ރޮނަލްޑޯއަށް ފުރުޞަތެއް ނުދިން، މެޗު ނުނިމެނީސް ބެންޗު ދޫކޮށް ދިޔައީ!

އިނގިރޭސި ޕްރިމިއަރ ލީގުގައި ޓޮޓެންހަމް އަތުން ފުރިހަމަ މޮޅެއް ހޯދި ނަމަވެސް މެޗު ނުނިމެނީސް ކްރިސްޓިއާނޯ ރޮނަލްޑޯ ބެންޗު ދޫކޮށް ދިއުމުން, އެކަމަށް ސަމާލުކަން ބޮޑުވެ ފާޑުކިޔުންތައް އަމާޒުވެއްޖެއެވެ.

2-0 ން ޓޮޓެންހަމް އަތުން މޮޅުވި މެޗުގެ ފުރަތަމަ އެގާރައިންވެސް އަދި ބަދަލެއްގެ ގޮތުގައިވެސް 37 އަހަރުގެ ރޮނަލްޑޯއަށް ފުރުޞަތެއް ނުދިނެވެ. ފަސް ބަދަލު ގެނައުމުގެ ފުރުޞަތު އޮތް ނަމަވެސް ކޯޗު ޓެން ހާގު ގެނައީ ތިން ބަދަލެވެ. 87 ވަނަ މިނެޓުގައި ޓެން ހާގު ދެބަދަލެއް ގެނައެެވެ. ސަންޗޯގެ ބަދަލުގައި ފުރުޞަތު ދިނީ އެލަންގާއަށެވެ. ކަސެމީރޯގެ ބަދަލުގައި ފުރުޞަތު ދިނީ ކްރިސްޓިއަން އެރިކްސެން އަށެވެ. ރޮނަލްޑޯ ބެންޗު ދޫކޮށް ދިޔައި އޭގެ މިނެޓެއް ފަހުން 89 ވަނަ މިނިޓްގައެވެ.

މެޗަށްފަހު ކޯޗު ޓެން ހާގު ބުނީ އޭނާއަށް ރޮނަލްޑޯ ދިޔަކަން އެނގޭ ކަމަށާއި, ފެނުނު ކަމަށެވެ. އެކަމަކު އެވަގުތު އޭނާއާ ވާހަކަ ނުދައްކާ ކަމަށެވެ. މިއީ މެޗުން މޮޅުވެ އުފާ ފާޅުކުރާ ވަގުތު ކަމަށާއި, އެކަމަކު ފަހުން ރޮނަލްޑޯއާ ވާހަކަ ދައްކާނެކަމަށް ޓެން ހާގު ބުންޏެވެ. ރޮނަލްޑޯގެ މިއަމަލާ ގުޅިގެން ފުޓްބޯޅައިގެ ތަޖުރިބާކާރުންގެ ފާޑުކިޔުންތައް ވެސް ވަނީ އޭނާއަށް އަމާޒުވެފައެވެ. ޚާއްޞަކޮށް ރަނގަޅު މެޗަކަށްފަހު ފުރިހަމަ މޮޅެއް ހޯދުމުން ވެސް މެޗުގައި ނުވެސް ކުޅޭ ކުޅުންތެރިއެއްގެ ވާހަކަ ދައްކަން ޖެހުމުން ފާޑުކިޔުންތައް ބޮޑުވިއެވެ.