ރާއްޖޭގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރާކަމަށް ތުހުމަތުކުރާ, ގދ. ހޯޑެއްދޫ، އަލޯރާ، އަރުޝަދު ޚާލިދު ހައްޔަރުކޮށްގެން ހައިކޯޓަށް ހާޒިރުކުރުމަށް އަންގައި ނެރެފައިވާ އަމުރު އޭނާގެ ފަރާތުން ސުޕްރީމް ކޯޓުގައި އިސްތިއުނާފުކުރި މައްސަލަ އާ މެދު ދެން އޮންނަ އަޑުއެހުމެއްގައި ގޮތެއް ނިންމަވާނެ ކަމަށް ސުޕްރީމް ކޯޓުން ވިދާޅުވެއްޖެއެވެ.
އަރުޝަދު ހައްޔަރުކޮށްފައިވަނީ، ލަންކާއިން އޭނާ ރާއްޖެއަށް ޑީޕޯޓުކޮށްލުމުން އެނބުރި ރާއްޖެ އައުމުން މިހިނގާ އޮކްޓޯބަރު މަހުގެ 11 ވަނަ ދުވަހުއެވެ. އޭނާ ލަންކާއިން ޑީޕޯޓުކޮށްލީ އެ ގައުމުން ދުބާއީއަށް ދިއުމުން ދުބާއީއަށް އެތެރެވިޔަނުދީ އަނބުރާ ލަންކާއަށް ފޮނުވާލުމުންނެވެ. އޭނާގެ ބަންދާ މެދު ގޮތެއް ނިންމުމަށް ކޯޓަށް ނުގެން ގޮސް ފުލުހުން ވަނީ އޭނާ ދޫކޮށްލާފައެވެ. އަރުޝަދު ހައިކޯޓަށް ހާޒިރުވެފައިވަނީ އަމިއްލަ އަށް ކަމަށް ވާއިރު ހައިކޯޓުން ވެސް ދެން ވަނީ އޭނާގެ ބަންދާ މެދު ގޮތެއް ނުނިންމޭނެ ކަމަށް ކަނޑައަޅާފައެވެ.
ސުޕްރީމް ކޯޓުގައި މި މައްސަލަ ބައްލަވާ 3 ފަނޑިޔާރުންގެ ބެންޗުގެ ރިޔާސަތު ބަލަހައްޓަވަނީ ފަނޑިޔާރު މަހާޒް އަލީ ޒާހިރެވެ. މި މައްސަލަ ބައްލަވާ ފަނޑިޔާރުންގެ ތެރޭގައި ދެން ހިމެނިވަޑައިގަންނަވަނީ ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު ހުސްނުއްސޫއުދެވެ.
އަރުޝަދު ހައްޔަރުކޮށްގެން ހައިކޯޓަށް ހާޒިރުކުރުމަށް ނެރެފައިވާ އަމުރު އިސްތިއުނާފުކުރުމަށް އަރުޝަދުގެ ފަރާތުން ސުޕްރީމް ކޯޓަށް ހުށަހެޅި މައްސަލަ ހޯމަ ދުވަހު ވަނީ ކުރިއަށް ގެންގޮސްފައެވެ. އަރުޝަދުގެ ފަރާތުން އޭނާގެ ވަކީލު ނޫރުއްސަލާމް ވަނީ ތިން ކަމެއް ފާހަގަކުރައްވާފައެވެ. އޭގެ ތެރޭގައި އެފަދަ އަމުރެއް ނެރުމުގެ އިހުތިޔާރު ކޯޓަށް ލިބިގެންވަނީ ކޯޓަށް ހާޒިރުވުމުގެ ޗިޓު އޭނާ އަށް ރައްދުކޮށްފައި ވަނިކޮށް މަގުބޫލު އުޒުރެއް ނެތި ކޯޓަށް ހާޒިރުނުވުމުން ކަމަށް ވިދާޅުވިއެވެ. މި އަހަރުގެ ޖޫން މަހުގެ ހަތްވަނަ ދުވަހު އެ އަމުރު ނެރުނުއިރު ވެސް އަރުޝަދު ދިޔައީ ހައިކޯޓާއި މުއާމަލާތް ކުރަމުން ކަމަށް ފާހަގަކުރައްވާ ވަކީލު ވިދާޅުވީ އަރުޝަދު ހައްޔަރުކޮށްގެން ކޯޓަށް ހާޒިރުކުރަން ޖެހޭ ފަަދަ ހާލަތެއް ނެތް ކަމަށެވެ.
