ބޮޑެތި މައްސަލަތައް ތަހުގީކުރުމަށް ލިބޭ މުއްދަތު އިތުރުކުރެވޭ އިސްލާހު ފާސްކޮށްފި
ބޮޑެތި މައްސަލަތަކުގައި ތަހުގީގުކުރުމަށް ފުލުހުންނަށް ގިނަވެގެން ލިބެނީ 75 ދުވަސް
ފުލުހުން
ޖިނާއީ ބޮޑެތި މައްސަލަތައް ތަހުގީކުރުމަށް ފުލުހުންނަށް ލިބޭ މުއްދަތު ތިން މަސް ދުވަހަށް އިތުރުކުރެވޭ ގޮތަށް ސަރުކާރުން ހުށަހަޅާފައިވާ އިސްލާހު ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރުގެ ފަރާތުން ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ހުށަހެޅުއްވި އެ އިސްލާހަށް ޖުޑީޝަރީ ކޮމިޓީން ވަނީ އިސްލާހު ގެނެސްފައެވެ. ކޮމިޓީ އިން ގެނައި އިސްލާހުތަކާ އެކު ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް ފާސްކޮށްފައި ވަނީ، ހޯމަ ދުވަހުގެ ޖަލްސާގައި 56 މެންބަރުންގެ ވޯޓާއި އެކުގައެވެ.
މިހާރު ގާނޫނު އޮތް ގޮތަށް ބަލާ ނަމަ ޓެރަރިޒަމް މައްސަލަތައް ފިޔަވައި ޖިނާއީ ބޮޑެތި މައްސަލަތަކުގައި ތަހުގީގުކުރުމަށް ފުލުހުންނަށް ގިނަވެގެން ލިބެނީ 75 ދުވަހެވެ. ޓެރަރިޒަމް މަނާކުރުމުގެ ގާނޫނު މިހާރު އޮތްގޮތުން އެ ގާނޫނުގެ ދަށުން ހައްޔަރު ކުރާ މީހުންގެ މައްސަލަތައް ތަހުގީގު ކުރުމަށް ގިނަ ވެގެން 90 ދުވަސް ލިބެއެވެ.
މީގެ ކުރިން ޖިނާއީ އިޖުރާއަތުގެ ގާނޫނު އޮންނަ ގޮތުން މައްސަލައެއްގައި މީހަކު ބަންދުކުރާތާ 30 ދުވަހުގެ ތެރޭގައި އެ މައްސަލައެއްގެ ތަހުގީގު ނިންމާ އެ މައްސަލަ ޕީޖީ އޮފީހަށް ފޮނުވަން ޖެހެއެެވެ. އަދިި ތުހުމަތުކުރެވޭ ކުށަކީ ޖިނާއީ ބޮޑު ކުށަކަށް ވެފައި، އެ މައްސަލައިގެ ބާވަތުން މައްސަލައިގެ ތަހުގީގު 30 ދުވަހުގެ ތެރޭގައި ފުރިހަމަ ނުކުރެވޭ ނަމަ، ތަހުގީގުގެ މުއްދަތު ގިނަވެގެން އިތުރު 45 ދުވަހަށް އިތުރުކޮށްދިނުމުގެ ބާރު ޕީޖީއަށް އޮވެއެވެ.
ތަހުގީގުގެ މުއްދަތު 60 ދުވަހަށް އިތުރުކުރުމަށް ސަރުކާރުން ހުށަހެޅި އިސްލާހު މަޖިލީހުގެ ޖުޑީޝަރީ ކޮމިޓީން ވަނީ ހަމައެގޮތަށް ފާސްކޮށްފައެވެ. އެގޮތަށް މުއްދަތު އިތުރުކޮށްދޭ އިރު މުއްދަތު އިތުރުކޮށްދެވޭނީ ފަހަރަކު 15 ދުވަހަށް ވުރެ ދިގުނުވާނެ ގޮތަށް ކަމަށް ކޮމިޓީ އިން ވަނީ ކަނޑައަޅާފައެވެ.
