އެންމެ ބޮޑު ކޮރަޕްޝަނަކީ ކޮރަޕްޝަނަށް ރުހުން، އެއީ ޖާއިޒު ކަމެއް ކަމަށް ދެކުން: ރައީސް
މި މަހާސިންތާއިން ފުރޭނިގެން އަންނަ ޚިޔާލުތަކާއި ހުށަހެޅުންތަކަށް ސަރުކާރުން މަރުޙަބާ ކިޔާނެކަން އެމަނިކުފާނު ވަނީ ފާހަގަކުރައްވާފައި
"އެންޓި-ކޮރަޕްޝަން ކޮންފަރެންސް 2022" ފަށްޓަވަދެއްވާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވާހަކަފުޅުދައްކަވަނީ
ކޮރަޕްޝަނަކީ މުޅި ދުނިޔެއަށް ފެތުރިފައި އޮތް، ފަރުވާ ބޭނުންވެފައިވާ އެންމެ ބޮޑު ބަލި ކަމަށާއި، އެންމެ ބޮޑު ކޮރަޕްޝަނަކީ ކޮރަޕްޝަނަށް ރުހުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން އާދިއްތަ ދުވަހު ފެށި "އެންޓި-ކޮރަޕްޝަން ކޮންފަރެންސް 2022" ޝަރަފުވެރިކޮށްދެއްވާ ވާހަކަފުޅުދައްކަވަމުން ރައީސް ވިދާޅުވީ ކޮރަޕްޝަނާއި ފަސާދަ އާއި ނާޖާއިޒު ފައިދާ ނެގުމަކީ، ދައުލަތުގެ ތެރޭގައި އިންތިޒާމުވެފައި އޮންނަ ރީތިކަމެއްގެ ގޮތުގައި ވެރިން ދެކި އެ ނަމޫނާ ދެއްކުމަށްވުރެ ބޮޑު ގޯހެއް އެއްވެސް ޤައުމަކަށް ނޯންނާނެ ކަމަށެވެ. އަދި ހޯދުނު ގޮތަކުން ފައިސާ ހޯދުމަކީ، ޖާއިޒު ކަމެއް ކަމުގައި ބަލައިގަނެ އެކަމަށް ހިތްވަރު ދިނުމަށްވުރެ ބޮޑު ނުބައެއް ނޯންނާނެ ކަމަށް ވެސް އެމަނިކުފާނު ވިދާޅުވިއެވެ.
ރާއްޖެ އާއި ދުނިޔޭގައި ކޮރަޕްޝަންގެ ހަލަތު މިހާރު އޮތް ގޮތާ މެދު ވާހަކަފުޅުދައްކަވަމުން ރައީސް ވިދާޅުވީ ދައުލަތުގެ ތިން ބާރާއި، ސިވިލް ސޮސައިޓީގެ ތެރޭގައި ވެސް ކޮރަޕްޝަންގެ ޢަމަލުތައް ހިނގަމުންދާ ކަމަށެވެ. އަދި ދައުރު ބަދަލުވެ ވެރިކަން ފުރޮޅިގެން ދިޔަ ކަމުގައި ވީ ނަމަވެސް އެ ބަދަލާ އެކު ހުރިހާ ކަމެއް ވަގުތުން ރަނގަޅުވެ އިސްލާހުވެގެން ނުދާނެ ކަމަށެވެ. ކޮރަޕްޝަނުގެ އަމަލުތަކަށް ހުޅުވިފައި ހުންނަ ދޮރުތަކާއި އެކަމަށް މަގުފަހިވާގޮތަށް ޒަމާނުއްސުރެ ގެންގުޅެމުންދާ އާދަތައް ބަދަލު ނުވެ އެކަން އިސްލާހު ނުވާނެ ކަމަށް ވެސް ރައީސް ވިދާޅުވިއެވެ. ވަކިން ޚާއްޞަކޮށް އެފަދަ ކަންކަމަކީ އާދައަކަށް ވުމުން، ނުރަނގަޅު ގޮތް ރަނގަޅު ގޮތުގައި ބެލެވި، ގޯސް ގޮތް އެއްގޯސްވެގެންދާކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ، ކޮރަޕްޝަނާއި ދެކޮޅަށް މިސަރުކާރުން ކުރަމުންދާ މަސައްކަތުގެ އެންމެ މުހިއްމު ބަޔަކީ، ކޮރަޕްޝަނާ ދެކޮޅަށް މަސައްކަތްކުރާނެ މިނިވަން މާހައުލެއް ޤާއިމުކޮށްދިނުން ކަމަށެވެ. އަދި ކޮރަޕްޝަނުގެ މައްސަލަތައް ބަލައި އެފަދަ ޢަމަލުތައް ހުއްޓުވުމަށް އެންޓި-ކޮރަޕްޝަން ކޮމިޝަނުން ކުރާ އެއްވެސް ކަމަކަށް، އަދި ކުރާ ތަޙުޤީޤަކަށް ވެސް ސަރުކާރުގެ އެއްވެސް ނުފޫޒެއް ފޯރުވާފައި ނުވާނެ ކަމަށް ރައީސް ވިދާޅުވިއެވެ.
