ނަޞްރުގެ ދުވަހުގެ ތަހުނިޔާ ރައީސް ސާލިޙު ވިދާޅުވެއްޖެ
ނަޞްރުގެ ދުވަހުގެ ހެޔޮ އެދުމާއި ތަހުނިޔާ އަރިސް ކުރައްވާފައިވޭ
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ނަސްރުގެ ދުވަހުގެ ތަހުނިޔާ ވިދާޅުވެއްޖެއެވެ.
ބުރާސްފަތި ދުވަހު ރައީސް ސާލިޙު ކުރެއްވި ޓްވީޓެއްގައި ވަނީ ނަޞްރުގެ ދުވަހުގެ ހެޔޮ އެދުމާއި ތަހުނިޔާ އަރިސް ކުރައްވާފައެވެ.
ރައީސް ވަނީ ޤައުމުގެ ދިފާއުގައި ޤުރުބާންވެވަޑައިގެން ޝަހީދުވެދިޔަ ބަޠަލުންގެ ޒިކުރާ އައު ކުރައްވާފައެވެ. އަދި މާތްﷲ އެ ބަޠަލުންނަށް ސުވަރުގޭގެ ދާއިމީ ނިޢުމަތް ލެއްވުން އެދި ދުއާ ކުރައްވައި، ދިވެހި މި ވަޠަން މިނިވަންކަމުގައި އަބަދުމެ ލެއްވުން އެދި ދުއާ ކުރައްވާކަން ވަނީ ބަޔާން ކުރައްވާފައެވެ.
ނަޞްރުގެ ދުވަސް ފާހަގަ ކުރުމުގެ ގޮތުން މާލޭގައި އެމްއެންޑީއެފުން ބާއްވާ ޚާއްޞަ ހަރަކާތްތައް ފަށާފައިވަނީ އިސްލާމީ މަރުކަޒުގައި ޖަމާޢަތުގައި ކުރި ފަތިސް ނަމާދުންނެވެ. މީގެ އިތުރުން ހެނދުނު 06:00 ގައި ނޮވެންބަރު ތިނެއްގެ ހަނދާނީ ބިނާގައި ދިދަ އާއި ގާޑް މައުންޓުކޮށްފައިވެއެވެ.
ނަޞްރުގެ ދުވަހާ ގުޅިގެން ބާއްވާ އަސްކަރީ ޕެރޭޑް މިފަހަރު ބޭއްވުމަށް ހަމަޖެހިފައިވަނީ މި ދުވަހުގެ ބަޠަލު ޝަހީދު ކޯޕްރަލް ޙުސައިން އާދަމްގެ އުފަން ރަށް ކަމުގައިވާ ހދ. ކުޅުދުއްފުށީގައި ނޮވެންބަރު 4 ވަނަ ދުވަހުގެ ހަވީރެވެ.
ޓެރަރިސްޓް ޖަމާއަތެއްކަމަށްވާ، ތަމަޅަ ޓައިގަރުންގެ ބަޔަކާ ގުޅިގެން ދިވެހިންގެ ބަޔަކު މާލެއަށް ހަތިޔާރާ އެކު އަރައި، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައި ވަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުއެވެ.
ނޮވެމްބަރު 3، ނަސްރުގެ ދުވަހުގެ ގޮތުގައި ފާހަގަކުރަނީ 1988 ވަނަ އަހަރު ދިވެހިންގެ ބަޔަކު ތަމަޅަ ޓައިގަރުންގެ ބަޔަކާއެކު ރާއްޖެ އަރައި ދިން އުދުވާނީ ހަމަލާއިން ދިވެހިންނަށް ލިބުނު ނަސްރު ފާހަގަކުރުމުގެ ގޮތުންނެވެ.
