2023 ވަނަ އަހަރު ދައުލަތަށް ލިބޭ އާމްދަނީ އިތުރުވާނެކަމަށް ބެލެވޭތީ، ކައުންސިލްތަކަށް 1.8 ބިލިއަން ރުފިޔާ ދިނުމަށް ބަޖެޓުގައި ހިމަނާފައި ވާނެކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން މިނިސްޓަރު ވިދާޅުވީ ލާމަރުކަޒީ ޤާނޫނަށް 2019 ވަނަ އަހަރު ގެނައި އިސްލާހާ އެކު މާލީ ބާރުވެރިކަން ކައުންސިލްތަކަށް ލިބިދީފައިވާކަމަށެވެ. ލާމަރުކަޒީ ގާނޫނާ އެއްގޮތްވާ ގޮތުގެ މަތިން ކައުންސިލްތަކަށް "ބްލޮކް ގްރާންޓް" ކަނޑައަޅައި ފައިސާ ދަނީ ދޫކުރަމުންކަމަށް މިނިސްޓަރު ވިދާޅުވިއެވެ. އަދި ކައުންސިލްތައް މެދުވެރިކޮށް ފޯރުކޮށްދޭ ހިދުމަތްތަކަށް ނަގާ ފީގެ ގޮތުގައި ލިބޭ އާމްދަނީ އާއި ކައުންސިލްގެ އިޙްތިސާސް ހިނގާ ބިންބިމުގެ ކުލި، ސީދާ ކައުންސިލްތަކަށް ލިބޭނެ ގޮތަށް މިހާރު ވަނީ ހަމަޖެހިފައިކަމަށް މިނިސްޓަރު ވިދާޅުވިއެވެ.
އަދި އެއްގަމު އުޅަނދުތަކާއި ކަނޑު އުޅަނދުތަކުގެ އަހަރީ ފީއިން ލިބޭ އާމްދަނީ ވެސް ލިބިގެންދާނީ އެ އުޅަނދެއް ދުއްވާ ރަށެއްގެ ކައުންސިލަށްއިބްރާހީމް އަމީރު / ފިނޭންސް މިނިސްޓަރު
2019 ވަނަ އަހަރު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ގެނެވުނު 8 ވަނަ އިސްލާހުގެ ދަށުން އެ އަހަރަކަށް ފާސްކުރާ އާމްދަނީގެ މަދުވެގެން 5 އިންސައްތަ، އަދި ކައުންސިލްތަކުގެ އިހުތިސާސްގެ ތެރޭގައި ނުހިމެނޭ ބިމާއި ފަޅާއި ފަރުފަދަ ސަރަހައްދުތަކުގެ ކުލީގެ ގޮތުގައި ލިބޭ އާމްދަނީގެ 40 އިންސައްތަ ކައުންސިލްތަކަށް ބްލޮކް ގްރާންޓްގެ ގޮތުގައި ދޫކުރަން ޖެހެއެވެ. މިގޮތުން ކަނޑައަޅާ ޖުމްލަ އަދަދު ވަކިވަކި ކައުންސިލްތަކުގެ މެދުގައި ބަހަނީ މިނިސްޓްރީ އޮފް ފިނޭންސްއިން ކަނޑައަޅާ ފިސްކަލް ފޯމިއުލާއެއް ބޭނުންކޮށްގެންނެވެ. 2023 ވަނަ އަހަރު ކައުންސިލްތަކަށް ބްލޮކް ގްރާންޓްގެ ގޮތުގައި ދޫކުރަން ކަނޑައަޅައިފައި ވަނީ 1،793.5 މިލިއަން ރުފިޔާއެވެ. މިއީ 2020 ވަނަ އަހަރު ބްލޮކް ގްރާންޓްގެ ގޮތުގައި ކައުންސިލްތަކަށް ދޫކުރި ފައިސާއަށްވުރެ 12.8 އިންސައްތަ އިތުރު އަދަދެކެވެ. 2022 ވަނަ އަހަރު ކައުންސިލްތަކަށް ބްލޮކް ގްރާންޓްގެ ގޮތުގައި ދޫކުރުމަށް ކަނޑައަޅާފައިވަނީ ޖުމުލަ 1565.4 މިލިއަން ރުފިޔާއެވެ.
