އުކުޅަހުގެ މަގު ހެދުމުގެ މަޝްރޫޢު އެމްޓީސީސީ އާ ހަވާލުކޮށްފި
މިމަޝްރޫއަކީ 59.48 މިލިއަން ރުފިޔާގެ މަޝްރޫއެއް
އއ އުކުޅަސް މަގު ހެދުމުގެ މަޝްރޫޢުގެ އެއްބަސްވުމުގައި ސޮއިކުރަނީ
އއ އުކުޅަސް މަގު ހެދުމުގެ މަޝްރޫޢު އެމްޓީސީސީ އާ ހަވާލުކޮށްފިއެވެ.
މިމަޝްރޫޢުގެ މަސައްކަތް ހަވާލުކުރުމަށް ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރު އާދަމް އާޒިމް އެވެ. މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ފާތުމަތު ޝާނާއެވެ.
މިމަޝްރޫޢުގެ ދަށުން 2678 މީޓަރުގެ 10 މަގެއް ތަރައްގީކުރާނެއެވެ. މިމަގުތަކުގައި ފެން ހިންދާ ނިޒާމެއް ގާއިމުކުރުމާއި ސެޓެލްމަންޓް ޓޭންކެއް ބެހެއްޓުމާއި ކޭބަލް ޖަންކްޝަން ބޮކްސް އެއް ވަޅުލުމާއި 4193 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި 14،452 އަކަ މީޓަރުގެ ކެރިއެޖްވޭ ސަރަހައްދެއް ގާއިމުކުރުމާއި މަގު ބައްތި ހަރުކުރުމާއި މަގުމަތީ ނިޝާން ކުރެހުމާއި ކަފިހި ހުރަސް ފާހަގަކުރުމާއި ސްޕީޑް ބްރޭކަރ ހަރުކުރުމާއި މަގުމަތީ ސަލާމަތީ ސައިން ބޯޑު ހަރުކުރުމުގެ މަސައްކަތް ކުރާނެއެވެ.
މިމަޝްރޫއަކީ 59.48 މިލިއަން ރުފިޔާގެ މަޝްރޫއެކެވެ. މިމަޝްރޫއު ނިންމުމަށް ހަމަޖެހިފައިވަނީ 450 ދުވަސްތެރޭގައެވެ.
އއ. އުކުޅަހުގެ އާބާދީގެ ގޮތުގައި 1059 މީހުން ލިޔެކިޔުންތަކުން ފެންނަން އޮތަސް ރަށުގައި 1700 މީހުން ދިރިއުޅެމުން އަންނަކަމަށް އެރަށު ކައުންސިލުން ބުނެއެވެ. މީގެ މައިގަނޑު ސަބަބަކީ އއ. އުކުޅަހުގައި ގެސްޓްހައުސް ވިޔަފާރި ވަރަށް ބާރު ސްޕީޑުގައި ކުއިއަރާފައިވުމެވެ. ފަތުރުވެރިކަމުގެ ސިނާއަތަށް 50 އަހަރުވެގެން ބޭއްވި އިނާމު ދިނުމުގެ ހަފްލާގައި އެންމެ ކުރިއަރަމުން އަންނަ ގެސްޓްހައުސް މަންޒިލުގެ ރަން އެވޯޑުވެސް ހޯދާފައިވަނީ އއ. އުކުޅަހުންނެވެ.
މިރަށުގައި ފަތުރުވެރިކަމަށް ރެޖިސްޓަރުކޮށް ހިންގަމުންދާ 34 ގެސްޓްހައުސް މިހާރުވެސް އެބަހުއްޓެވެ. ފަތުރުވެރިކަން އެންމެ ރަނގަޅު ދުވަސްވަރުގައި ރަށުގައި ދިރިއުޅޭ މީހުންގެ އަދަދު 2،000 އާއި ގާތްކުރާނެކަމަށް ކައުންސިލުން ލަފާކުރެއެވެ. އެގޮތުން މިރަށުގައި ރައްޔިތުންނާއި އަދި ރަށަށް ޗުއްޓީ ހޭދަކުރަން އަންނަ ފަތުރުވެރިންނަށްވެސް އެންމެ ދަތިވާކަމަށް ފާހަގަކުރާ އެއް ކަމަކީ ރަށުގެ މަގުތައް ރަނގަޅު ފެންވަރަކަށް ހެދިފައި ނެތުމެވެ.
ވިއްސާރަ ދުވަސްކޮޅެއްނަމަ މިހާރުވެސް ފެން ރަނގަޅަށް ނުހިނދި އެތައް ދުވަހެއް ހުރެއެވެ. އަދި މަގުގައި އެތަކެއް އަޑިގުޑަންތައް ހުރުމުގެ ސަބަބުން ހިނގާ މީހުންނާއި ދުއްވާ ތަކެއްޗަށް އެތަކެއް ދަތިތަކާއި ދަނީ ކުރިމަތިވަމުންނެވެ. މަގު ހިކިފައި އޮންނައިރު ހިރަފުހުގެ އުނދަގޫވެސް އެހާމެ ބޮޑުކަމަށް ރައްޔިތުން ބުނެއެވެ. އއ. އުކުޅަހަކީ އެ އަތޮޅަށް ބަލާއިރުވެސް އެންމެ ގިނަ އަދަދަކަށް ސައިކަލު އަދި ރަށު ޕިކަޕް ބޭނުންކުރަމުން އަންނަށް އެއް ރަށްކަމަށް ކައުންސިލުން ފާހަގަކުރެއެވެ.
ފެނާއި ނަރުދަމާގެ މަސައްކަތް ރަށުގައި ފުރިހަމަވެފައިވުމާއެކު އެ ރަށު ރައްޔިތުންގެ މިހާރު އޮތް އެންމެ ބޮޑު އެއް އުންމީދަކީ މަގުތައް ރަނގަޅު ފެންވަރަކަށް ހެދޭނެ ދުވަހަކަށް ކަމުގައި ކައުންސިލުން ބުނެއެވެ. އެހެންކަމުން މިސޮއިކުރެވުނު މަޝްރޫޢާއެކު، އުކުޅަހުގެ މަގުތައް ޒަމާނީ ފެންވަރަކަށް ތަރައްޤީ ކުރާނެ ދުވަހަކަށް އެ ރަށުގެ ރައްޔިތުން ކުރަމުން އައި އިންތިޒާރު ނިމުމަކަށް އަންނާނެއެވެ.
