތް ކުރަމުންނެވެ. އަދި އަލިފާނުގެ ހާދިސާ ހިނގި ގޮތް ތަހުގީގު ކުރުމުގެ މަސައްކަތް ވެސް ދަނީ ކުރަމުންނެވެ.
