ތަޣައްޔަރުކަމާ އެކު އިންޑިއާގެ ޢިލްމީ ފަޒާ ބަނަވެއްޖެ

މޫސުމީ ނޭދެވޭ ބަދަލުތަކުގެ ވާހަކައަކީ، ދައްކާ ވާހަކައިގެ އަޑުފަށްގަނޑާ އަޅާ ބަލާއިރު، އަމަލީ ގޮތުން މަސައްކަތްކޮށް، އަދާ ޖެހުނުއިރުވެސް ފުރިހަމަ ހައްލެއް ހޯދިފައި ނުވާ ބޮޑު މައްސަލައެކެވެ. ތިމާވެއްޓަށް ފަރުވާ ކުޑަކޮށް، ވެއްޓަށް ގެއްލުން ދެނިވި އަމަލުތައް ހިންގުމުގެ ސަބަބުން، އެކަމުގެ ގެއްލުން ފޯރަމުން ދަނީ ހަމައެކަނި އަދުގެ ޖީލުތަކަށް ނޫން ކަމާއި، އެކަމަކީ ތާ އަބަދަށް ދެމިގެން ދަނިވި އަނދިރި ކަމެއްގެ ތެރެއަށް ދުނިޔެ ވައްޓާލާ ވަރުގެ ނުރައްކާ ކަމެއް ކަން، އަވަށްޓެރި އިންޑިއާގެ އަދުގެ މަސްރަޙަށް ބަލާލުމުން ހެކި ދެއެވެ.

އިންޑިއާގެ ވެރިކަން ކުރާ ނިއުދިއްލީގެ ލޯކަލް ގަވަމަންޓުން ވަނީ، އެ ސަރަޙައްދުގެ ވައި، އިންތިހާއަށް ތަޣައްޔަރު ވުމުގެ ސަބަބުން، ނޮވެމްބަރު 5 ވަނަ ދުވަހުން ފަށައިގެން އެ ސިޓީގެ ޕްރައިމަރީ ސްކޫލްތަކުގެ ކިއެވުން މެދުކަނޑާލާފައެވެ. ވައި ނުސާފުވެ، ޖައްވު ތަޣައްޔަރުވުމުގެ ސަބަބުން އަނދިރިވެ، ބަނަވެގެން އެ ދިޔައީ އެތައް ދަރީންނެއްގެ ޢިލްމީ ކުރިމަގު ކަމާ މެދު ވިސްނާލެވުނުތޯއެވެ.

ދިއްލީގެ ޗީފް މިނިސްޓަރު، އަރްވީންދު ކެޖްރިވާލް ވަނީ، އެ ސިޓީ ތެރޭގެ ޓްރެފިކް ފްލޯ ކޮންޓްރޯލް ކުރުމަށްވެސް ހަރުކަށި ފިޔަވަޅުތަކެއް އަޅާނެ ކަމަށް އިޝާރަތް ކޮށްފައެވެ. ކަން މިހެން އޮތް އިރު، ސްކޫލްތަކުގެ ކިއެވުން މެދުކަނޑާލުމަކީ، ހުރިހާ ބެލެނިވެރިން، މާ ރުހޭ ކަމަކަށްވެސް ނުވެއެވެ. ވާނީވެސް އެހެންތާއެވެ.

އިންތިހާއަށް ތަޣައްޔަރުވެފައިވާ ވެއްޓެއްގެ ތެރެއަށް ލޯބިވާ ދަރިން ނެރުމާ މެދު ބެލެނިވެރިންގެ ކަންބޮޑުވުންވެސް އިންތިހާއެވެ. ނޭވާލާން އުނދަގޫވުމާއި، ލޯ ކެރުމާއި، ނޭފަރާތާއި ކަރު ތެރެ ހިރުވުން ފަދަ ޝަކުވާތަކަކީ ދަރިންގެ ފަރާތުން ތާ އަބަދުމެ އަހަން ޖެހިފައި އޮންނަ ހިތްދަތި އަޑެކެވެ. ވައިގެ ކޮލިޓީގެ މިންގަނޑު ހުރީ އިންތިހާއަށް ނުރައްކާ ގިންތީގައި ކަމަށް، ސެންޓްރަލް ޕޮލޫޝަން ކޮންޓްރޯލް ބޯޑުގެ ރެކޯޑްތަކުން ދައްކައެވެ.

ދިއްލީގެ ޕްރައިމަރީ ސްކޫލްތަކުގެ ކިއެވުން މެދުކަނޑާލާފައި ވަނީ، ކަންބޮޑުވެފައިވާ ބެލެނިވެރިންނާއި، ތިމާވެށީގެ ދިފާއުގައި މަސައްކަތް އެކްޓިވިސްޓުން، ސޯޝަލް މީޑިއާގައި ހިންގި ވަރުގަދަ ކެމްޕޭނަކާ ގުޅިގެންނެވެ.