2023 ވަނަ އަހަރުގެ ބަޖެޓުގައި ސަރުކާރުން ކުރިއަށް ގެންދާ ބޯހިޔާވަހިކަމުގެ މަޝްރޫއުތަކަށް 737.6 މިލިއަން ރުފިޔާ ޚަރަދުކުރުމަށް ކަނޑައަޅައިފިއެވެ.

މި މަޝްރޫއުގެ ދަށުން ފަހިދިރިއުޅުން ކޯޕަރޭޝަން މެދުވެރިކޮށް ހުޅުމާލޭގައި ސަރުކާރުން ކުރިއަށް ގެންދިއުމަށް ނިންމައިފައިވާ 6000 ހައުސިންގ ޔުނިޓުގެ އިކުއިޓީ ކޮންޓްރިބިއުޝަނާއި އެކި ރަށްތަކުގައި އަލަށް ފެށުމަށް ހަމަޖެހިފައިވާ ބޯހިޔާވަހިކަމުގެ މަޝްރޫއުތަކަށް 285.9 މިލިއަން ރުފިޔާ ހިމަނައިފައިވެއެވެ. މީގެ އިތުރުން، ސައުދީ ފަންޑުގެ ލޯނުގައި ހިނގަމުންދާ އެފޯޑަބަލް ހައުސިންގ ޕްރޮޖެކްޓުގެ ދަށުން 31.8 މިލިއަން ރުފިޔާ ޚަރަދުކުރުމަށް ބަޖެޓުގައި ހިމެނައިފައިވެއެވެ. އަދި މިހާރު އެކި ރަށްތަކުގައި ހިނގަމުންދާ ހައުސިންގ ޔުނިޓުގެ މަޝްރޫއުތަކަށް 193.1 މިލިއަން ރުފިޔާ ހިމަނައިފައިވެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރު އިބްރާހީމް އަމީރު ވިދާޅުވީ ރައްޔިތުންނަށް ދިމާވެފައިވާ ބޯހިޔާވެހިކަމުގެ ދަތިތައް ހައްލުކޮށްދިނުމަށްޓަކައި ރާއްޖޭގެ އެކި ރަށްތަކުގައި ހައުސިންގެ އެކި މަޝްރުއޫތައް މިހާރުވެސް ހިނގަމުންދާކަމަށެވެ. މިގޮތުން މުޅި ރާއްޖޭގައި ގެދޮރުވެރިކަމުގެ މަޝްރޫއުތައް ކުރިއަށް ގެންދިއުމަށް ކުރިއަށްއޮތް ތިން އަހަރަށް 2.5 ބިލިއަން ރުފިޔާ ބަޖެޓުގައި ހިމަނާފައިވާނެ ކަމަށް މިނިސްޓަރު ވިދާޅުވިއެވެ.

ޒަމާނުއްސުރެ، މާލޭގެ ރައްވެހިންނަށް ދިމާވެފައިވާ ތޮއްޖެހުމުގެ މައްސަލައަށް ހައްލެއް ގެނައުމަށް ބިންވެރިޔާ އަދި ގެދޮރުވެރިޔާ ސްކީމް ހުޅުވާލާފައިވާކަން ފާހަގަކުރައްވާ މިނިސްޓަރު ވިދާޅުވީ މިކަމަށްޓަކައި ގްރޭޓަރ މާލޭ ސަރަހައްދުގައި ފަހި ދިރިއުޅުން ކޯޕޮރޭޝަން ލިމިޓެޑް މެދުވެރިކޮށް ގާއިމުކުރާ 6,000 ހައުސިންގ ޔުނިޓުގެ މަސައްކަތް މިހާރުވަނީ ފަށާފައިކަމަށެވެ. އަދި އަތޮޅު ތެރޭގައި 2,500 އަށްވުރެ ގިނަ ހައުސިންގ ޔުނިޓްގެ މަސައްކަތްވެސް ކުރިޔަށްދާކަމަށް މިނިސްޓަރު ވިދާޅުވިއެވެ.

މީގެ އިތުރުން، މާލެ ސަރަހައްދުން ގޯތި ދޫކުރުމަށް ގުޅީފަޅު ހިއްކުމުގެ މަޝްރޫޢު ބަޖެޓުގައި ހިމަނާފައިވާނެކަމަށް މިނިސްޓަރު ވިދާޅުވިއެވެ. ކ.ގުޅިފަޅުގެ ބިން ހިއްކުމުގެ ދެވަނަ ފިޔަވައްސަށް ބޭނުންވާ 291.8 މިލިއަން ރުފިޔާ ލޯނުން ފަންޑުކުރުމަށް އަންނަ އަހަރު ވަނީ ހަމަޖެހިފައެވެ.

މި އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ، މާލޭގެ ރަށްވެހިންނަށް ގޯތި ދިނުމަށް ނިންމަވާފައިވާ ކަމަށާއި، މާލޭ ރަށްވެހިންނަށް ހުޅުމާލެއިން މަދުވެގެން 1,000 ގޯތި، އަދި ގުޅީފަޅުން މަދުވެގެން 2,000 ގޯތި ދެއްވާނެ ކަމަށެވެ. 

މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން ކުރިއަށްގެންދާ "ގެދޮރުވެރިން" ޕްރޮގްރާމުގެ ތެރެއިން މާލޭގެ ރައްޔިތުންނަށް ގޯތި ދިނުމަށް ހިންގާ "ބިންވެރިޔާ" ސްކީމުގެ ދަށުން ބަންޑާރަ ގޯތި ދޫކުރުމަށް ހަމަޖެހިފައިވާއިރު، ގުޅީފަޅުގެ ލޭންޑް ޔޫސް ޕްލޭން ފައިނަލައިޒްކުރާއިރު އެއަށްވުރެވެސް އިތުރަށް ގޯތި ދޫކުރެވިގެންދާނެކަމަށް ޕްލޭނިން މިނިސްޓަރު މުޙައްމަދު އަސްލަމް ވަނީ ވިދާޅުވެފައެވެ.

މި ސްކީމްތައް ލޯންޗުކުރުމަށް ބޭއްވި ރަސްމިއްޔާތުގައި ވާހަަކަ ދައްކަވަމުން އަސްލަމް ވިދާޅުވީ، 3000 ގޯތި ދޫކުރަނީ ހުޅުމާލެއާއި ގުޅީފަޅުން ކަމަށެވެ. 149 ހެކްޓަރުގެ ބިން ގުޅީފަޅުން ދޫކުރާނެ ކަމަށްވެސް ވިދާޅުވިއެވެ.