ޔުގެންޑާގައި އެބޯލާ ޖެހިގެން މަރުވި މީހުންގެ އަދަދު 48ށް އަރާފައިވާކަމަށް އެގައުމުގެ ސިއްހީ އޮފިޝަލުން ބުނެފިއެވެ.
ބުރާސްފަތި ދުވަހާ ހަމައަށް އެ ގައުމުގައި އެބޯލާ ޖެހިފައިވާ މީހުންގެ އަދަދު 131ށް އަރާފައިވާކަމަށް ބަލި ކޮންޓްރޯލް ކުރުމުގެ މަސައްކަތް ކުރަމުން އަންނަ ސިއްހީ އޮފިޝަލުން ބުނެއެވެ.
މިދިޔަ ހަފްތާގެ ޔުގެންޑާގެ ސިއްހަތާއި ބެހޭ ވަޒީރު ވިދާޅުވެފައިވަނީ އެބޯލާ ޖެހިގެން އެހާތަނަށް މަރުވެފައިވަނީ 30 މީހުންކަމަށެވެ. އަދި ބަލި ޖެހިފައިވަނީ 109 މީހުންނަށްކަމަށެވެ.
ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ގެ އެފްރިކާ އޮފީހުން ބޭއްވި ނޫސްވެރިންގެ ބައްދަލުވުމެއްގައި ޔުގެންޑާގައި އެބޯލާގެ ހާލަތު ކޮންޓްރޯލްކުރުމުގެ މަސައްކަތުގައި އެންމެ އިސްކޮށް ހަރަކާތްތެރިވެވަޑައިގެންނަވާ ހެންރީ ޔޯބެ ވިދާޅުވީ މިހާރު ފެތުރެމުން އަންނަ އެބޯލާ ފެތުރުން ހުއްޓޭނެ ދުވަހެއް ބުނަން ނޭންގޭކަމަށެވެ. ކަމާބެހޭ މުއައްސަސާތަކުން ރައްކާތެރިކަމުގެ ފިޔަވަޅުތައް އަޅަމުން އަންކަމަށް ވެސް ހެންރީ ވިދާޅުވިއެވެ. އެގޮތުން ކޮންޓެކްޓް ޓްރޭސިންގ ހެދުމާއި ބަލި ފެތުރުން ކޮންޓްރޯލްކުރުމަށް ފިޔަވަޅުތައް އަޅަމުން އަންނަކަމަށް ހެންރީ ވިދާޅުވިއެވެ.
މިދިޔަ މަހު ޔުގެންޑާ ސަރުކާރުން ބުނެފައިވަނީ މިހާރު ފެތުރެމުން އަންނަ އެބޯލާ މިއަހަރު ނިމޭ ހިސާބު ކޮންޓްރޯލުކޮށް ނައްތާލެވޭނެކަމަށެވެ.
ޔުގެންޑާގައި މިހާރު ފެތުރެމުން އަންނަ އެބޯލާ އަކީ ސޫދާން އިން ފެނިފައިވާ އެވައިރަސްގެ ސްޓްރެއިންއެވެ. މިވައިރަސް އަށް މިހާތަނަށް ވެކްސިނެއް ނެތްއިރު މި ސްޓްރެއިން ވަނީ އެންމެ ފަހުން ކޮންގޯ އިން ފެނުނު އެބޯލާ ކޭސްތަކުން ވެސް ފެނިފައެވެ.
ޑަބްލިޔުއެޗްއޯގެ ޗީފް ޓެޑްރޯސް ވިދާޅުވީ ސޫދާން ސްޓްރެއިން އަށް އުފައްދާފައިވާ ވެކްސިންގެ ކްލިނިކަލް ޓްރެއަލްތައް އޮކްޓޯބަރު މެދު ތެރޭގައި ފެށޭނެކަމަށެވެ.