އަދި 2020 ވަނަ އަހަރު ކައުންސިލްތަކަށް އެންމެ ފުރަތަމަ ބްލޮކް ގްރާންޓްގެ ގޮތުގައި ފައިސާ ދޭން ފާސްކުރި 1،615 މިލިއަން ރުފިޔާއަށްވުރެ އިތުރަށް ބްލޮކް ގްރާންޓް ދޫކުރާ ފުރަތަމަ އަހަރަށް އަންނަ އަހަރު ވާނެއެވެ. މިހާތަނަށް ބްލޮކް ގްރާންޓްގެ ގޮތުގައި ދޭ މިންވަރު 2020 ވަނަ އަހަރު ފުރަތަމަ ހުށަހެޅި މިންވަރަށްވުރެ ދަށްވެފައިވަނީ ކޮވިޑް-19 އާ ގުޅިގެން ދައުލަތުގެ އާމްދަނީ ބޮޑުތަނުން ދަށަށް ދިއުމާއެކުއެވެ. ނަމަވެސް މެދުރާސްތާގައި ދައުލަތުގެ އާމްދަނީ އިތުރުވަމުންދާނެކަމަށް ބެލެވޭތީ، ކައުންސިލްތަކަށް ދޫކުރާ ފައިސާގެ އަދަދުވެސް އިތުރުވެ، 2024 ވަނަ އަހަރު ބްލޮކް ގްރާންޓްގެ އަދަދު ދެ ބިލިއަން ރުފިޔާއަށްވުރެ އިތުރުވާނެކަމަށް ލަފާކުރެވެއެވެ.
އަންނަ އަހަރަށް ފިސްކަލް ފޯމިއުލާ ކަނޑައަޅައިފައިވާ ގޮތަކީ:
- ބްލޮކް ގްރާންޓްގެ ގޮތުގައި ދޫކުރާ ޖުމްލަ އަދަދު:
- ބަޖެޓުގައި އާމްދަނީގެ ގޮތުގައި ކަނޑައަޅާ މިންވަރުގެ 5 އިންސައްތަ
- ކައުންސިލްތަކުގެ އިހުތިސާސްގެ ތެރޭގައި ނުހިމެނޭ ބިމާއި ފަޅާއި ފަރުފަދަ ސަރަހައްދުތަކުގެ ކުލީގެ ގޮތުގައި ލިބޭ އާމްދަނީގެ 40 އިންސައްތަ
ޖުމްލަ އަދަދުގެ ތެރެއިން ރަށު ކައުންސިލްތަކާއި، އަތޮޅު ކައުންސިލްތަކާއި ސިޓީ ކައުންސިލްތަކަށް ބަހާ ނިސްބަތް:
- ރަށު ކައުންސިލްތައް: 70 އިންސައްތަ
- އަތޮޅު ކައުންސިލްތައް: 10 އިންސައްތަ
- ސިޓީ ކައުންސިލްތައް: 20 އިންސައްތަ
މި އަދަދުތައް ވަކިވަކި ކައުންސިލްތަކުގެ މެދުގައި ބަހަނީ ދެ ގޮތަކަށެވެ. އެއީ އިކުއަލައިޒޭޝަން ގްރާންޓްގެ ގޮތުގައާއި ފިސްކަލް ފޯމިއުލާގެ އިންޑިކޭޓަރތަކަށް ބަލައިގެންނެވެ. މިގޮތުން އިކުއަލައިޒޭޝަން ގްރާންޓް ދިނުމުގެ މަގުސަދަކީ އެއްވެސް ކައުންސިލަކަށް އެކަށީގެންނުވާ ކުޑަ މިންވަރެއް ބްލޮކް ގްރާންޓްގެ ގޮތުގައި ނުލިބޭނެކަން ކަށަވަރުކުރުމެވެ.
ވަކިވަކި ކައުންސިލްތަކަށް ބްލޮކް ގްރާންޓް ބަހާ ދެވަނަ ގޮތަކީ ފިސްކަލް ފޯމިއުލާގެ މިންގަނޑުތަކަށް ބިނާކޮށް ފައިސާ ބެހުމެވެ. 2023 ވަނަ އަހަރު ފިސްކަލް ފޯމިއުލާއަށް މިނިސްޓްރީ އޮފް ފިނޭންސްއިން ވަޒަންކޮށްފައިވާ ކައުންސިލްތަކުގެ ފިސްކަލް ޕާފޯމަންސް އިންޑެކްސް ވަނީ އިތުރުކޮށްފައެވެ. މި މިންގަނޑު ތައްޔާރުކުރުމުގައި ބަލައިފައިވާނީ ކައުންސިލްތަކުން މިނިސްޓްރީ އޮފް ފިނޭންސްއިން ކަނޑައަޅާފައިވާ ފޯމެޓުގައި، ސުންގަޑިއަށް، 2023 ވަނަ އަހަރުގެ ބަޖެޓު އަންދާޒާ ހުށަހަޅާފައިވޭތޯ އާއި ކައުންސިލްތަކުގެ ޔުޓިލިޓީ ބިލްތައް ނުދައްކައި ހުރިނަމަ ނުދައްކާ މުއްދަތަށާއި ކައުންސިލްތަކުން ވިޔަ މޮޑިއުލްގައި ގަވާއިދުން ޚަރަދުތައް ރެކޯޑުކުރަމުން ދޭތޯއެވެ.
