އިނގިރޭސި ޕްރިމިއާ ލީގުގައި ފުލަމް ބަލިކޮށް މެންޗެސްޓަރ ސިޓީން އެއް ވަނަ އަށް ޖެހިލައިފިއެވެ.

ހޮނިހިރު ދުވަހުގެ ރޭ ސިޓީގެ އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބުކުރީ 1-2 އިންނެވެ. މެޗުން ސިޓީ މޮޅުކޮށްދިން ލަނޑު މެޗުގެ އިތުރު ވަގުތުގައި ޕެނަލްޓީއަކުން ކާމިޔާބުކޮށްދިނީ އާލިން ބްރައުޓް ހާލަންޑްއެވެ.

މެޗު ފަށައިގެން 17 ވަނަ މިނެޓުގައި ސިޓީން ވަނީ ލަނޑު ޖަހާ ލީޑު ނަގާފައެވެ. އިލްކާއި ގުންޑޮގަން ތަނަވަސްކޮށްދިން ފުރުސަތަކުން ސިޓީ އަށް ލީޑު ނަގައިދިނީ ހޫލިއަން އަލަވަރޭޒްއެވެ. ސިޓީ އަށް މެޗުގައި ގެއްލުން ދެއްކީ 26 ވަނަ މިނެޓުގައި އެ ޓީމުގައި ޔާއޯ ކަންސޭލޯ ރަތް ކާޑު ދެއްކުމުންނެވެ. އެއީ ސިޓީގެ އޭރިޔާ ތެރެއިން ކަންސޭލޯ ފުލަމްގެ ހެރީ ވިލްސަން އަށް ފައުލް ކުރުމުންނެވެ. ފައުލާ އެކު ލިބުނު ޕެނަލްޓީ ކާމިޔާބުކޮށްގެން ފުލަމް އިން ވަނީ ނަތީޖާ ހަމަހަމަކޮށްފައެވެ. އެ ޓީމަށް ނަތީޖާ ހަމަހަމަކޮށްދިނީ ޔާއޯ ޕެރޭރާއެވެ. މެޗުގެ ބާކީ ބައި އެ ޓީމުން ކުޅެން ޖެހުނީ 10 ކުޅުންތެރިންނާ އެކުއެވެ.

ދެ ވަނަ ހާފުގައި ކޯޗު ޕެޕް ގާޑިއޯލާ ވަނީ ހާލަންޑު ކުޅެން އަރުވާފައެވެ. ކުޅެން ނުކުމެ މެޗުގެ 74 ވަނަ މިނެޓުގައި ހާލަންޑު ޖެހި ލަނޑު ބަލައިނުގަތުމަށް ވީއޭއާރުން ވަނީ ނިންމާފައެވެ. ނަމަވެސް މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ތެރޭގައި ލިބުނު ޕެނަލްޓީ ކާމިޔާބުކޮށްގެން ހާލަންޑު ވަނީ ސިޓީ މޮޅުކޮށްދީފައެވެ.

މެޗުން މޮޅުވެ ސިޓީ އެއް ވަނައިގައި އޮތީ ޕޮއިންޓެއްގެ ލީޑަކުންނެވެ. ކުޅުނު 13 މެޗުން އެ ޓީމަށް ލިބެނީ 32 ޕޮއިންޓެވެ. ސިޓީ އަށްވުރެ އެއް މެޗު މަދުން ކުޅެގެން ދެ ވަނައިގައި އޮތް އާސެނަލަށް ލިބެނީ 31 ޕޮއިންޓެވެ. ނަމަވެސް ލީގުގައި އާދިއްތަ ދުވަހު ޗެލްސީ ބަލިކޮށްގެން އާސެނަލަށް އަލުން އެއް ވަނަ ހޯދޭނެއެވެ.