ޒުވާނުން ޑެސްކް ވަޒީފާތައް ދޫކޮށް، އަމިއްލަ ވިޔަފާރިތަކާ ދިމާއަށް!

ޒަމާނުއްސުރެ ދިވެހިންގެ މެދުގައި އޮތް ވިސްނުމަކީ ސަރުކާރުގެ ވަޒީފާއެއް ނުވަތަ ކުންފުންޏެއްގެ މަގާމެއް އަދާކުރުމުގެ ވިސްނުމެވެ. ޑެސްކް ވަޒީފާއެއް އަދާކުރުމެވެ. ގިނަ މީހުންގެ އިހުތިރާމުވެސް ލިބެނީ އެފަދަ ވަޒީފާ އަދާކުރާ މީހުންނަށް ކަމަށްވާތީއެވެ. އެއީ ޔަގީންނުންވެސް މަސް ނިމޭއިރު ކަނޑައެޅިފައި އޮންނަ މުސާރަ އަތަށް ލިބޭތީއެވެ. ގިނަ މީހުން މިގޮތް ޚިޔާރު ކުރަނީ، ކުޑައިރުން ފެށިގެން އެގޮތަށް ކިޔައިދެވިފައި އޮންނަތީ ކަމަށްވެސް ވެދާނެއެވެ. އަންހެންކުއްޖަކުނަމަ ނަރުހަކަށްވުމާއި ފިރިހެންކުއްޖަކުނަމަ ފުލުހަކަށްވުމަށް ބާރުއަޅާގޮތަށް ޑެސްކް ވަޒީފާތައް އަދާކުރުމަށް ހިތްވަރުދޭ ބެލެނިވެރިން މަދެއްނޫނެވެ.

ރާއްޖޭގެ މިހާރުގެ ހާލަތު ދަނީ މަޑުމަޑުން ތަފާތުވަމުންނެވެ. ޒަމާން ކުރިއަރައިގެންދާ ވަރަކަށް އަމިއްލަ މިނިވަންކަން ބޭނުންވާ މީހުންގެ އަދަދު ދަނީ އިތުރުވަމުންނެވެ. އަމިއްލަ ދިރިއުޅުމުގެ ކަންކަން އަމިއްލައަށް ނިންމަން ބޭނުންވާގޮތަށް، އަދާކުރާ ވަޒީފާގައިވެސް މީހެއްގެ ނުފޫޒަކާނުލައި މަސައްކަތް ކުރަން ބޭނުންވެއެވެ. އެގޮޮތަށް އާމްދަނީ ހޯދެން އޮތް ގޮތަކީ އަމިއްލަ ވިޔަފާރިއެއް ފެށުމެވެ. އޭރުން އެ ވިޔަފާރިއެއްގެ ހުރިހާ ނިންމުމެއްވެސް އޮންނަނީ އަމިއްލަ އަތްމަތީގައެވެ. މީހެއްގެ ނުފޫޒު އެއަކަށް ނުފޯރާނެއެވެ. މިއީ މިއަދު ގިނަ ޒުވާނުން ބޭނުންވާގޮތެވެ.

އަމިއްލަ ވިޔަފާރިތައް ރާއްޖޭގައި ދަނީ ދުވަހަކަށްވުރެ ދުވަހެއް އިތުރުވަމުންނެވެ. ގޭގައި ތިބެގެން، ތަކެތި އުފައްދައިގެން އެތަކެތި ވިއްކުމަކީވެސް އަމިއްލަ ވިޔަފާރިއެކެވެ. ބައެއް މީހުން ޕާޓް ޓައިމްކޮށް މިފަދަ ވިޔަފާރިތައް ހިންގާއިރު، އަނެއް ބަޔަކު ފުލް ޓައިމް މަސައްކަތަކަށް އެ ވިޔަފާރި ހަދައި، ވިޔަފާރި ފުޅާވެސް ކުރެއެވެ. ގިނަ ބަޔަކު މިކަމުގައި ކާމިޔާބުވެސް ވެއްޖެއެވެ.

ކާބޯތަކެތީގެ ދާއިރާއިންނާއި ރީތިވާ ސާމާނާއި ޓެކްނޮލޮޖީއާއި ގަހަނާފަދަ ތަކެތި އުފެއްދުމުގައި މިއަދު ދިވެހި ޒުވާނުންގެ އަމިއްލަ ކުންފުނިތައް ދަނީ މަގުބޫލުކަން ހޯދަމުންނެވެ. މި ކުންފުނިތަކުގެ ކާމިޔާބުގެ ވާހަކަތައް މިއަދު މުޅި ރާއްޖެ ދައްކަމުން އަންނައިރު، އެފަދަ ކުންފުނިތައް އުފެއްދުމަކީ އެ ޒުވާނުން ނަގާފައިވާ ވަރަށް ބޮޑު ރިސްކެއްގެ ކާމިޔާބީއެވެ.

