އެންޑީއޭގެ ސީއީއޯގެ މަގާމަށް އިމާދު ސޯލިހް - މަހެއްހާ ދުވަހުގެ ތެރޭގައި ބަދަލު ދެއްކެވުމުގެ އުންމީދުގައި
އެންޑީއޭއަށް ގޮންޖެހުންތައް ގިނަ
އަލްއުސްތާޒު އިމާދު ސޯލިހު
މަގާމާ ރަސްމީކޮށް ހަވާލުވެވަޑައިގަންނަވާތާ މަހެއްހާ ދުވަހުގެ ތެރޭގައި ބަދަލު ދެއްކެވުމުގެ އުންމީދުގައި ހުންނެވިކަމަށް، ނޭޝަނަލް ޑްރަގް އެޖެންސީ (އެންޑީއެމްއޭ)ގެ އާ ސީއީއޯ އަލްއުސްތާޒު އިމާދު ސޯލިހު ވިދާޅުވެއްޖެއެވެ.
އެ މަގާމަށް އައްޔަންކުރެއްވިފަހުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އިމާދު ވަނީ، މަސްތުވާތަކެތީގެ މައްސަލައަކީ ރާއްޖެއަށް ދިމާވެފައިވާ އެންމެ ބޮޑު އެއް މައްސަލަކަމަށް ފާހަގަކުރައްވާފައެވެ. އަދި އެ މައްސަލަ އެއްކޮށް ނައްތާލުމަކީ ކުރުން ދަތިކަމަކަށް ވާނެކަން ފާހަގަކުރައްވައި އިމާދު ވިދާޅުވީ، މަސްތުވާތަކެތި ބޭނުންކުރުން ހުއްޓުވައި، އެފަދަ މީހުން އަނބުރާ މުޖުތަމައަށް ނެރުމުގައި ވަރަށް ގިނަ ގޮންޖެހުންތައް އެބަހުރިކަމަށެވެ. އެގޮތުން ވަސީލަތުގެ ދަތިކަމާއި، ތަޖުރިބާހުރި މީހުން ނުލިބުމުގެ މައްސަލަ ވަރަށް ބޮޑަށް ދިމާވާކަން އޭނާ ވަނީ ފާހަގަކުރައްވާފައެވެ. އެހެންނަމަވެސް އެ ދަތިތަކުން އަރައިގަނެ، ކަންކަން ހައްލުކުރަން މަސައްކަތްކުރަން ތައްޔާރަށް ހުންނެވިކަން އޭނާ ވަނީ ފާހަގަކުރައްވާފައެވެ. އެގޮތުން އެންޑީއޭގެ ދައުރު ފުޅާކޮށް، ކުރިއަށް އޮތްތަނުގައި އެންޑީއޭއަކީ ބަލައިގަންނަތަނަކަށް ހެދުމަށް މަސައްކަތްޕުޅު ކުރައްވާނެކަން އިމާދު ވަނީ ފާހަގަކުރައްވާފައެވެ.
އެންޑީއޭގެ ސީއީއޯއަކަށް އިމާދު އައްޔަންކުރައްވާފައި ވަނީ 18 ޖެނުއަރީ 2021ގައި، އެންމެ ފަހުން އައްޔަން ކުރި ސީއީއޯ މަގާމުން ވަކިކުރިފަހުން ގިނަ ދުވަސްތަކެއް ވަންދެން އެ މަގާމު ހުސްކޮށް އޮތުމަށްފަހުއެވެ. އެ މަގާމަށް މީހަކު ހޯދަން ފުރަތަމަ ކުރި އިއުލާނަށް އިޖާބަ ނުލިބުމުން ފަހުން އެ އިއުލާންކޮށްފައި ވަނީ މަގާމުގެ ޓީއޯއާރް އިސްލާހުކޮށް، ޕޭކޮމިޝަން މެދުވެރިވެގެން އެ މަގާމުގެ މުސާރައާއި އިނާޔަތްތަކަށް އިސްލާހު ގެނައުމަށް ފަހުގައެވެ. އެ މަގާމަށް 12 ފަރާތަކުން ކުރިމަތިލެއްވިއެވެ.