މީގެ އިތުރުން އަރުޝަދު ހާޒިރުވުމަށް އެންގި އަމުރުގައި ކޯޓަށް ހާޒިރުކުރަންވީ ވަގުތާއި ތާރީހު ހިމަނާފައެއް ނުވާކަމަށާއި އެ އަމުރުގައި އެންމެ ފަނޑިޔާރެއްގެ ސޮއި އޮތް އިރު ހައިކޯޓުގެ މައްސަލަތައް ބަލަންވާނީ އޮނަހިރި އަދަދެއްގެ ފަނޑިޔާރުންގެ ބެންޗަކުން ކަމަށް ނޫރުއްސަލާމް ފާހަގަކުރެއްވިއެވެ.
ނޫރުއްސަލާމްގެ އެ ނުކުތާތަކާއި ގުޅިގެން ދައުލަތުގެ ވަކީލު ވިދާޅުވީ މާލޭން ބޭރަށް އެއްވެސް ތަނަކަށް ދަތުރުކުރާނަމަ ހައިކޯޓަށް އަންގާނެ ކަމަށް އެއްބަސްވެ، އެކަމާއި ގުޅޭ އެއްބަސްވުމެއްގައި އަރުޝަދު ސޮއިކޮށްފައިވާ ކަމަށް ހައިކޯޓުގެ ފަނޑިޔާރުން ފާހަގަކުރައްވާ ކަމަށެވެ. އަރުޝަދު ހައްޔަރުކުރުމަށް ހައިކޯޓުން އަމުރުކުރުމުން އަމަލު ކުރަންވީ ގޮތުގެ އިރުޝާދު ޕީޖީ އޮފީހުން ފުލުހުންނަށް ދެމުން ދަނިކޮށް އެކަމުގައި ފުލުހުން އަމަލު ކޮށްފައިވަނީ އެ އަމުރާ ހިލާފަށްކަމަށާއި، އެހެންކަމުން އޭނާ ހައްޔަރުކޮގެން ކޯޓަށް ހާޒިރުކުރުމުގެ އަމުރު ނެރުމަށް ހައިކޯޓަށް ގާނޫނީ އެއްވެސް ހުރަހެއް ނެތް ކަމަށް ދައުލަތުގެ ވަކީލު ވިދާޅުވިއެވެ. އަދި އެންމެ ފަނޑިޔާރެއްގެ ސޮއި އޮތުމަކީ ވެސް މައްސަލަ އެއް ނޫން ކަމަށް ދައުލަތުގެ ވަކީލު ވިދާޅުވިއެވެ.
މި މައްސަލަ ސުޕްރީމް ކޯޓުގައި އިސްތިއުނާފުކޮށްފައިވާއިރު، އެންމެ ފަހުން އަރުޝަދު ދޫކޮށްލަން ހައިކޯޓުން ނިންމާފައިވާ ނިންމުން ވެސް ދައުލަތުގެ ފަރާތުން ސުޕްރީމް ކޯޓުގައި ވަނީ އިސްތިއުނާފްކޮށްފައެވެ. ބަންދުގައި ބަހައްޓައިގެން ހައިކޯޓަށް އަރުޝަދު ހާޒިރުކުރަން ފުލުހުންގެ މައްޗަށް އަމުރުކޮށްފައި ވަނިކޮށް, ހައިކޯޓުގެ އެންގުމާ ޚިލާފަށް އަމަލުކޮށްފައިވާތީ ޕްރޮސެކިއުޓަރ ޖެނެރަލްގެ އޮފީހުން ވަނީ އެ މައްސަލަ ޕޮލިސް އިންޓެގްރިޓީ ކޮމިޝަނަށް ހުށަހަޅާފައެވެ.
