ޒުވާން ކުޅުންތެރިންނަށް އެންމެ ރަނގަޅު މުސްތަޤުބަލެއް އޮތީ ބޮރޫޝިއާ ޑޮޓްމަންޑުގައި ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނީ ޔުއެފާ ޗެމްޕިއަންސް ލީގު ގްރޫޕް ސްޓޭޖުގެ ދެ ވަނަ މެޗުގައި ޑޯޓްމަންޑާ ދެކޮޅަށް ނުކުތުމުގެ ކުރިން އޮތް ޕްރެސްގައެވެ. އޭނާ ވަނީ އެ ޕްރެސްގައި ޑޯޓްމަންޑަށް ކުޅެމުން އަންނަ ޖޫޑް ބެލިންހަމްގެ ވާހަކަ ފާހަގަކޮށްފައެވެ. ބެލިންހަމް އަންނަނީ މި ސީޒަންގައި ޑޯޓްމަންޑުގައި މޮޅު ކުޅުމެއް ދައްކަމުންނެވެ.

ގާޑިއޯލާ ބުނީ ޒުވާން އުމުރުގައި ބެލިންހަމް ދައްކަނީ މޮޅު ކުޅުމެއް ކަމަށެވެ. އޭނާ ބުނީ ބެލިންހަމް ސިޓީ، މެންޗެސްޓަރ ޔުނައިޓެޑު، ލިވަޕޫލް، އާސެނަލް، ޗެލްސީ، ޓޮޓެންހަމް ނުވަތަ އިނގިރޭސި ޕްރިމިއާ ލީގުގައި ކުޅޭ މަތީ ފަންތީގެ ޓީމަކަށް ގޮސްފި ނަމަ، އެންމެ އެކަށީގެންވާ ވަގުތު ނުލިބިދާނެ ކަމަށެވެ. ގާޑިއޯލާ ބުނީ ބެލިންހަމްގެ އުމުރުން 17 އަހަރުގައި ވެސް އޭނާ ދެއްކީ ލީޑާޝިޕާއި، މޮޅު ކުޅުން ކަމަށެވެ. ގާޑިއޯލާ ވަނީ އުމުރުން 19 އަހަރުގައި ބެލިންހަމް އިންގްލެންޑުގެ ޤައުމީ ޓީމުގައި ކުޅެމުން އަންނަ ކަން ފާހަގަކޮށް، އެއީ ވެސް އޭނާގެ ހުނަރުހުރި ކަން ސާބިތުކޮށްދޭ ކަމެއް ކަމަށް ބުނެފައެވެ.

މީގެ އިތުރުން ގާޑިއޯލާ ބުނީ ބެލިންހަމް އަކީ ހުނަރުވެރި މޮޅު ކުޅުންތެރިޔެއްކަން އެންމެނަށް ވެސް އެނގޭނެ ކަމަށެވެ. ނަމަވެސް އޭނާ ބުނީ ސިޓީން ބޭނުންވަނީ މެޗުގައި ސިޓީގެ ކޮލެޓީ ދައްކައި މެޗުން މޮޅުވާން ކަމަށެވެ. މި ދެ ޓީމު ބައްދަލުކުރި ފުރަތަމަ ލެގު އޮތީ ސިޓީގެ ދަނޑުގައެވެ. އެ މެޗު ސިޓީން ކާމިޔާބުކުރީ 1-2 އިންނެވެ.

ދެ ވަނަ ލެގުގައި ޑޯޓްމަންޑުގެ ދަނޑުގައި ސިޓީން އެ ޓީމާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ. ސިޓީން ވަނީ މިހާރު ވެސް ގަދަ 16 ގެ ޖާގައެއް ޔަގީންކޮށްފައެވެ.