ވައިގަދަވާނެ ކަމަށް ލަފާކޮށް ހއ. އިން އދ. އަތޮޅަށް ވައިޓް އެލާޓް ނެރެފި
18 އޮކްޓޯބަރު 2022 | އަންގާރަ 02:00އެލާޓް ނެރެފައިވަނީ މިއަދުގެ ހެނދުނު 6:30 އިން މެންދުރު 12:30 އަށް
ސުނާމީ ބިނާ ސަރަހައްދު
ހއ. އަތޮޅުން ފެށިގެން އދ. އަތޮޅާ ހަމައަށް ވައިޓް އެލާޓް ނެރެފިއެވެ.
މޫސުމާ ބެހޭ ޤައުމީ އިދާރާއިން މި އެލާޓް ނެރެފައިވަނީ މިއަދުގެ ހެނދުނު 6:30 އިން މެންދުރު 12:30 އަށެވެ.
އެ އިދާރައިން ބުނެފައިވާ ގޮތުގައި އެލާޓުގެ މުއްދަތުގައި ހއ. އިން ފެށިގެން އދ. އާ ހަމައަށް ހުރިހާ އަތޮޅަކަށް ގަޑިއަކު 19 މޭލާއި 24 މޭލާ ދެެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ވެސް ވަނީ ލަފާކޮށްފައެވެ.
މީގެ އިތުރުން ވައިގަދަވުމުގެ ސަބަބުން އެ ސަރަހައްދުތަކުގެ ކަނޑުތައް ވެސް ގަދަވާނެ ކަމަށް ވަނީ ލަފާކޮށްފައެވެ.
މޫސުމާ ބެހޭ ޤައުމީ އިދާރާއިން އަންގާރަ ދުވަހުގެ މޫސުން ލަފާ ކުރާ ގޮތުގައި އުތުރުގެ އެކި ހިސާބުތަކަށް ވިއްސާރަ ކުރާނެއެވެ. އަދި ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށް ވެސް އެ އިދާރާއިން ވަނީ ލަފާ ކޮށްފައެވެ. މެދު ރާއްޖެތެރެއަށް ކެރީގެ އަސަރު ފޯރާނެ ކަމަށް ލަފާ ކޮށްފައިވާއިރު ދެކުނުގެ އަތޮޅުތަކަށް މޫސުން އާއްމު ގޮތެއްގައި ރަނގަޅުވާނެ ކަމަށް ވެސް ވަނީ ލަފާކޮށްފައެވެ.
ރާއްޖެއަށް މިހާރު ކުރަމުން އަންނަ ވިއްސާރަ އަންނަ ހުކުރު ދުވަހުން ފެށިގެން ރަނގަޅުވާނެ ކަމަށް މޫސުމާ ބެހޭ ޤައުމީ އިދާރާއިން ލަފާ ކުރެއެވެ.
މޫސުން ގޯސް ދުވަސްވަރު މޫސުމުގެ އެންމެ ފަހުގެ އަޕްޑޭޓުތައް ބަލައި، ކަނޑުދަތުރުފަތުރު ކުރާ ފަރާތްތަކުން ރައްކާތެރިކަމގެ ފިޔަވަޅު އެޅުމަށް ކަމާބެހޭ ފަރާތްތަކުން އިލްތިމާސްކުރެއެވެ.
