ޓެން ހާގްގެ އިރުޝާދުގެ ދަށުން ޔުނައިޓެޑު އަންނަނީ ކުރިއަރަމުން: ގާޑިއޯލާ
29 އޮކްޓޯބަރު 2022 | ހޮނިހިރު 03:15ގާޑިއޯލާ ބުނީ އޭނާއަށް ކުރެވެނީ ޔުނައިޓެޑު އަލުން އަނބުރާ އަންނަން އުޅޭ ކަހަލަ އިހުސާސެއް ކަމަށް
ގާޑިއޯލާއާއި ޓެން ހާގް
މެންޗެސްޓަރ ޔުނައިޓެޑުގެ ކޯޗުކަމާ އެރިކް ޓެން ހާގް ހަވާލުވިފަހުން އެ ޓީމު ކުރިއަރަމުން އަންނަކަމަށް ޕެޕް ގާޑިއޯލާ ބުނެފިއެވެ.
ގާޑިއޯލާ މިހެން ބުނީ ޕްރިމިއަރ ލީގުގައި ލެއިސްޓަރ ސިޓީއާ ދެކޮޅަށް ނުކުންނަ މެޗުގެ ކުރިންނެވެ. ގާޑިއޯލާ ބުނީ އޭނާއަށް ކުރެވެނީ ޔުނައިޓެޑް އަލުން އަނބުރާ އަންނަން އުޅޭ ކަހަލަ އިހުސާސެއް ކަމަށެވެ. އޭނާ ބުނީ، ޔުނައިޓެޑުން އެންމެ ފަހުން ޝެރިފްއާ ދެކޮޅަށް ކުޅުނު މެޗު އޭނާ ބެލި ކަމަށާއި، އެ މެޗުންވެސް އޭނާއަށް އެކަމުގެ ސިގްނަލް ފެނުނުކަމަށެވެ. މީގެ އިތުރުން ލީގުގައި ޗެލްސީއާ ދެކޮޅަށް ޔުނައިޓެޑް ކުޅުނު މެޗުގެ ފުރަތަމަ ހާފުގައިވެސް އެކަން އެގޮތަށް ފެނުނުކަމަށް އޭނާ ބުންޏެވެ.
އިތުރަށް ވާހަކަ ދައްކަމުން ގާޑިއޯލާ ބުނީ، އެއީ އޭނާ ބޭނުންވެސް ވާ ގޮތް ކަމަށެވެ. އޭނާ ބުނީ އެންމެ މަތީ ފަންތީގައި ވާދަކުރާނެ ގިނަ ޓީމުތަކެއް އޮންނާނެ ކަމަށެވެ.
ގާޑިއޯލާ ބުނީ އެއީ ޓީމުތަކުން ޕްރިމިއަރ ލީގާއި ޔުއެފާ ޗެމްޕިއަންސް ލީގަށް ވާދަކުރަންޖެހޭ ސަބަބުކަމަށެވެ. އޭނާ ވަނީ ކުރީގެ ވާހަކަތަކެއް ތަކުރާރުވެސް ކޮށްފައެވެ. އެއީ ފުރަތަމަ 10 މެޗުން ލީގު ހޯދާނެ ޓީމެއް ޔަގީންނުކުރެވޭނެ ކަމަށެވެ. ނަމަވެސް އޭނާ ބުނީ ލީގަށް ވާދަކުރާނެ ޓީމުތަކެއް އެހާ ހިސާބުން ބުނެވިދާނެ ކަމަށެވެ. ގާޑިއޯލާ ވަނީ ނިއުކާސަލް ޔުނައިޓެޑްގެ ނަން ފާހަގަކޮށް، އެ ޓީމުގެ ވާހަކަ ދައްކާފައެވެ. އޭނާ ބުނީ އެ ޓީމުން އެންމެ ފަހުން ޓޮޓެންހަމާ ދެކޮޅަށް ކުޅުނު މެޗުގައި އެ މީހުންގެ ކުޅުން ފެނުނުކަމަށާއި، އެ މެޗުގައި ދެ ޓީމުގެވެސް ފިޒިކަލް ފެނުނުކަމަށެވެ.
މީގެ އިތުރުން ގާޑިއޯލާ ވަނީ ސިޓީގެ ވާހަކަވެސް ދައްކާފައެވެ. އޭނާ ބުނީ މިދިޔަ ސީޒަނާ ޚިލާފަށް މި ސީޒަނުގައި އެ ޓީމުގެ ކުޅުންތެރިންގެ ފޯކަސް މާ ރަނގަޅު ކަމަށެވެ.
