42.6 ބިލިއަން ރުފިޔާގެ ބަޖެޓް ދިރާސާކުރުމަށް ކޮމިޓީއަށް، ބަޖެޓް ބަހުސް ނޮވެމްބަރު 8 ގައި
ބަޖެޓް ދިރާސާކުރުމުގެ މަސައްކަތްކުރަމުންދާނީ ރައްޔިތުންގެ މަޖިލީހުގެ އިޤްތިޞާދީ ކޮމިޓީއާއި މާލިއްޔަތު ކޮމިޓީ ގުޅިގެން
ރައްޔިތުންގެ މަޖިލީހުގެ ޖަލްސާގެ ތެރެއިން
އަންނަ އަހަރަށް ލަފާކުރާ 42.68 ބިލިއަން ރުފިޔާގެ ބަޖެޓު ދިރާސާކުރުމަށް ބަޖެޓް ކޮމިޓީއަށް ފޮނުވައިފިއެވެ.
ހޯމަ ދުވަހު، ފިނޭންސް މިނިސްޓަރު އިބްރާހީމް އަމީރު ވަނީ 2023 ވަނަ އަހަރަށް ހުށަހަޅާ ދައުލަތުގެ ބަޖެޓުގެ ޖުމްލައަކީ 42,680,269,914 (ސާޅީސް ދެ ބިލިއަން، ހަ ސަތޭކަ އައްޑިހަ މިލިއަން، ދުއިސައްތަ ފަސްދޮޅަސް ނުވަ ހާސް، ނުވަސަތޭކަ ސާދަ) ރުފިޔާގެ ބަޖެޓް ހުށަހަޅުއްވާފައެވެ.
ބަޖެޓް ހުށަހެޅުމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ބަޖެޓް ދިރާސާކުރުމަށް ބަޖެޓް ކޮމިޓީއަށް ފޮނުއްވަވާކަމަށެވެ. ބަޖެޓް ދިރާސާކުރުމުގެ މަސައްކަތްކުރަމުންދާނީ ރައްޔިތުންގެ މަޖިލީހުގެ އިޤްތިޞާދީ ކޮމިޓީއާއި މާލިއްޔަތު ކޮމިޓީ ގުޅިގެންނެވެ. ބަޖެޓް ދިރާސާކުރުމުގެ މަސައްކަތް މިހާރުން ފެށިގެން ކުރިޔަށްދާނެއެވެ.
ބަޖެޓް ދިރާސާކުރުމަށް އެކުލަވާލާފައިވާ ޓައިމްލައިނާ ގުޅޭގޮތުން ރައީސް ނަޝީދު ވިދާޅުވީ ބަޖެޓް ބަހުސްކުރުމަށް ހަމަޖެހިފައިވަނީ ނޮވެމްބަރު މަހުގެ 8 ވަނަ ދުވަހު ކަމަށެވެ. ނޮވެމްބަރު 8 ވަނަ ދުވަހުން ފެށިގެން ތިން ދުވަހު ބަޖެޓަށް ތަޅުމުގައި ބަހުސްކުރާނެއެވެ. ބަޖެޓަށް މެމްބަރުން ބަހުސްކުރައްވާނެ ވަގުތު ކަނޑައަޅާނީ ބަޖެޓް ކޮމިޓީންނެވެ.
ބަޖެޓް ދިރާސާކުރުމަށް ކޮމިޓީއަށް ދީފައިވަނީ ނޮވެމްބަރު މަހުގެ 17 ވަނަ ދުވަހާ ހަމައަށެވެ. ބަޖެޓްގެ ކޮމިޓީ ރިޕޯޓަށް ތަޅުމުގައި ބަހުސްކުރަން ފަށާނީ ނޮވެމްބަރު 21 ވަނަ ދުވަހުއެވެ. އަދި ނޮވެމްބަރު މަސްތެރޭގައި ބަޖެޓް ފާސްކުރާނެއެވެ.
2023 ވަނަ އަހަރު ދައުލަތަށް ޖުމްލަ އާމްދަނީ އާއި ހިލޭ އެހީގެ ގޮތުގައި 32 ބިލިއަން ރުފިޔާ ލިބޭނެ ކަމަށް ލަފާކޮށްފައިވެއެވެ. ދައުލަތުގެ އާމްދަނީގެ އެންމެ ބޮޑު ބަޔަކީ ޓެކުހުގެ ގޮތުގައި ލިބޭ އާމްދަނީއެވެ. މިގޮތުން ޓެކްސް އާމްދަނީގެ ގޮތުގައި 23.54 ބިލިއަން ރުފިޔާ ލިބޭނެ ކަމަށް ލަފާކޮށްފައިވާ އިރު، ޓެކްސް ނޫން އާމްދަނީގެ ގޮތުގައި 6 ބިލިއަން ރުފިޔާ އަދި ހިލޭ އެހީ އަދި އެހެނިހެން އާމްދަނީގެ ގޮތުގައި 2.48 ބިލިއަން ރުފިޔާ ލިބޭނެކަމަށް ވަނީ ލަފާކޮށްފައެވެ
ރިކަރަންޓް ޚަރަދުގެ ގޮތުގައި 28.6 ބިލިއަން ރުފިޔާ ހޭދަވާއިރު ކެޕިޓަލް ޚަރަދުގެ ގޮތުގައި 14.1 ބިލިއަން ރުފިޔާ ހޭދަވާނެކަމަށް ވަނީ އަންދާޒާކޮށްފައެވެ. ބަޖެޓާއި ޚަރަދާ ހުރި ތަފާތުގެ ބޮޑު ބައެއް ހިއްސާކުރަނީ، ދައުލަތުގެ ދަރަނި އަދާކުރުމަށް ދައްކާ 2.1 ބިލިއަން ރުފިޔާއެވެ. ޕިއެސްއައިޕީ އަށް 8.4 ބިލިއަން ރުފިޔާ ހަރަދުވާނެކަމަށް ލަފާކޮށްފައިވާ އިރު، އެހެނިހެން ކެޕިޓަލް ހަރަދުތަކަށް 5.6 ބިލިއަން ރުފިޔާ ވަނީ ކަނޑައަޅާފައެވެ.
