ރާއްޖެޓީވީގެ، ވޯލްޑް ކަޕަށް ޚާއްސަ ޕޭޖް ލޯންޗްކޮށްފި

ކުރިއަށް އޮތް ފީފާ ވޯލްޑް ކަޕަށް ޚާއްސަކޮށް ރާއްޖެޓީވީން ތައްޔާރުކުރި ވެބް ޕޭޖް ލޯންޗްކޮށްފިއެވެ.

ހޯމަ ދުވަހުގެ ހަވީރު ރާއްޖެޓީވީގައި އޮތް ޚާއްސަ ރަސްމިއްޔާތުގައި މި ޕޭޖް ލޯންޗްކޮށްދެއްވީ، ދިވެހިރާއްޖޭގެ ގައުމީ ފުޓްބޯޅަ ޓީމުގެ ކުރީގެ ކެޕްޓަން އިބްރާހީމް ނޫރައްދީނެވެ. ޕޭޖް ލޯންޗްކުރުމުގެ އިތުރުން، މިފަހަރުގެ މުބާރާތުގައި ރާއްޖެޓީވީގެ އެނަލިސްޓުންގެ ގޮތުގައި ހަރަކާތްތެރިވާ ފަރާތްތަކަށް އިންފޮމޭޝަން ޕެކެއްވެސް ވަނީ ހަވާލުކޮށްފައެވެ. މުބާރާތުގައި ބައިވެރިވާ ޓީމުތަކާއި، ޓީމުތަކުގައި ފާހަގަކުރެވޭ މުހިއްމު ކުޅުންތެރިންގެ މައުލޫމާތު މި ބުކްލެޓުގައި ހިމެނޭނެއެވެ. މި އިންފޮމޭޝަން ޕެކް އެނަލިސްޓުންނާ ހަވާލުކޮށްދެއްވީ ރާއްޖެޓީވީގެ ޑެޕިއުޓީ ޗީފް އޮޕަރޭޓިންގ އޮފިސަރ ނާޒްމީ ސައީދެވެ. މިއީ ވޯލްޑް ކަޕާ ދިމާކޮށް އެނަލިސްޓުންނަށް ޚާއްސަ ބުކްލެޓެއް ރާއްޖޭގައި ދިން ފުރަތަމަ ފަހަރެވެ.

ރަސްމިއްޔާތުގެ ޝަރަފުވެރި މެހެމާނު އިބްރާހީމް ނޫރައްދީން ވަނީ، ރާއްޖެޓީވީން ކުޅިވަރު ހަރަކާތްތަކަށްދޭ ޚާއްސަ އަހަންމިޔަތުކަން ފާހަގަކުރައްވާފައެވެ.

ރާއްޖެޓީވީގެ ޗެއަރމަން އަކްރަމް ކަމާލުއްދީން ވަނީ، ރާއްޖެ ޓީވީއަށް އެކި ގޮތްގޮތުން އިބްރާހީމް ނޫރައްދީން ދެއްވާ އެހީތެރިކަމަށްޓަކައި ޝުކުރުއަދާކުރައްވާފައެވެ. އަދި މިފަހަރުގެ ވޯލްޑް ކަޕް ކަވަރޭޖަށް ރާއްޖެޓީވީން ދުރާލައި ވަރަށް ބޮޑަށް ތައްޔާރުވެފައިވާކަން ފާހަގަކުރެއްވިއެވެ.

މި ކަވަރޭޖްގައި ރާއްޖެޓީވީގެ އެނަލިސްޓުންގެ ގޮތުގައި ހަރަކާތްތެރިވާނީ މައުރޫފް އަހްމަދު (މާއްޓޭ)، މުހައްމަދު ޝިޔާޒް (މޯހަން)، އަހްމަދު ޝާކިރު (ޝާކިއްޓޭ)، ޝާހު އިސްމާއީލް (ސާޔާ)، އަލީ އުމަރު އަދި މުހައްމަދު ނަޒީހުއެވެ. ކުރިއަށް އޮތް ވޯލްޑް ކަޕްގައި ރާއްޖެޓީވީގެ އެނަލިސްޓުންގެ ފަރާތުން މެޗުތައް އެނަލައިޒް ކުރުމުގައި ފުރިހަމަ އެއްބާރުލުން ލިބޭނެކަން ރާއްޖެޓީވީގެ އެނަލިސްޓް، މައުރޫފް އަހުމަދު މާއްޓޭ ފާހަގަކުރިއެވެ.

ރާއްޖެޓީވީން ލޯންޗްކުރި މި ޕޭޖުގައި ވޯލްޑް ކަޕާ ގުޅޭ ގިނަ މައުލޫމާތުތަކެއް ވާނީ ހިމަނާފައެވެ. މިހާތަނަށް ވޯލްޑް ކަޕްގައި ކުޅުނު ހުރިހާ މުބާރާތެއްގެ ތާރީޚު މި ޕޭޖުން ކިޔާލެވޭނެއެވެ. މިފަހަރުގެ މުބާރާތަށް ގަތަރުން ތައްޔާރުވިގޮތާއި، ހޫނު ގައުމެއް ފިނިކުރުމަށް ކުރި މަސައްކަތްވެސް މި ޕޭޖުގެ ޒަރީއާއިން ކިޔުންތެރިންނަށް އެނގިގެންދާނެއެވެ. މީގެ އިތުރުން މުބާރާތަށް ޓީމުތަކުން ވަމުންދާ ތައްޔާރީތަކާއި، މޮޅެތި ކުޅުންތެރިންގެ މައުލޫމާތުވެސް މި ޕޭޖުގައި ހިމަނާފައިވާނެއެވެ.