ދެ ރަށެއްގައި ކުޅިވަރު ވަސީލަތްތައް ގާއިމުކުރުމަށް ހަވާލުކޮށްފި

ދެރަށެއްގައި ކުޅިވަރު ވަސީލަތްތައް ގާއިމުކުރުމަށާއި، ހުޅުމާލޭ ހަތަރު ނަންބަރު ފުޓްސަލް ދަނޑުގެ ޓާފް ބަދަލުކުރުމުގެ މަސައްކަތް ކޮންޓްރެކްޓަރުންނާ ހަވާލުކޮށްފިއެވެ.

މިގޮތުން މުލަކަތޮޅު ރަތްމަންދޫ ފުޓްސަލް ދަނޑު ތަރައްގީކުރުމުގެ މަސައްކަތް ހަވާލުކޮށްފައިވަނީ ނެގާއި އިންވެސްޓްމެންޓާއެވެ. މި މަސައްކަތް ހަވާލުކުރީ 50 ދުވަހުގެތެރޭގައި ނިންމާގޮތަށް، 1،468،887.59 ރުފިޔާއަށެވެ. އެއްބަސްވުމުގައި ނެގާއި އިންވެސްޓްމެންޓުގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އިސްމާއީލް ލަތީފެވެ. މިނިސްޓްރީގެ ފަރާތުން ސޮއިކުރެއްވީ އެގްޒެކެޓިވް ޑިރެކްޓަރ ހައްވާ ނަހުލާއެވެ.

މީގެ އިތުރުން ހުވަދު އަތޮޅު އުތުރުބުރީ ގެމަނަފުށީ ޔޫތު އެންޑް ކޮމިއުނިޓީ ސެންޓަރު ތަރައްގީކުރުމުގެ މަސައްކަތް ވަނީ ލައިކަންސް އިންވެސްޓްމެންޓާ ހަވާލުކޮށްފައެވެ. ޖުމްލަ 4،461،159.84 ރުފިޔާ ޚަރަދުވާ މި މަސައްކަތް އެކުންފުންޏާ ހަވާލުކުރީ 120 ދުވަހުގެތެރޭގައި ނިންމާ ގޮތަށެވެ. އެއްބަސްވުމުގައި ލައިކަންސްގެ ފަރާތުން ސޮއިކުރެއްވީ އެކުންފުނީގެ ވެރިފަރާތް، އަބްދުﷲ ކަލީމްއެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ސީނިއަރ އެގްޒެކެޓިވް ޑިރެކްޓަރ އިސްމާއީލް ރައޫފެވެ.

ހުޅުމާލޭ ހަތަރު ނަންބަރު ފުޓްސަލް ދަނޑުގެ ޓާފް ބަދަލުކުރުމުގެ މަސައްކަތް ހަވާލުކުރީ ނެގާއި އިންވެސްޓްމެންޓާއެވެ. މި މަސައްކަތް އެކުންފުންޏާ ހަވާލުކުރީ 14 ދުވަހުގެ ތެރޭ ނިންމާގޮތަށް، 1،143،019.20 ރުފިޔާގެ އަގަކަށެވެ. މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސީނިއަރ އެގްޒެކެޓިވް ޑިރެކްޓަރ އަހުމަދު ޝަޒީންއެވެ. ނެގާއި އިންވެސްޓްމެންޓުގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އިސްމާއީލް ލަތީފެވެ.