ދިރާގު އެމްއެލްބީބީ މިނީ ސީރީޒް IV އަށް ރަޖިސްޓްރޭޝަން ފަށައިފި

ރާއްޖޭގެ އެންމެ ބޮޑު ގޭމިންގ ޕްލެޓްފޯމް ކަމުގައިވާ ދިރާގު ގޭމާރސް ގިލްޑް (ޑީޖީޖީ) އިން އިންތިޒާމް ކޮށްގެން ބާއްވާ މޯބައިލް ލެޖެންޑްސް ބޭންގް ބޭންގް (އެމްއެލްބީބީ) މިނީ ސީރީޒް IV އަށް ރަޖިސްޓަރީވުމުގެ ފުރުސަތު ހުޅުވާލައިފި އެވެ.

މި މުބާރާތަކީ ރާއްޖޭގެ ގޭމް ކުޅުންތެރިންގެ މެދުގައި ވަރަށް ބޮޑަށް މަގުބޫލުވެފައިވާ އެމްއެލްބީބީ ގޭމްގެ ހުނަރުވެރިކަން ދައްކުވައިދިނުމަށް ލިބޭ އަގުހުރި ފުރުސަތެކެވެ.

މި މުބާރާތަށް ރަޖިސްޓަރީކުރުމުގެ ސުންގަޑިއަކީ 3 ޑިސެންބަރު 2025 އެވެ. މުބާރާތުގައި ބައިވެރިވާން ބޭނުންވާ ގޭމް ކުޅުންތެރިންނަށް ޑީޖީޖީގެ އަމިއްލަ ވެބްސައިޓް dgg.mv މެދުވެރިކޮށް ރަޖިސްޓަރީވުމުގެ ފުރުސަތު ވަނީ ހުޅުވާލާފަ އެވެ. ރަޖިސްޓްރޭޝަން ޕްރޮސެސް ވަރަށް ފަސޭހަކަމާއެކު، ގޭމް ކުޅުންތެރިންނަށް އެއްވެސް ދަތިކަމެއްނެތި މި މުބާރާތުގައި ބައިވެރިވެވޭނެ އިންތިޒާމް ވަނީ ހަމަޖައްސާފަ އެވެ.

މި މުބާރާތް ފެށުމަށް ހަމަޖެހިފައިވަނީ 7 ޑިސެންބަރު 2025 ގަ އެވެ. މުބާރާތް ކުރިއަށްދާނީ އޮންލައިން ޕްލެޓްފޯމްގައި ކަމުން، ރާއްޖޭގެ އެކި ކަންކޮޅުތަކުގައި ދިރިއުޅޭ ގޭމް ކުޅުންތެރިންނަށް ވެސް އެއްވެސް ދަތިކަމެއްނެތި މި މުބާރާތުގައި ބައިވެރިވެވޭނެ އެވެ. މިއީ ގޭމިންގ ކޮމިއުނިޓީ އިތުރަށް ފުޅާކުރުމަށާއި، ރާއްޖޭގެ އެކި ހިސާބުތަކުގައި ހުރި ހުނަރުވެރި ކުޅުންތެރިން ފެނިގެންދިއުމަށް ލިބޭ ރަނގަޅު ފުރުސަތެކެވެ.

މި މުބާރާތުގައި ބައިވެރިވެ ވަނަވަނަ ހޯދާ ގޭމް ކުޅުންތެރިންނަށް ޖުމްލަ 10،000 ރުފިޔާގެ ޕްރައިޒް ޕޫލެއް ވަނީ ކަނޑައަޅާފަ އެވެ.

ޑީޖީޖީއިން ވަނީ ރާއްޖޭގެ ތާރީހުގައި މިހާތަނަށް ބޭއްވި އެންމެ ބޮޑު ގޭމިންގް މުބާރާތް ކަމުގައިވާ ދިރާގު މޯލްޑިވްސް ގޭމިންގް ކޮންކުއެސްޓް (ޑީއެމްޖީސީ) ކާމިޔާބުކަމާއެކު މި އަހަރު ބާއްވާފަ އެވެ. މި މުބާރާތުގައި ރާއްޖޭގެ އެކި ކަންކޮޅުތަކުން 1500 އަށް ވުރެ ގިނަ ގޭމް ކުޅުންތެރިން ވަނީ ބައިވެރިވެ ފައެވެ.

ދިރާގުން ދަނީ ރާއްޖޭގެ އެންމެ ބޮޑު ގޭމިންގ ޕްލެޓްފޯމް ދިރާގު ގޭމާރސް ގިލްޑް (ޑީޖީޖީ) މެދުވެރިކޮށް ރާއްޖޭގެ ގޭމް ކުޅުންތެރިންގެ ހުނަރު އިތުރުކޮށްދީ، އީ-ސްޕޯޓްސް ފުޅާކޮށް، ގޭމިންގ ކޮމިއުނިޓީ އިތުރު ހަރުފަތްތަކަށް ގެންދިއުމަށް އެންމެ ކުރީ ސަފުގައި ހަރަކާތްތެރި ވަމުންނެވެ.