ލި-ނިންގް މޯލްޑިވްސް އިންޓަނޭޝަނަލް ޗެލެންޖް 2022ގެ ޑިޖިޓަލް ޕާޓްނަރަކަށް ދިރާގު ހަމަޖައްސަފިއެވެ.

ބެޑްމިންޓަންގެ 2022 ވަނަ އަހަރުގެ ބީ.ޑަބްލިއު.އެފް ކޮންޓިނެންޓަލް ސާކިޓުގައި ހިމެނޭ ލި-ނިންގް މޯލްޑިވްސް އިންޓަނޭޝަނަލް ޗެލެންޖް 2022ގެ ޑިޖިޓަލް ޕާޓްނަރަކަށް ދިރާގުން ސޮއިކޮފައިވާ ކަން އެ ކުންފުނިން ހާމަކުރީ ހޯމަ ދުވަހުއެވެ. މި ޓޯނަމަންޓަކީ ބެޑްމިންޓަން އެސޯސިއޭޝަން އޮފް މޯލްޑިވްސް އާއި ބެޑްމިންޓަން ވޯލްޑް ފެޑެރޭޝަން (ބީ.ޑަބްލިއު.އެފް) އަދި ބެޑްމިންޓަން އޭޝިއާ ގުޅިގެން އިންތިޒާމުކޮށްގެން ބާއްވާ އިވެންޓެކެވެ.

ބީ.ޑަބްލިއު.އެފް ކޮންޓިނެންޓަލް ސާކިޓު އެކުލެވެނީ ތިން ލެވެލްއަކަށް ބަހާލައިގެން ކުރިއަށްގެންދާ 70 ޓޯނަމެންޓުގެ މައްޗަށެވެ. މި ލެވެލްތަކަކީ އިންޓަނޭޝަނަލް ޗެލެންޖް (ލެވެލް 1)، އިންޓަނޭޝަނަލް ސީރީޒް (ލެވެލް 2) އަދި ފިއުޗާ ސީރީޒް (ލެވެލް 3) އެވެ. ކޮންމެ މުބާރާތަކުން ވެސް މޮޅުވާ ކުޅުންތެރިންނަށް ބީ.ޑަބްލިއު.އެފްގެ ޕޮއިންޓު ސިސްޓަމްގެ ދަށުން ތަފާތު ރޭންކިން ޕޮއިންޓު ލިބިގެން ދާނެއެވެ.  

މި މުބާރާތުގެ ރާއްޖޭގައި ބޭއްވޭ އިންޓަރނޭޝަނަލް ޗެލެންޖް ކުރިއަށް ގެންދިއުމަށް ހަމަޖެހިފައިވަނީ މި ހިނގާ އޮކްޓޯބަރު މަހުގެ 18 އިން 23އަށް މާލެ ކުޅިވަރު އެކުވެނީގައެވެ. ދިވެހިރާއްޖެ ހިމެނޭ ގޮތަށް ދުނިޔޭގެ 25 ޤައުމެއްގެ ކުޅުންތެރިން މި ޓޯނަމަންޓުގައި ބައިވެރިވާނެއެވެ.

ދިރާގުން ބުނީ އެ ކުންފުނިން އަބަދުވެސް މަސައްކަތަކުރަމުން ދާނީ ދިވެހިރާއްޖޭގެ ކުޅިވަރު ކުރިއެރުވުމަށާއި ރާއްޖޭގެ ކުޅިވަރު ކުޅުންތެރިންނަށް އައު ފުރުޞަތުތައް ފަހިކޮށްދޭ މިފަދަ އިވެންޓުތަކަށް އެހީތެރިވެ އެއްބާރުލުން ދިނުމަށް ކަމަށެވެ.