"ޗެމްޕިއަންސް ލީގުގައި ވާދަކުރަން ބާސެލޯނާ ތައްޔާރެއް ނޫން!"

ޔުއެފާ ޗެމްޕިއަންސް ލީގުގައި ވާދަކުރަން ބާސެލޯނާ ތައްޔާރު ނޫން ކަމަށް އެ ޓީމުގެ ސްޕެއިންގެ މިޑްފީލްޑަރު ޕެޑްރީ ބުނެފިއެވެ.

ޕެޑްރީ މިހެން ބުނީ ޗެމްޕިއަންސް ލީގުގައި ބާސެލޯނާ އިން ބަޔާން މިއުނިކް އަތުން ބަލިވި މެޗަށްފަހުއެވެެ. އޭނާ ބުނީ އެއީ ބާސެލޯނާގެ ފެއިލްވުމެއް ކަމަށެވެ. އޭނާ ބުނީ ބާސެލޯނާ އަށް ގްރޫޕް ސްޓޭޖު ފަހަނަ އަޅާ ދެވެން ޖެހޭނެ ކަމަށާއި، އެކަން ނުވުމުން ސާބިތުވަނީ ޗެމްޕިއަންސް ލީގުގައި ވާދަ ކުރަން ބާސެލޯނާ އަދި ތައްޔާރު ނޫން ކަމަށެވެ. ޕެޑްރީ ބުނީ ބާސެލޯނާ ގައި އޮތީ ވަރަށް ޒުވާން ޓީމެއް ކަމަށާއި، ރަނގަޅު ކުރަންޖެހޭ އެތައް ބައިވަރު ކަންކަން ހުރި ކަމަށް ޤަބޫލުކުރެވޭ ކަމަށެވެ. އޭނާ ވަނީ ބާސެލޯނާ އިން ރަނގަޅު ކުޅުންތެރިންތަކެއް ހޯދި ނަމަވެސް، ޗެމްޕިއަންސް ލީގުގައި ކުރިއަށް ނުދެވުމަކީ ދެރައެއްކަން ފާހަގަކޮށްފައެވެ.

ޕެޑްރީ ބުނީ ބާސެލޯނާ އަށް ކަންކަން މަދުވާ ކަމަށެވެ. ނަމަވެސް އަމިއްލަ ނަފްސަށް އިތުބާރުކޮށްގެން ކުރިއަށް ދާން ޖެހޭނެ ކަމަށެވެ. އިތުރަށް އޭނާ ބުނީ ކުރިން ކުޅުނު މެޗުތަކުގައި ނަތީޖާ ދަށްވުމަކީ ކުރިއަށް ދާން ހުރަސްއެޅުނު ސަބަބެއް ކަމަށެވެ. އަދި މިހާރަށްވުރެ ބޮޑަށް ބާސެލޯނާ އިން ބޯޅަ ހިފަހައްޓައިގެން އެޓޭކިން އަށް ވިސްނަން ޖެހޭ ކަމަށެވެ. އޭނާ ބުނީ ބަޔާން ފެންނަނީ ހުރިހާ ގޮތަކުން ވެސް ވަރަށް ވަރުގަދަކޮށް ކަމަށާއި، މިފަދަ މުބާރާތްތަކުގައި ވާދަކުރަން އެއީ މުހިންމު ކަމެއް ކަމަށެވެ.

ބާސެލޯނާ އިން ވަނީ މީގެ ކުރިން ވެސް ޔޫރޮޕާ ލީގު ކުޅެފައެވެ. ނަމަވެސް މި ސީޒަންގެ ޗެމްޕިއަންސް ލީގަށް އެ ޓީމުން ކުރިމަތިލީ ގިނަ ކުޅުންތެރިންތަކެއް ހޯދައި، ޓީމު ވަރުގަދަކޮށްގެންނެވެ. ގްރޫޕް ސްޓޭޖުގައި މިހާތަނަށް ކުޅުނު ފަސް މެޗުން އެ ޓީމު ވަނީ ތިން މެޗުން ބަލިވެފައެވެ. އެއް މެޗުން މޮޅުވީއިރު، އަނެއް މެޗުން ވީ އެއްވަރެވެ.