ހަމައެހެންމެ މިސަރުކާރަށް 4 އަހަރު ފުރެން ކައިރިވެފައިވާ އިރު މިހާތަނަށް ސަރުކާރުން ކޮރަޕްޝަނާ ދެކޮޅަށް ގެންގުޅޭ ސިޔާސަތުތައް، ބައިނަލްއަޤުވާމީ މުޖްތަމައުން ވެސް ބަލައިގަންނަކަމަށް އެމަނިކުފާނު ވިދާޅުވިއެވެ. ކޮރަޕްޝަނަކީ މުޅި ދުނިޔެއަށް ފެތުރިފައި އޮތް ފަރުވާ ބޭނުންވެފައިވާ އެންމެ ބޮޑު ބަލިކަން ފާހަގަކުރައްވައި އެމަނިކުފާނު ވިދާޅުވީ، އެ ބައްޔަށް އޮތް ޝިފާއަކީ ހާމަކުރުމާއި، ކޮރަޕްޝަންގެ އަމަލުތައް ހިންގާ ސަބަބުތައް ދެނެގަތުން ކަމަށެވެ.
މީގެ އިތުރުން ރައީސް ވަނީ ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން މިއަދު ފެށި މި މަހާސިންތާ އާއި ގުޅޭ ގޮތުން ވެސް ވާހަކަފުޅުދައްކަވާފައެވެ. އެގޮތުން ދައުލަތުގެ ކުންފުނިތަކާއި، ސަރުކާރު ޙިއްޞާވާ ކުންފުނިތައް ހިންގުމުގައި ހުރި ކޮރަޕްޝަނުގެ ހިރާސްތައް ދެނެގަނެ، ނަޒާހަތްތެރިކަމާ އެކު ހިންގުމުގެ ނިޒާމު ބައްޓަން ކުރުމުގެ މައްޗަށް މި ފަހަރުގެ މަހާސިންތާ އަމާޒުކޮށްފައިވާތީ، މި މަހާސިންތާގެ މުހިންމުކަން އިތުރުވެގެންދާ ކަމަށް ރައީސް ވިދާޅުވިއެވެ. މީގެ އިތުރުން މި މަހާސިންތާ އިން ފުރޭނިގެން އަންނަ ޚިޔާލުތަކާއި ހުށަހެޅުންތަކަށް ސަރުކާރުން މަރުޙަބާ ކިޔާނެކަން އެމަނިކުފާނު ވިދާޅުވިއެވެ.
"އެންޓި-ކޮރަޕްޝަން ކޮންފަރެންސް 2022"، އަކީ ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން ދެ ދުވަހުގެ މުއްދަތަށް ކުރިޔަށް ގެންދާ މަހާސިންތާއެކެވެ. މިމަހާސިންތާގައި ދައުލަތުގެ ކަމާއި ގުޅުންހުރި އިދާރާތަކުންނާއި، ސަަރުކާރުގެ ކުންފުނިތަކުން ބައިވެރިވެއެވެ.