ތެދެކެވެ. އަމިއްލަ ވިޔަފާރިއެއް ފެށުމަކީ ވަރަށް ބޮޑު ހިރާހެކެވެ. ވަޒީފާއެއް އަދާކުރާ މީހެއްނަމަ އަމިއްލަ ވިޔަފާރިއެއް ފަށަން ޚަރަދުކުރަންޖެހެނީ ބުރަ މަސައްކަތުން އެއްކޮށްގައި ހުރި ފައިސާކޮޅެވެ. ނުވަތަ އެހެން ކޮންމެވެސް ގޮތަކަށް އެ ވިޔަފާރި ފަށަން ފައިސާ ހޯދައި ދަރަނިވެރިވާން ޖެހެއެވެ. މިގޮތަށް ވިޔަފާރިއެއް ފެށުމުގެ އެންމެ ބޮޑު ހިރާހަކީ އެ ވިޔަފާރި ކާމިޔާބުނުވުމެވެ. ނަމަވެސް ހިރާހަކާނުލައި ކާމިޔާބީ ހާސިލްވާނެކަމަށް ގަބޫލުކުރުމަކީވެސް ރަނގަޅުގޮތެއްނޫނެވެ.

ދިވެހިންގެ ތެރޭގައި އަމިއްލަ ވިޔަފާރިތައް އިތުރުވާންފެށީ ކޮވިޑް-19ގެ ސަބަބުން ވަޒީފާއާމެދު ސުވާލުތައް އުފެދެން ފެށުމުންނެވެ. އެހެން ބައެއްގެ ދަށުން މަސައްކަތްކުރާއިރުވެސް އެ ނެގެނީ ރިސްކެއްކަން ވިސްނުމުންނެވެ. މިއަދު ވަޒީފާ އޮތްނަމަވެސް މާދަމާ އެ ވަޒީފާ އޮންނާނެކަމުގެ ޔަގީންކަމެއް ނެތެވެ. ހާލަތު ބަދަލުވެ، އެތައް ބައެއްގެ ވަޒީފާތައް ގެއްލިގެންދިޔައީ ދެތިން މަސްދުވަހުގެ ތެރޭގައެވެ. އާމްދަނީ ނުލިބި ގޭގައި މަޑުކުރަން ޖެހުނު މީހުންގެ އަދަދު މަދެއްނޫނެވެ. އެއާއެކު އާމްދަނީ ހޯދަން އަމިއްލަ މަސައްކަތްތައް ފަށައި، އެ މަސައްކަތް ބޮޑެތި ވިޔަފާރިތަކަށްވެސް ވަނީ ބަދަލުކޮށްފައެވެ.

އަމިއްލަ ވިޔަފާރި ފަށާ ފަރާތްތަކަށް މިއަދު ރާއްޖޭގައި ފުރުސަތުތައްވެސް އެހާ ގިނައެވެ. ސަރުކާރުންވެސް އަމިއްލަ ވިޔަފާރިތަކަށް އެހީތެރިކަން ފޯރުކޮށްދޭއިރު، ބޭންކުތަކާއި ކުންފުނިތަކުންވެސް އެފަދަ ވިޔަފާރިތައް ކުރިއަރުވަން އެހީތެރިކަން ފޯރުކޮށްދެއެވެ.

ރިސްކު ނަގައިގެން ކާމިޔާބު ހާސިލްކުރި ގިނަ ފަރާތްތަކުން އަމިއްލަ ވިޔަފާރިއެއް ފަށަން ބޭނުންވެފައި ހުރި ކޮންމެ މީހަކަށްވެސް ދޭނެ މެސެޖަކީ އެ ރިސްކު ނެގުންކަން ޔަގީނެވެ. ދުނިޔޭގައި އަދި ރާއްޖޭގެވެސް މިއަދު ބޮޑެތި ކުންފުނިތަކުގެ ގޮތުގައި ފާހަގަކުރާ ކުންފުނިތަކަކީ ކޮންމެވެސް މީހަކު ނެގި ރިސްކެއްގެ ނަތީޖާއެވެ.