ދިރާގާއި ޔޫއެންޑީޕީ މޯލްޑިވްސް ގުޅިގެން ކުރިއަށްގެންދާ "ޑްރޯން ފޯ ރެޒިލިއަންސް" ޕްރޮގްރާމުގެ ދަށުން އައްޑު ސިޓީ ކައުންސިލަށް ޑްރޯން ހަދިޔާކޮށްފިއެވެ.
މިތަކެޔި ހަދިޔާ ކޮށްފައިވަނީ ބުދަ ދުވަހުގެ ހަވީރު އެ ސިޓީގައި ބޭއްވި ހާއްސަ ބައްދަލް ވުމެއްގައެވެ. މި ބައްދަލްވުން ޝަރަފުވެރިކޮށްދެއްވީ މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް، އެންޑް ޓެކްނޮލޮޖީ އާމިނަތު ޝައުނާއެވެ.
ޑްރޯން ފޯ ރެޒިލިއަންސް ޕްރޮގްރާމަކީ ކާރިސީ ހީރާސް ކުޑަކުރުމާއި ކާރިސާތައް މެނޭޖުކުރުމުގެ މަސައްކަތަށް ޑްރޯން ޓެކްނޮލޮޖީ ވެއްދުމެވެ. އެގޮތުން ޑްރޯން ޓެކްނޮލޮޖީ ބޭނުންކޮށްގެން، ކާރިސާއެއް ދިމާވެއްޖެ ހާލަތަކަށް ތައްޔާރުވާނެ ގޮތްތައް ކަނޑައަޅައި، ހަތަރު ރަށަކަށް ތަފްސީލީ މެޕް ތަކެއް އުފެއްދުމަށް ހަމަޖެހިފައިވާ ކަމަށް މީގެ ކުރިން ދިރާގުން ވަނީ ބުނެފައެވެ.
މި ރަސްމިއްޔާތުގައި މިނިސްޓަރު އާމިނަތު ޝައުނާ ވިދާޅުވީ މޫސުމަށް އަންނަ ބަދަލުތަކުން އަރައިގަތުމާއި އެޑަޕްޓޭޝަންގެ ދާއިރާއިން ކުރިއަރަމުން އަންނަ ޓެކްނޮލޮޖީތައް ބޭނުންކުރުމާއި، ގައުމީ ތަރައްގީއަށް ރޭވުމަކީ މިނިސްޓްރީގެ މައިގަނޑު ސްޓްރެޓެޖީއެއްކަމަށެވެ. ޑްރޯން އާއި އާޓިފިޝަލް އިންޓެލިޖެންސް ފަދަ ޓެކްނޮލޮޖީތަކުގެ ފުރުސަތު ވަރަށް ބޮޑުކަމަށް ވެސް ވިދާޅުވިއެވެ.
މިއަދު ޑޭޓާ މުހިއްމު ކަން ފާހަގަކުރައްވައި ޝައުނާ ވިދާޅުވީ އެހެންކަމުން މި މަސައްކަތަކީ ވަރަށް މުހިންމު ކަމެއް ކަމަށެވެ. އަދި މި މަސައްކަތުގައި ކުރިއަށް ދިއުމުގެ ގޮތުން ޑޭޓާ ޝެއަރ ކުރުން ވަރަށް މުހިއްމުކަމަށް ވިދާޅުވިއެވެ. މި ޑޭޓާއަކީ ހަމައެކަނި ސަރުކާރަށް ލިބޭ އެއްޗަކަށް ނުވެ، އާންމުންނަށް ލިބެން ޖެހޭ އޯޕަން ޑޭޓާއަށް ވުން ވަރަށް މުހިއްމު ކަމަށާއި މިއީ ސަރުކާރުގެ ސިޔާސަތެއްކަން މިނިސްޓަރ ފާހަގަކުރެއްވިއެވެ.
އާޓިފިޝަލް އިންޓެލިޖެންސާއި ޑޭޓާ ލޭކް އަދި އިންޓަނެޓް ފަދަ ޓެކްނޮލޮޖީތައް ބޭނުންކޮށްގެން ޑްރޯންގެ ބޭނުން އިތުރަށް ތަރައްގީ ކުރުމުގެ އުއްމީދު މިނިސްޓަރގެ ވާހަކަފުޅުގައި ވަނީ ހިއްސާކުރައްވާފައެވެ.
މި ރަސްމިއްޔާތުގެ ތެރެއިން ޑޭޓާ ޕްރޮޑަކްޓުތަކާއި އިމޭޖިން ޑްރޯންތައް ވަނީ އައްޑޫ ސިޓީ ކައުންސިލާއި ހަވާލުކޮށްފައެވެ.
