ކުރިއަށް އޮތްތަނުގައި އިންތިހާބީ ކުށެއްކޮށްފި ނަމަ، ވޯޓުލާ މަރުކަޒުގައި ނޫޅެވޭނެ
ގަވައިދުގެ 29 މާއްދާގެ ފަހަތަށް 1-29ގެ ނަމުގައި މާއްދާއެއް ވަނީ އިތުރުކޮށްފައި
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ވޯޓުލުން
އިލެކްޝަންސް ކޮމިޝަން (އީސީ) އިން ރާއްޖޭގައި ބާއްވާ އިންތިހާބުތަކުގައި ކުށެއް ކޮށްފައިވާ މީހެއް ކަމަށް ވާނަމަ އެ ފަދަ މީހަކަށް އޮފިޝަލެއްގެ ގޮތުގައި ހަރަކާތްތެރި ނުވެވޭ ގޮތަށް އިންތިހާބުތަކާ ބެހޭ އާންމު ގަވާއިދަށް އިސްލާހު ގެނެސްފިއެވެ.
އިންތިހާބުތަކާ ބެހޭ އާންމު ގަވާއިދުގައި ބުނެފައިވަނީ ވޯޓުލާ މަރުކަޒުގައި ހަރަކާތްތެރިވާ މަންދޫބުން ހަރަކާތްތެރިވުމުގެ ފުރުސަތު އިލެކްޝަންސް ކޮމިޝަނުން ފަހިކޮށްދިނުމަކީ ލާޒިމް ކަމެއް ކަމަށެވެ. ވޯޓުލާ މަރުކަޒުގައި ހަރަކާތްތެރިވާ މަންދޫބުންގެ ކިބައިގައި ހުންނަން ޖެހޭ ޝަރުތުތައް ވެސް އެ ގަވާއިދުގައި ވަނީ ބަޔާންކޮށްފައެވެ. އެ ޝަރުތުތަކުގެ ތެރޭގައި ހިމެނެނީ ދިވެއްސަކަށްވުމާއި، އުމުރުން 18 އަހަރު ފުރިފައިވުމުގެ އިތުރުން ޖިނާއީ ކުށެއްގެ ހުކުމް ތަންފީޒު ކުރެވެމުންދާ މީހެއްކަމުގައި ނުވުމާއި، އެ އިންތިހާބަކާބެހޭ އެއްވެސް މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި ނުވުމުގެ އިތުރުން ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް ނުވަތަ ވެރިއެއް ކަމުގައި ނުވުމެވެ. މީގެ އިތުރުން ދިވެހި ފުލުހެއް ކަމުގައި ނުވަތަ ސިފައިންގެ މީހެއް ކަމުގައި ނުވުމާއި، ކުށެއްގެ ތުހުމަތުގައި ބަންދުކޮށްފައި ހުރި މީހަކު ކަމުގައި ނުވުން އަދި އިންތިހާބުގައި އިތުރު މަގާމަކަށް ކުރިމަތިލައިފައިވާ މީހެއް ކަމުގައި ނުވުން އެ ޝަރުތުތަކުގެ ތެރޭގައި ހިމެނެއެވެ.
އީސީއިން ކޮށްފައިވާ އިއުލާނުގައި ބުނެފައި ވަނީ އެ ގަވާއިދުގެ 29 މާއްދާގެ ފަހަތަށް 1-29ގެ ނަމުގައި މާއްދާއެއް އިތުރުކޮށްފައިވާ ކަމަށެވެ. އެގޮތުން އިތުރު ކުރި މާއްދާގައި ބުނެފައި ވަނީ އިންތިހާބުތަކާ ބެހޭ އާންމު ގަވާއިދުގައި ބަޔާންކޮށްފައިވާ ޝަރުތުތައް ފުރިހަމަވި ނަމަވެސް، އޮބްޒާވަރަކީފާއިތުވި ފަސް އަހަރު ދުވަހުގެ ތެރޭގައި އިންތިހާބީ ކުށެއް ސާބިތުވެފައިވާ މީހެއް ނަމަ، ނުވަތަ އިންތިހާބުގައި އަމަލުކުރަންޖެހޭ ސުލޫކީ މިންގަނޑާ ހިލާފުވެފައިވާކަން ކޮމިޝަނަށް ސާބިތުވެފައިވާ މީހެއް ނަމަ، އެ މީހަކަށް އިންތިހާބުގައި އޮބްޒާވަރެއް، މޮނީޓަރެއް ނުވަތަ ކެންޑިޑޭޓުންގެ މަންދޫބެއްގެ ގޮތުގައި ހަރަކާތްތެރިވުމުގެ ހުއްދަ ދޫނުކުރުމުގެ އިހުތިޔާރު އެ ކޮމިޝަނަށް ލިބިގެންވާ ކަމަށެވެ. އެ ގަވާއިދަށް އެ ކޮމިޝަނުން އަމަލުކުރަން ފެށީ ނިމިދިޔަ ބުރާސްފަތި ދުވަހުން ފެށިގެންނެވެ.
