ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން ސެވިއްޔާ އެއްވަރުވެއްޖެއެވެ.
ލީގުގައި އަންގާރަ ދުވަހުގެ ރޭ ސެވިއްޔާގެ އަމިއްލަ ދަނޑުގައި ކުޅުނު މެޗުން އެ ޓީމު އެއްވަރުވީ 1-1 އިންނެވެ.
މެޗުގައި ފުރަތަމަ ލަނޑު ޖަހާ ލީޑު ނެގީ ވެލެންސިއާ އިންނެވެ. އެއީ މެޗުގެ ހަ ވަނަ މިނެޓުގައި ވެލެންސިއާގެ ޑިމިޓްރީ ފައުކުއާ ނަގައިދިން ހުރަހެއް ސެވިއްޔާގެ އޭރިޔާ ތެރޭގައި ހުރެ ބޮލުން ގޯލަށް ފޮނުވާލައިގެން އެޑިސަން ކަވާނީ ކާމިޔާބުކޮށްދިން ލަނޑެކެވެ. ނަތީޖާ ހަމަހަމަ ކުރުމަށް ލިބުނު ފުރުސަތުގައި ސެވިއްޔާގެ ފަރާ މިރް ބޮލުން ފޮނުވާލި ބޯޅަ ވެލެންސިއާގެ ގޯލް ކީޕަރު ވަނީ މަތަކޮށްފައެވެ.
ނަތީޖާ ހަމަހަމަ ކުރުމަށް ސެވިއްޔާ އިން ކުރި މަސައްކަތް ކާމިޔާބުވީ މެޗުގެ ފަހު 10 މިނެޓުގެ ތެރޭގައެވެ. އެއީ ކޯނަރެއްގައި އޮލިވާ ޓޮރެސް ނަގައިދިން ބޯޅައެއް އެ ޓީމުގެ ގޯލަށް ފޮނުވާލައިގެން އެރިކް ލަމެލާ ކާމިޔާބުކޮށްދިން ލަނޑެކެވެ. ދެ ވަނަ ފަހަރަށް ލީޑު ނެގުމަށް ވެލެންސިއާ އަށް ވަނީ ތަނަވަސް ފުރުސަތެއް ލިބިފައެވެ. މެޗުގެ އިތުރު ވަގުތުގައި އެޓީމަށް ލިބުނު ޕެނަލްޓީގައި ޖޯސް ގަޔާ ފޮނުވާލި ބޯޅަ ސެވިއްޔާގެ ކީޕަރު ވަނީ މަތަކޮށްފައެވެ.
މެޗު އެއްވަރުވެ ސެވިއްޔާ އޮތީ ކުޅުނު 10 މެޗުން 10 ޕޮއިންޓާއެކު ތާވަލްގެ 11 ވަނަ މަގާމުގައެވެ. މެޗުން ބަލިވި ވެލެންސިއާ އޮތީ 10 މެޗުން 15 ޕޮއިންޓާއެކު އަށް ވަނަ މަގާމުގައެވެ.
