ދެކުނު ކޮރެއާގެ މަގުމަތީގައި ގިނަ ބަޔަކު ފިތި 149 މީހުން މަރުވެއްޖެ
150 އަށްވުރެ ގިނަ މީހުންނަށް އެކި ވަރުގެ އަނިޔާ ލިބުނު
ސޯލްގައި ފިތިގެން މަރުވި މީހުން ގެންދަނީ
ދެކުނު ކޮރެއާގެ ވެރިރަށް ސޯލްގެ މަގެއްގައި ގިނަ ބަޔަކު ފިތި 149 މީހުން މަރުވެއްޖެއެވެ.
ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި މި ހާދިސާ ހިނގާފައިވަނީ ހޮނިހިރު ދުވަހުގެ ރޭ 10:20 ހާއިރުއެވެ. އެގޮތުން، ސޯލްގައި "ހެލޮވީން" ފާހަގަކުރުމަށް މަގުތަކަށް ނުކުމެ ތިބި ގިނަ ބަޔަކު ހަނިމަގަކަށް ވަނުމުން އެންމެން އެ މަގުގައި ތާށިވިކަމަށާއި މީހުން މަރުވެފައިވަނީ އޭގެ ސަބަބުން ކަމަށް ވަނީ ރިޕޯޓުކޮށްފައެވެ.
ސޯލްގެ ހޮސްޕިޓަލްތަކާ ހަވާލާދީ ބޭރުގެ މީޑިއާތަކުން ބުނެފައިވާ ގޮތުގައި ގިނަ މީހުން މަރުވެފައިވަނީ ނޭވާ ހާސްވެގެންނެވެ. އަދި ބައެއް މީހުން ހާޓް އެޓޭކު ޖެހިގެން މަރުވެފައިވާ ކަމަށް ވެސް ބެލެވޭ ކަމަށް ވަނީ ބުނެފައެވެ.
އެ ހާދިސާ ހިނގަން މެދުވެރިވި ސީދާ ސަބަބެއް އަދި ނޭނގެއެވެ. އެ މައްސަލަ ދެކުނު ކޮރެއާގެ ސިފައިން ދަނީ ބަލަމުންނެވެ.
މި ހާދިސާގައި 149 މީހަކު މިހާތަނަށް މަރުވެފައިވާ ކަމަށް ރިޕޯޓުކޮށްފައިވާއިރު 150 އަށްވުރެ ގިނަ މީހުންނަށް އެކި ވަރުގެ އަނިޔާ ވަނީ ލިބިފައެވެ. އެހެންކަމުން، މި ހާދިސާގައި މަރުވި މީހުންގެ އަދަދު އަދިވެސް އިތުރުވެދާނެ ކަަމަށް ދެކުނު ކޮރެއާގެ އޮފިޝަލުންނާ ހަވާލާދީ ބޭރުގެ މީޑިއާތަކުން ބުނެއެވެ.
މި ހާދިސާ އާ ގުޅިގެން ދެކުނު ކޮރެއާގެ ރައީސް ވަނީ ހާދިސާގައި މަރުވި މީހުން ދެނެގަނެ، ވީހާވެސް އަވަހަށް އާއިލާތަކަށް އެކަން އަންގަން އިރުޝާދު ދެއްވާފައެވެ. އަދި އެކަމަށް ހާއްސަކޮށްގެން އިމަރޖެންސީ މެނޭޖްމަންޓު ހެޑް ކުއާޓާ އެއް ވެސް އެ ސިޓީގައި ވަނީ ހަދައިފައެވެ. އެތަން މެނޭޖުކުރަމުން ގެންދަވަނީ އެ ޤައުމުގެ ބޮޑުވަޒީރެވެ.
