ޕޮލިސް ޗެކްޕޮއިންޓަކުން ސަލާމަތްވާން އުޅުނު މީހަކު އަތުން ފެނުނު މަސްތުވާތަކެތީގެ މައްސަލައިގައި އުމުރު ދުވަހުގެ ޖަލު ހުކުމެއް
ފެނުނު ތަކެތި ތަހުލީލު ކުރި އިރު، އޭގައި 5.0862 ގްރާން މެޓަމްފެޓަމިން ރެސިމޭޓް ހުރި
ފުލުހުން މަގުމަތި ބަލަހައްޓަނީ
ފުލުހުންގެ ޗެކްޕޮއިންޓަކުން ސަލާމަތްވާން ސައިކަލް ޕާކްކުރި މީހަކު ބަލާ ފާސްކުރި އިރު ފެނުނު މަސްތުވާތަކެތީގެ މައްސަލައިގައި އުމުރު ދުވަހު ޖަލުހުކުމެއް އިއްވައިފިއެވެ.
މި މައްސަލައަކީ 22 ނޮވެމްބަރު 2022 ވަނަ ދުވަހުގެ ދަންވަރު 12:40 ހާއިރު، ފާށަނާކިލޭގެފާނު މަގުގައި ހުންނަ ފަސޭހަ ޕޮއިންޓް 2 ކައިރީގައި ފުލުހުންގެ ޗެކްޕޮއިންޓަރުން އެއްގަމު އުޅަނދު ބަލާފަސްކުރަމުން ދިޔަ އިރު، އެވަގުތު ކ. މާލެ، ހ. ސަތުހު، މިސްހާދު ނަޝީދު ސައިކަލެއްގައި ދުއްވާފައި އައިސް ފުލުހުން ފެނުމުން ސައިކަލު ޕާކުކުރަން އުޅުމުން، މިސްހާދު ނަޝީދުގެ އަމަލުތަކާމެދު ފުލުހުންނަށް ޝައްކުކުރެވިގެން ހުއްޓުވައި ބަލާ ފާސްކޮށްފައިވެއެވެ.
މިސްހާދު ހުއްޓަވައި ބަލާ ފާސްކުރަމުންދަނިކޮށް، މިސްހާދުގެ ކަނާއަތުގެ މުށުތެރެއިން ހުރި ދިމާ ބިންމައްޗަށް ރަބަރު ޕެކެޓެއް ވައްޓާލިތަން ފުލުހުންނަށް ފެނިފައިވެއެވެ. އަދި ފެނުނު ތަކެތި ތަހުލީލު ކުރި އިރު، އޭގައި 5.0862 ގްރާން މެޓަމްފެޓަމިން ރެސިމޭޓް ހުރިކަމަށް މަސްތުވާތަކެއްޗާ ބެހޭ ތަހްލީލު ރިޕޯޓުން ދެއްކިއެވެ.
އަދި މި ވާގިއާތުގެ މައްޗަށް ބިނާކޮށް، މިސްހާދުގެ މައްޗަށް ޖަދުވަލު 1 ގައިވާ މަސްތުވާއެއްޗެއް ޓްރަފިކް ކުރުމުގެ ކުށުގެ ދައުވާ އުފުލައި، މަސްތުވާތަކެއްޗާ ބެހޭ ގާނޫނުގެ 111 ވަނަ މާއްދާގެ (ހ) އާއި 140 ވަނަ މާއްދާގެ (ށ) އާއި ހަވާލާދީ މި ގާނޫނޫގެ 111 ވަނަ މާއްދާގެ (ނ) ގެ ދަށުން ދައުވާ އުފުލާފައިވެއެވެ.
މި ދައުވާ ނިންމި ގޮތަކީ ޕްރޮސެކިއުޝަންއިން ހުށަހެޅި ހެކިންގެ ހެކިބަހުން، މިސްހާދު ނަޝީދު މި ކުށްކުރިކަމަށް އެކަށީގެންވާ ހެކި ޝަރީއަތަށް ލިބިފައިވާތީ، ގާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޖަދުވަލު 1 ގައިވާ މަސްތުވާތަކެއްޗެއް ޓްރެފިކް ކުރުމުގެ ކުށުގެ ދައުވާ މިސްހާދުގެ މައްޗަށް ސާބިތުވާ ކަމަށް ކަނޑައަޅާ ކަމަށެވެ.
މި މައްސަލައިގައި ހުކުމުގައި ބުނެފައިވަނީ މަސްތުވާތަކެއްޗާއިބެހޭ ގާނޫނުގެ 111 ވަނަ މާއްދާގެ (ހ) ގެ ދަށުން، މިސްހާދު ނަޝީދު، ޖަދުވަލު 1 ގައިވާ މަސްތުވާތަކެއްޗެއް ޓްރެފިކްކުރުމުގެ ކުށުން ކުށްވެރިވެއްޖެކަމަށް ކަނޑައަޅައި، މި ކުށުގެ އުގޫބާތެއްގެ ގޮތުން، މަސްތުވާތަކެއްޗާބެހޭ ގާނޫނުގެ 111 ވަނަ މާއްދާގެ (ނ) އާއި ހަވާލާދީ، މިސްހާދު 25 އަހަރު ދުވަހުގެ މުއްދަތަކަށް ޖަލަށްލުމާއެކު، 100،000 ރުފިޔާއިން ޖޫރިމަނާކުރުމަށް ކަނޑައަޅައި، މި ފައިސާ 1 އަހަރު ދުވަހުގެ ތެރޭގައި މީރާއަށް ދެއްކުމަށް ވަނީ ހުކުމްކޮށްފައެވެ.
މި މައްސަލަ ބެއްލެވީ ގާޒީ އިސްމާއިލް ޝަފީއުއެވެ.
