އަރަބިއްޔާގެ ބެލެނިވެރިންގެ ޝަކުވާތައް މިނިސްޓަރު އައްސަވައިފި

އަރަބިއްޔާ ސްކޫލާމެދު އެޑިއުކޭޝަން މިނިސްޓްރީން ތަފާތުކުރާކަމަށް ބުނެ އެ ސްކޫލްގެ ބައެއް ބެލެނިވެރިން ކަންބޮޑުވުން ފާޅުކުރަމުން ދަނިކޮށް، އެޑިއުކޭޝަން މިނިސްޓަރު ޑރ. އާއިޝަތު އަލީ އެ ސްކޫލްގެ ބައެެއް ބެލެނިވެރިންނާ ބައްދަލުކުރައްވައިފިއެވެ.

އެޑިއުކޭޝަން މިނިސްޓްރީން ކުރި ޓްވީޓެއްގައި ބުނީ، އަރަބިއްޔާގެ ބެލެނިވެރިންނާއެކު މިނިސްޓަރު ބޭއްވި ބައްދަލުވުމުގައި އެ ބެލެނިވެރިންގެ ކަންބޮޑުވުންތައް އަޑުއެއްސެވިކަމަށެވެ. އެ ސްކޫލްގެ އައު އިމާރާތާގުޅޭ މައުލޫމާތު ބެލެނިވެރިންނަށް މިނިސްޓަރު ދެއްވިކަމަށްވެސް މިނިސްޓްރީން ބުނެއެވެ.

އަރަބިއްޔާ ސްކޫލުގެ ހިންގުން އިސްކަންދަރު ސްކޫލުގެ ޕްރިންސިޕަލާ ހަވާލުކުރުމާމެދު ނުރުހުން ފާޅުކޮށް އެ ސުކޫލުގެ ބެލެނިވެރިންތަކެއް ވަނީ އިހުތިޖާޖުކޮށްފައެވެ. އަރަބިއްޔާ ސްކޫލުގައި ހުންނެވި ޕްރިންސިޕަލް މުހައްމަދު ޝުޖާއު އަބްދުއްރަހީމް އެންއައިއީއަށް ބަދަލުކޮށް، އިދާރީގޮތުން ގެނެވުނު ބަދަލެއްގެގޮތުން، 7 ނޮވެންބަރުން ފެށިގެން އެ ސްކޫލުގެ ހިންގުން އިސްކަންދަރު ސްކޫލުގެ ޕްރިންސިޕަލް ހުސައިން ސައީދުއާ ހަވާލުކޮށްފައިވާތީ، އެކަމާ ބެލެނިވެރިން ވަނީ ނުރުހުން ފާޅުކޮށްފައެވެ. އެގޮތުން ކުރިން ހުންނެވިގޮތަށް ޝުޖާއު އަބްދުއްރަހީމް އެ މަގާމުގައި ބެހެއްޓެވުމަށް ބެލެނިވެރިން ވަނީ ގޮވާލާފައެވެ.

އެޑިއުކޭޝަން މިނިސްޓްރީން މައުލޫމާތުދޭގޮތުގައި ސުކޫލުގެ ހިންގުން ބަދަލުކުރީ އަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް، ދަރިވަރުންނަށް އެންމެ ފަހިގޮތަށް ކަންކަން ރާވައި އިންތިޒާމުކުރުމަށްޓަކައެވެ.

އަރަބިއްޔާ ސްކޫލްގެ އިމާރާތުގައި ރެނދުލައި، ބޭނުންނުކުރެވޭވަރަަށް ހަލާކުވުމުން އެ ސްކޫލް ވަގުތީގޮތުން ހިންގަނީ ފޮރިން މިނިސްޓްރީ ވަގުތީގޮތުން ހިންގަން ހެދި އިމާރާތުގައެވެ. އެ ސްކޫލްގެ އައު އިމާރާތް އެޅުމުގެ މަސައްކަތް ޖަމާލުއްދީނުގެ ބާ އިމާރާތް ހުރި ބިމުގައި އަންނަނީ ކުރަމުންނެވެ.

އަރަބިއްޔާގެ ބެލެނިވެރިން ކަންބޮޑުވުން ފާޅުކުރަމުން އަންނަނީ ޖަމާލުއްދީން ސްކޫލްގެ ބާ އިމާރާތް ހުރި ބިމުން ބައެއްގައި ޖަމާލުއްދީން ސްކޫލްގެ އިމާރާތެއްވެސް އަޅަން ނިންމުމުންނެވެ. އެޑިއުކޭޝަން މިނިސްޓްރީން ބުނަމުން އަންނަނީ އެ ބިމުން ޖަމާލުއްދީން ސްކޫލަށް ބައެއް ދިނަސް އަރަބިއްޔާގެ ޖާގަ ކުޑަނުވާނެ ކަމަށެވެ. އަރަބިއްޔާގެ ޖާގަ ދެގުނަ ބޮޑުވާނެކަމަށް އެޑިޔުކޭޝަން މިނިސްޓްރީން އަންނަނީ ބުނަމުންނެވެ.